Mataio 7 - Te B'aib'ara

Te Reirei i Bukin Taekan te Motiki-Taeka

¹ Tai motiki taekaia aomata ni kabuakakaia, b'a E kawa ni motikaki taekami ni kabuakakaki iroun te Atua.

² B'a te motikitaeka ni kabuakaka are kam kabongana i bukiia aomata, ao ane E na manga motiki taekami ni kabuakakaingkami iai te Atua; ao kawai ake kam kabonganai b'a b'aini bairean motikan taekani kabuakakaia, E na kabonganai te Atua b'a b'aini baireani motikan taekami ni kabuakakaki.

³ E aera b'a ko nora te maange ae moan te uarereke i nanoni matan tarim, ao ko aki nora te oka ane i nanoni matam?

⁴ Ao ko kanga n rabakau ni kangai nakon tarim, N na kaki te maange ae uarereke mai matam, ngkai ko aki konaa te nora te oka ane i nanoni matam?

⁵ Te tia m'am'ana-te-aba, ko na kaki moa te oka ane i nanoni matam, ao ko a tib'a kona te nora raoi kanakoan te maange ae uarereke mai nanoni matan tarim.

⁶ Tai angania kamea te b'ai ae katauaki i bukin te Atua, ane a na rairaki n un nako imi; ao tai tetewe nako ami atibu aika rangi ni kakawaki nako mataia beeki, b'a a kawa n toubekaki i aani waeia.

Te Bubuti, te Ukeuke, te Karebwerebwe

⁷ Bubuti, ao ane kam na anganaki; ukeuke, ao ane kam na karereke; karebwerebwe, ao ane e na kaukaki nako imi.

⁸ B'a ane bubuti ao e na anganaki, ao ane ukeuke ao e na karereke, ao e na kaukaki te mataroa nakon ane karebwerebwe.

⁹ Antai te karo i buakomi, ngkana e butiaki te am'arake iroun natina, ao e anganna te atibu?

¹⁰ Ao ngkana e butiaki te ika, ao e na anganna te naeta?

¹¹ Ngkai kam ata te anganiia natimi baika raraoi, ngkami aika kam buakaka, ao tiaki e m'aiti riki iroun Tamami are i karawa te kan anga baika raraoi nakoia akana butiia?

¹² Ma ngaia aei, b'a b'aai ni kabane aika kam tangiri b'a a na karaoaki nako imi irouia aomata, ao kam na karaoi naba nako ia: b'a aei te reirei ae kanoan tuua ake e anga Moote ma aia boki burabeti.

Te Mataroa ae Wariki

¹³ Kam na rin n te mataroa are wariki: b'a e warebwe te mataroa, ao e raababa te kawai are nako n te mate, ao a m'aiti akana rin ni mataroana.

¹⁴ B'a e wariki te mataroa, ao e irariki te kawai are nako n te maiu, ao a karako akana kunea te kawai anne.

Te Kai ao Uaana

¹⁵ Kam na kawakiningkami mairouia burabeti ni kewe, akana nako imi ni bakaaea te nimamannei kaanga ai aroia tiibu, ma bon aroia kameanti aika tiritiri ni koaua uakekei.

¹⁶ Ane kam na kinaia n uaaia. A anaki kureebe man akanta? Ao biiku mani kaai aika kateketeke?

¹⁷ Ma ngaia ae kaai ni kabane aika maiu raoi, a kariki uaaia aika raraoi; ma kaai aika aki maiu raoi, a kariki uaaia aika bubuaka.

¹⁸ E aki kona ni karika te uaa ae buakaka te kai ae maiu raoi, ao e aki kona ni karika te uaa ae raoiroi te kai ae aki maiu raoi.

¹⁹ Kaai nako aika aki kariki uaa aika raraoi, a koreaki ao a teweaki nako n te ai.

²⁰ Ma ngaia aei, ane kam na kinaia uakekei n uaaia.

E aki kinaa Iesu

²¹ A aki bane n rin n Uean te Atua akana aki toki n atoatongai b'a te Uea Ngai, ma e na rin iai ane karaoa nanon Tamau are i karawa.

²² Ane a na kangai nako Iu aomata aika bati n te bong are E na motiki taekaia iai aomata te Atua, Te Uea, te Uea, tiaki ti taetae ni burabeti n aram? Ao tiaki ti kanakoia taimonio n aram? Ao tiaki ti karaoi m'akuri aika kamimii n aram?

²³ Ao Ngai N na kangai nako ia, Bon te akea reitakiu ma ngkami; naako mai Rou, ngkami aika kam tuai mani karaoa nanon te Atua.

Aan te Auti aika Uoua

²⁴ Ma ngaia aei, b'a ane ongo au taeka aikai ao e iri nanoia, ao ai aron te aomata ae wanawana, are katea ana auti i aon te b'a.

²⁵ ao e b'aka te karau, ao e roko te raanga, ao e kare te ang ae baibati n neakina te auti arei, ma e aki b'aka, i bukina b'a e kateaki i aon te b'a.

²⁶ Ao ane ongo au taeka aikai n aki iri nanoia, ao ai aron te aomata ae baba, are katea ana auti i aon te tabo ae maraurau:

²⁷ ao e b'aka te karau, ao e roko te raanga, ao e kare te ang ae baibati n neakina te auti arei, ao e b'aka; ao e uruaki rab'atana ni kabanea.

²⁸ Ngke E a tia n atong taeka aikai Iesu, ao a mimii aomata n arona n reirei.

²⁹ E reireiia n ai aron ae m'aaka ao tiaki n ai aroia aia taani koroboki.