Nakoaia Ibonga 8 - Te B'aib'ara

Katabuakiia Aaron ma natina

¹ E taku te UEA nakon Moote,

² “Kaira Aaron ma natina m'aane nako mataroan te Um'antabunrianna, ao uoti naba taian kunnikai ni ibonga, ao te b'aa ni katabutabu, ao te kao m'aane te teei i bukin te karea ni kab'arabure, ao uoman naba te tiibu m'aane, ao te b'aene ni kariki are e aki karikaki.

³ Ao weteia Iteraera ni kabane nako mataroan te Um'antabunrianna.”

⁴ Ao e karaoi b'aai ni kabane Moote n aron are E tuangnga te UEA, ao ngke a bane n roko Iteraera,

⁵ ao e taku nako ia, “Te b'ai are N nang karaoi ngkai bon ana mwioko te UEA.”

⁶ Ao e kairiia Aaron ma natina m'aane nako mooa, ao e kateboteboia.

⁷ Ao e katokaa te kabaraaki, ma te niiniira i aon Aaron, ao te roo i aon babatina, ao te ebota ae taona aona n te kabae n nuuka ae rarangaaki raoi i aon koreana.

⁸ Ao e katokaa te ub'a i aona ao e karin taian urim ma tummim i nanona.

⁹ Ao e katokaa te b'ara are te m'aita i aon atuuna, ao e kanim'a te b'ai ni katamaroa i moan b'arana ae kanikinaean ana b'ai te UEA, n ai aron tuangana iroun te UEA.

¹⁰ Ao e anaa te b'aa ni katabutabu Moote, ao e kab'aroa teutana i aon te Um'antabunrianna, ma b'aai ni kabane ake a mena i nanona, ao e katabui b'aai ni kabane n te aro anne nakon te UEA.

¹¹ E anaa riki te b'aa, ao e a manga katimtim'a itiua te tai i aon te baonikarea, ma b'aina nako ma te beetin, ma nangoana, b'a e katabui nakon te UEA.

¹² Ao E katabua Aaron ni kab'aroa te b'aa teutana i aon atuuna.

¹³ Ao i mwiina, e a manga kairiia natin Aaron m'aane nako mooa, ao e karin aia kabaraaki, e katokai aia roo i aon babatiia, ao e katokai b'araia i aon atuuia n ai aron ana mwioko te UEA.

¹⁴ Ao e a uota te kao m'aane ae te tei Moote i bukin te karea ni kab'arabure, ao a katokai baiia Aaron ma natina m'aane i aon atuun te man.

¹⁵ Ao e tiringa te man Moote, ao e anaa raraana teutana, ao e kateboa tabonibaina iai, ao e kararaaea koonan te baonikarea ake aua iai, b'a kaanga katabuana. Ao e a kabanea ni kab'aroa nikiran te raraa i oin te baonikarea. Ao anne arona ni karaoa te katabu ma te kaitiaki.

¹⁶ Ao e anai taian nenea Moote ake i aon te kanoannano, ma b'ain nako te ato aika a raraoi, ma tain kirine ma nenea ake i aona, ao e kabuoki i aon te baonikarea.

¹⁷ Ao e anaa te kao m'aane ni kabane, ma kunna, irikona, kanoannanona, ao e kabuoki i tinanikun te maeka, n ai aron ana mwioko te UEA.

¹⁸ Ao i mwiina, e a manga anaa te tiibu m'aane Moote i bukin te karea ni kabuokaki, ao a katokai baiia Aaron ma natina m'aane i aon atuuna.

¹⁹ Ao Moote, e tiringnga, ao e tatauriia iteran te baonikarea ake aua n raraana.

²⁰ E korokorea te tiibu m'aane ni kauarerekea, man teboki kanoannanona, ma rangana ake mai buki n te ran, ao e na kabuoka atuuna ma neneana, ma b'ain rab'atan nako te tiibu m'aane ni kabane i aon te baonikarea, n ai aron ana mwioko te UEA nako ina.

²¹ Anne te karea ni kabuokaki are te karea are te am'arake, are e rangi ni kakukureia te UEA boiararana.

²² Ao e a manga uota riki te tiibu m'aane Moote are te kauoman, i bukin katabuaia ibonga, ao a katokai baiia Aaron ma natina m'aane i aon atuuna.

²³ Ao e tiringnga Moote, ao e anaa raraana ni kararaaea iai reben taningan Aaron are te angaatai, ma waebuan baina are te angaatai, ao waebuana are te atai naba. Ao e anaa nikiran te raraa Moote ni kabanea ni kab'aroa ni koonan te baonikarea ake aua.

²⁴ Ao e a manga kairiia natin Aaron m'aane nako mooa, ao e kabiri reben taningaia naba ake ataiia n te raraa, ma waebuan baiia te atai, ao waebuan waeia naba te atai. Ao e kabanea ni kab'aroa nikiran te raraa i aon rarikin te baonikarea ake aua.

²⁵ Ao e anaa te nenea, nenean aon te kanoannano ni kabane, ma b'ain nako te ato aika a raraoi, ma taian kirine, ma nenean aona, ao rangan te man are te atai are mai buki.

²⁶ Ao e a manga anaa kaka teuana taian kariki ake tenaekaki mai i nanon te b'aene ni kariki are e a tia ni katabuaki nakon te UEA; e anaa teuana man te kariki are e renganaki ma te b'a, ao teuana man te kariki are e manii, ao e katikui i aon te nenea, ao waen te man are te angaatai are mai buki.

²⁷ Ao e kabane n anganiia Aaron ma natina m'aane te am'arake, b'a a na bon uota aia karea nakon te UEA.

²⁸ Ao i mwiina, e a manga anaa te am'arake Moote mairouia ni katokaa i aon te karea ni kabuokaki are i aon te baonikarea, ma ni kabuokia b'a te karea ni katabutabu. Bon anne te karea are te am'arake, ao e rangi ni kakukureia te UEA.

²⁹ Ao i mwiina, e anaa b'ab'aan te man Moote, ao e anga b'a te karea nakon te UEA. Ao bon anne tib'an Moote man te tiibu te tei are te karea ni katabutabu. E karaoi b'aai ni kabane Moote n ai aron ana mwioko te UEA.

³⁰ Ao Moote, e anaa te b'a ni katabutabu teutana ao te raraa teutana ake a mena i aon te baonikarea, ao e katimtim'a i aon Aaron ma natina m'aane, ao i aon naba kunnikaia. Ao aei ngkanne arona ni katabuaia ma kunnikaia nakon te UEA.

³¹ Ao e taku Moote nakon Aaron ma natina, “Uota irikon te man nako mataroan ana Um'antabunrianna te UEA, ao kaburoa ikanne, ao kanna ma te kariki are i nanon b'aenen te karea ni katabutabu, n ai aron ana mwioko te UEA.

³² Kabuoka nikiran te iriko ke te kariki ane e tiku.

³³ Ko na aki otioti nako mai nanon ana Um'antabunrianna te UEA ni uaa banen raoi bongin katabuakim ake itibong.

³⁴ Ti a tia ni karaoi b'aai ni kabane ake E tuangiira te UEA b'a ti na karaoi n te bong aei, i bukin kab'araan am bure.

³⁵ Ko na tiku i nanon mataroan ana Um'antabunrianna te UEA ni bong ao ni ngaina i nanon itiua te bong, ni karaoi b'aai ake E tuangko te UEA b'a ko na karaoi. Ma ngkana ko aki, ao ko na mate. Bon anne ana mwioko te UEA nako iu.”

³⁶ Ma ngaia are, a karaoi b'aai ni kabane Aaron ma natina m'aane n ai aron Ana mwioko te UEA are e tuangiia Moote.