Nakoaia Ibonga 24 - Te B'aib'ara

Tararuaan Taura

¹ E tua te UEA nakoni Moote

² b'a e na kaangai nakoia Iteraera: Kam riai n anga te oera ae moan te tamaroa ae oeran te oriwa i bukin taura ake i nanon te Um'antabunrianna, b'a a aonga n teimatoa uraia.

³ Ni katoa tairiki ao Aaron e na kauraa te taura aei ni karokoa e ngaina i matan te UEA, i tinanikun rokin te Atiniberita, are e mena n te ru are moan te tabu.

⁴ Aaron e na karaoa kaintein te taura n te tabo are moan te tabu i nanon te Um'antabunrianna are e tabu. E na kaurai taura akana itiua n te tabo anne i matan te UEA, ao a na kateimatoaki n ura ni karokoa te ngaina, ni moa man te bong aei ni karokoa boong aika a na roko. E na tai bitaki te tua aei.

Te Kariki ae Tabu

⁵ Kamanenaa am buraawa ae e manti raoi ao karaoi tengaun ma uaai kariki aika kaka uoua te kiiro rawawataia

⁶ ao uoti nako nanon te Um'antabunrianna, ao kawenei n uoua te rinan ae kaka onoua i aon te taibora are te koora.

⁷ I rarikin te rinan n tatabeua nako kamenaa teutana te boiarara ni koaua ae e na kanakoaki boina n te ai, b'a e a aki kareanaki te kariki nako Iu, ma ai te boiarara.

⁸ E riai Aaron ni katokai kariki aika a tib'a m'ai i aon te taibora ni katoa Taabati, ao a riai ibonga n rooro nako n reita nako karaoan aei b'a m'akoron naba te berita ma Ngai.

⁹ Te kariki aei n taai nako bon ana kariki Aaron ma ana utu; e bon rangi n tabu i bukina b'a e kareanaki nako Iu, ao e riai ni kanaki n te tabo are moan te tabu.

Te Rekenikai i bukin Taetaebuakaan te UEA

¹⁰ E mareaki ma te I-Aikubita Nei Teromita ae natin Nei Riberi man te baronga are Taan, ao iai natiia te m'aane.

¹¹ N te bong teuana ao e un natiia aei ma temanna te m'aane ae te I-Iteraera, ao e taetaebuaka aran te UEA. Ma ngaia are, e a katikitikaki nakoni Moote,

¹² ao e tararuaaki ao ni kakantaningaki te UEA b'a E na tuangiia te bae a na karaoia.

¹³ N tokina ao e taku te UEA nakoni Moote:

¹⁴ E a tia n taetaebuakai teuaei. Uotia nako tinanikun te maeka ao a na katokai baiia taani kakoaua i aon atuna. Ao i mwiina tuangiia Iteraera ni kabane b'a a na karebanaia n atiibu ni karokoa matena.

¹⁵ Ao tuangiia naba b'a ane e taetaebuaka te Atua, ao e na mate n ai aron aei.

¹⁶ E aoria ngkana te Iteraera ngaia ni bungiakina, ke ngkana te iruwa ae maeka i rarikimi.

¹⁷ Te mate bon tuaan te tia tiriaomata,

¹⁸ ma tiringakin ana man te aomata ae na kaboaki mwiina naba te man.

¹⁹ Kaikoakaia aomata a riai ni baireaki i aan uruakan te tua,

²⁰ te rii ae e m'aoto boona te rii ae e m'aoto, te mata boona te mata, te wii boona te wii.

²¹ E kona ni kabooaki n te m'ane booni mwiin ana man te tia maniman ae e mate ana man, ma te mate bon tuaan te tia tiritiri.

²² Boni Ngai te UEA ae Atuami, ao I tangiria b'a e na ti te tikina te motiraoi nako imi Iteraera ao nakoia naba akana a maeka n iruwa i buakomi.

²³ Ngke e toki n taetae Moote, ao aomata a karaoa naba are e tua te UEA nakoni Moote, ike a karebanaa naba teuare e taetaebuaka ngkoa te UEA. A karebanaia ni karokoa e mate.