Nakoaia Ibonga 22 - Te B'aib'ara

Karea aika a Tabu

¹ E tuangaki Moote iroun te UEA

² b'a e na kaangai nakon Aaron ma natina m'aane: Bon te UEA Ngai ae te Atua, ao I tuangngkami b'a kam na karinea arau ae e tabu ni kaotan ami karinerine nakon te karea are e uotaki nako Iu mairouia Iteraera.

³ Ngkana iai i buakomi aika a aki itiaki ngkana a butim'aea te karea i buku, ao N na bon aki kona ni karikingkami b'a ibonga.

⁴ Akea temanna i buakomi ae e na iai tib'angana n te am'arake are e tabu ngkana iai aorakin kunna, ke ngkana e aoraki tabonim'anena, ke ngkana e a tia ni kaan ma rab'atan te mate, ke n tia n naanako te ran ni kariki mai rouna,

⁵ ke ngkana kam a tia n riinga te karikib'ai teuana ae e kam'araa, ke te aomata naba ae e kam'araa.

⁶ Ngkana iai te ibonga ae e kam'araa, e na kam'araa ni karokoa te tairiki, ao e aki kona ni kana te karea are e tabu, ma ti ngkana e a tia n tebotebo.

⁷ Ngkana e a tia ni bungi taai ao e a tib'a itiaki, ao e a tib'a kona ni kana te kare are e tabu, are boni kanana.

⁸ I tuangngkami b'a kam na tai kang maan aika a kamateaki irouia maan ni kaakaang, ke ni boni mate bon i rouia. Kam na riki ni kam'araa iai. Bon te UEA Ngai.

⁹ Ongotaeka i Rou, ao ngkana ko aki ao ko na mate i aon am m'akuri i bukin kamamaaean te tabo n taromauri. Uringnga b'a Boni Ngai te UEA, are I katabua te ibonga.

¹⁰ Bon ti ngkami ibonga ma ami utu aika kam na kang karea aika am'arake; a bon rangi n tabu n te aro are a bon aki riai b'a a na kanaki irouia ami taani m'akuri.

¹¹ E ngae n anne, ma ami taani m'akuri ni koaua, ni ikotaki ma aomata akana a bungiaki ni mwengami, a kona ni kana te am'arake aei.

¹² Ngkana e mareaki natimi te aine ma ae tiaki te ibonga, ao ngkanne e aki kona ni kana te am'arake aei.

¹³ Ma ngkana e okira mwengami neienne b'a e a tia ni mate buuna, ke tao e a raure mai rouna, ao ngkanne e kona ni ira buakon te am'arake, ti ngkana akea natina. Ti kaain te utu ni ibonga aika a kona ni kana te am'arake aei.

¹⁴ Tabeman akana a kanna n aki ataia, a na katuaaeaki b'a a na kab'aka boona ni ikotaki ma uabwi te katebubua.

¹⁵ I kauringngkami b'a kam na aki bakanrerei te naa ni karea ake a uotaki irouia Iteraera.

¹⁶ Tai kam'araaia ni kanakin te am'arake ae e tabu aei. Uringnga b'a Boni Ngai te UEA are I katabui karea aikai.

Karea aika butim'aeaki

¹⁷ E tuangaki Moote iroun te UEA

¹⁸ b'a e na tuangiia Aaron ma natina m'aane, ao te koraki ni kabane tuua i bukin te angakarea. E taku, man aika kawakawa akana a na kabuokaki ni kabane i aon te baonikarea, ngkana tao te karea i bukin kakoroan mwiin te boraraoi ke bon te karea ae te anganano,

¹⁹ e na riai te karea aei n akea buakakan ke toabuakan rab'atana, n te aro b'a e aonga ni butim'aeaki.

²⁰ A riai n akea nukaia, b'a ngkana iai ao N na aki butim'aai. Kao m'aane ma tiibu ataei ao kooti boni ngaiia man aika kawakawa aika a na kabonganaaki i bukin aekan nako karea aikai.

²¹ Ngkana kam anga te karea n raoi, e na riai n akea nukanukan te man ane kawakawa anne. E koaua aei, e aoria ngkana tao kanoan te berita ke tao bon te anganano.

²² Tai anga b'a te karea te man ae kawakawa ae matakii, ke ae ikoaki, ke ae iai i rouna te man aoraki, ke iai aorakin kunna.

²³ Ngkana iai temanna am kao ke am tiibu te teei ae ab'ab'aki ke uarereke waena teaina nakoia ake tabeman, ko kona n anganano iai b'a te karea, ma tiaki kanoan te berita.

²⁴ Ni maanin ami tai ni maeka n te aba aei, kam na tai anga b'a te karea te man aika kawakawa ae e ikoaki maangena.

²⁵ Ao kam na tai uoti nako Iu man aika kawakawa aika kam kabooi mairouia I-Abatera. I aki kona ni butim'aai, i bukina b'a a aki raoiroi riki nakoia ake iai kab'akaia.

²⁶ E tuangaki Moote iroun te UEA b'a e na kaangai:

²⁷ Kao aika a tib'a bungiaki, te tiibuteteei, ke kooti a riai ni mena i rarikin tinaia itiua te bong, ao n te kawani bong, kam riai n anganai n te kabuane, ao N na butim'aia iai b'a te karea.

²⁸ Tai anga b'a te karea maan aika kawakawa ae e a tib'a bungiaki n ikotaki ma tinana n te bong ae ti te bongina.

²⁹ Ngkana kam anga te karea ni kaaitau nako iu, ao kam riai ni karaoia n angana ae e na butim'aeaki iai.

³⁰ Kam na kang ni kabane taian iriko n ti te bongina, ao tai katuka nikirana nakon te bong are i mwina. Boni Ngai te UEA ae Atuami.

³¹ Ongotaeka nakon au tua ma au reirei. Boni Ngai te UEA.

³² Kam na tai karika taetaebuakaan Arau ae e tabu; a riai Iteraera ni kabane n ataia ae I tabu. Boni Ngai te UEA, ao I tabuingkami;

³³ ao I kaotinakoingkami ni kabane mai Aikubita, b'a I aonga n riki b'a ami UEA.