Nakoaia Ibonga 6 - Te B'aib'ara

¹ Aikai Tuua ake e anga te UEA nakon Moote.

² Ngkana iai ane e rawa ni kaoka ana b'ai raona are bon riai n anganna, ke e kimoaia, ke e m'am'anaa raona iai, ke e kewe n te b'ai are e bua b'a aongkoa e tuai reke i rouna, ao e bure iai nakon te UEA,

³ ao e na karaoaki te anga karea i bukin ana bure anne ke ni kewe n te b'ai are e bua, b'a aongkoa e tuai reke i rouna.

⁴ Ngkana e bure te aomata n aron m'akuri aikai, ao e na manga kabooa mwiin te b'ai are e a tia ni karekea n te m'akuri ae buakaka. E na waekoa ni manga kabooi mwiin b'aai ake e a tia ni bure iai n te tai naba are e namakina iai ana kaairua.

⁵ E na kabane ni kabooi mwiin b'aai nakon teuare e bure nako ina n reitaki ma te uabwi ni betienti.

⁶ Ao e na uota te tiibu m'aane ke te kooti m'aane ae akea toabuakan rab'atana nakon te ibonga b'a ana karea ni kabomwi nakon te UEA. Ao e na baaireaki boona nakon te bo are e b'ainaki n te Um'antabunrianna.

⁷ E na anga te karea te ibonga i bukin ana bure te aomata, ao e na kab'araaki iai ana bure te aomata anne.

Karea aika a Kab'aninaki

⁸ Ao te UEA e mwiokoa Moote,

⁹ b'a e na angan Aaron ma natina tuua i bukin te Karea ni kabuokaki. E na katukaki te karea ni kabuokaki i aon te baonikarea ni kangainaa, ao e na aki mate aina.

¹⁰ Ao te ibonga are kunnikainna n te roobu, ao e kawaerakenna n te rinen, e na kanakoi taian mannang ake a mena n nenea, ao e na katikui i rarikin te baonikarea.

¹¹ Ao e na manga oneia nakon kunnikaina ake mai m'aaina, ao e na uoti taian mannang nako tinanikun te kaawa n te tabo are a kakarenakoaki iai taian maange.

¹² E na kateimatoaki uran ain te baonikarea, ao e na aki titiringaki. E na katoa ingabong te ibonga ni kakarea aana n te aia, ao ni baarongai raoi karea ni kabuokaki ake i aona, ma nenean naba te karea n raoi.

¹³ E na kateimatoaki uran ain te baonikarea, ao e na aki titiringaki.

Te Karea are te Uita

¹⁴ Aikai tuua i bukin te karea are te uita. A na riai ni uota te karea are te uita ibonga ake kanoan Aaron nakon te UEA i matan te baonikarea.

¹⁵ Ao e na abuta te abutana te buraawa, ao b'aan te oriwa, ao te b'ai ni kaboiarara are e kaakabubuaki are e toka i aona, ao e na kabuoki i aon te baonikarea b'a kaanga ai rab'atan naba te karea ni kabane nakon te UEA. E rangi ni kakukureia te UEA boiararan te karea aei.

¹⁶ Ao a na kang nikiran te karea ibonga. A na manga karaoaki b'a taian kariki aika a aki itinaki, ao a na kanaki i nanon te ru are tabu, are te tabo ni kabowi n ana Um'antabunrianna te UEA.

¹⁷ E a tia n anga te UEA nakoia ibonga b'a tib'aia man te am'arake are te karea. E bon rangi n tabu n ai aron taian karea ni kab'arabure, ao taian karea ni kabomwi.

¹⁸ Ao e na teimatoa n riki b'a tib'angaia kanoan Aaron aika m'aane te am'arake are te karea nakon te UEA. Ao ngkana iai ane e riinga te am'arake are te karea, ao e na raaka iai i bukina ngke e tabu.

¹⁹ Aikai Tuua ake E anga te UEA nakoni Moote

²⁰ i bukin katabuaia ibonga ake kanoan Aaron. E na riai ni uoti nakon te UEA b'a ana karea teuana te kirokuraem te buraawa, ti te bo ma m'aitin are n te karea are te uita are e katoa bong, b'a te iterana n te ingabong ao te iterana n te tairiki.

²¹ E na renganaki ma te b'a, ao e na kuukanaki i aon te b'ai ni keeke. Ao i mwiina e na manga uruakaki ni kauarerekeaki, ao e na uotaki b'a te karea are te uita, ae kakukureia te UEA boiararana.

²² Ao e na teimatoa n riki aei b'a tib'angaia kanoan Aaron ake taian ibonga. E na kabuokaki ni kab'aninaki nakon te UEA.

²³ Bon akea m'akoron te karea are te uita are karaoa te angakarea iai te ibonga ae na kanaki; a na bane ni kabuokaki ni kabane.

Te Karea n Raoi

²⁴ Ao te UEA e mwiokoa Moote,

²⁵ b'a e na angan Aaron ma natina tuua aikai i bukin te karea ni kab'arabure. E na riai n tiringaki te man are i bukin te karea ni kab'arabure n tanimeangin te baonikarea, n te tabo are a titiringaki iai maan i bukin te karea ni kabuokaki. Bon aio te karea ae moan te tabu.

²⁶ Ao te ibonga are karaoa te angakarea, boni ngaia are e na kana te man are te karea i nanon te ru are e tabu, are te tabo ni kabowi i nanon ana Um'antabunrianna te UEA.

²⁷ Ngkana iai te aomata ae e riinga irikon te man, ao e na mate, i bukina ngke e rangi n tabu te man anne. Ngkana iai te b'ai ke te kunnikai ae e teberaki n raraan te man anne, ao e na riai n uatiiaki n te ru are tabu.

²⁸ E na uruaki te b'aata te kaatiibu are e kaburoaki iai irikon te man anne, ao ngkana e kaburoaki n te b'aata te biti, ao e na karauaki ni kaaraki ni kaitiakaki raoi te b'aata anne, ao e na manga tebokaki n te ran.

²⁹ A tii konaa ni kana te karea aei m'aane ake a nako man te utu ni ibonga; b'a e bon rangi n tabu.

³⁰ Ma ngkana e uotaki te raraa nakon te Um'antabunrianna, ao e na kabonganaaki i bukin kab'araan buure, ao e na aki kanaki te man anne, ma e na kabuokaki ni kabane rab'atana.