Naum 1 - Te B'aib'ara

¹ Aio rongorongon Ninewe ake a reke iroun Naum n te mii. E maeka Naum n te kaawa ae Erekoti.

Unin te Atua N Eekaanako Ninewe

² E aki kariaia te UEA ae te Atua taiani buaka; E katuaaia aika a kakaitaraa. E kabooa mwin aia bure n unna.

³ E aki kakaiun te UEA, ao E m'aaka ao E aki toki ni katuaaia taani bure. E tei te angibuaka n te tabo are E nakonako iai te UEA; bubun waena taian nang!

⁴ E tua ao e ora taari. E kaorai taiani karaanga. A rai uteuten tawaanan Batian. Ao Maungan Karemera e bitaki nakon te buraun, Ao a b'ata ueen Reb'anon.

⁵ A m'aiei maunga i matan te UEA, ao a rannako tabuki. E ingiing aonteaba ni kaotin te UEA. A na ruru aonteaba ma aomata ake iai.

⁶ Antai ae e kona ni maiu ngkana E un? Antai ae e kona ni maiu i m'ain uran unna? E otinako unna n ai aron te ai. A maerikiriki b'aa, ma n riki ni bubu i matana.

⁷ E raoiroi te UEA. E kamanoia Ana aomata n tain taiani kaangaanga. E kawakinia akana a rairaki nakoina.

⁸ E kamaunaia ana kairiribai n ai aron rokon te ieka. E kamateia ake a kakaitaraa.

⁹ Ko iangoa ae e aki raoiroi nakon te UEA? E na kamaunanakoko B'a akea ae e kauoua kaaitaraana.

¹⁰ Ngkami aika kam mamanging, kam na kabuokaki n ai aron uteute aika a kateketeke, aika a m'auteretere.

¹¹ Ninewe, e na nako mairoum te aomata ae e on nanona ni babaire aika a bubuaka, ao iango aika a eekaanako te UEA.

¹² Aio ana taeka te UEA nakoia ana aomata aika Iteraera: “E ngae ngke e korakora Aturia mani m'aiti ana aomata, a na boni b'aka mani mauna nako.” Au aomata, I bati ni karawawataingkami, ma N na bon aki manga karaoa riki aei nakoimi.

¹³ N nang kanakoa m'aakan Aturia mai aom, ao N na motiki kabaeam ake taurekereke.

¹⁴ Aio baireaia kaain Aturia iroun te UEA, “A na akea aia kariki, are a na kateimatoai araia n rooro rimwi. N na kab'akai aia bouannanti ake i nanon temboran atuaia ni kewe. I a katauraoa ngkai ruanimateia kaain Aturia-a aki katauaki b'a a na maiu!”

¹⁵ Noria, e ri aon maunga n nakomai te tia uarongorongo, ma te rongorongo ae e raoiroi! I aon kawaina n taekina te tokanikai! Kaain Iuta, karaoi ami toa, ao angan te Atua baike kam a tia ni berita iai nakoina. A na aki konaa ni manga eweka abam aomata aika a buakaka. A tia ni bane ni kamaunaaki.