Mataio 25 - Te B'aib'ara

Te Rongorongo ni Kabotau ae Taekaia Ateiaine aika Tengaun

¹ N te tai arei, ao Uean te Atua ai aroia tengaun ateiaine, ake a anai aia taura ao a oti nako ni butim'aea teuare te tia iein.

² A nanobaba niman, ao a wanawana niman.

³ B'a ngke a uoti aia taura nake a nanobaba, ao a aki ua b'a;

⁴ ma nake a wanawana iai aia b'a ake a uoti i nanoni nneia.

⁵ E iremwe n roko te tia iein, ma ngaia are e a roko i rouia te kani matu, ao a matu.

⁶ Ma ngke e a nukanibong, ao iai te b'ana ae takarua ni kangai, “Noria, te tia iein! kam na oti nako ni butim'aia!”

⁷ A bane n tei rake ngkanne ateiaine akekei, ao a kauram'aakai aia taura.

⁸ Ao a taku nake a nanobaba nakoia nake a wanawana, “Kamai teutana n ami b'a, b'a a kani mate ara taura.”

⁹ Ao a kaekaia nake a wanawana ni kangai, “Tao e na aki tau nako imi ao nako ira; ma kam na nako nakoia taani kabo b'a ni kabo ami b'a i bukimi.”

¹⁰ Ao ngke a nako ni kaboa te b'a, ao e roko te tia iein, ao nake a tauraoi a rin ma ngaia nakon te am'arake ni baka i bukin te mare, ao e kainaki te mataroa.

¹¹ Ao rimwi a roko ateiaine ake raoia, ao a taku, “Teuae karineaki, teuae karineaki! Ko na kaukia nako ira!”

¹² Ma e kaekaia ni kangai, “E koaua ae I a tuangngkami b'a I aki kinaingkami!”

¹³ Ma ngaia ae kam na tantani, b'a kam aki ata te bong ke te aoa arei.

Te Rongorongo ni Kabotau ae Taekaia Tooro ake Anganaki te M'ane

¹⁴ N te tai arei ao Uean te Atua ai aron te aomata temanna ae kan nako n te aba teuana; e weteia ana toro ao e anganiia taekan ana b'ai nako b'a a na tararuai.

¹⁵ E angan temanna nimaua te tarena, ao temanna uoua, ao temanna teuana; e angania nako n ai aron aia konab'ai.

¹⁶ Teuare e anganaki nimaua te tarena e aki tab'ara ma e a nako naba ni kam'akuria, ao e karekea rakana ae nimaua riki te tarena.

¹⁷ Ao ai aron naba teuare anganaki uoua te tarena, b'a e karakaa riki uoua te tarena.

¹⁸ Ma teuare anganaki teuana te tarena, e nako ni kena aontano ao e karaba iai ana m'ane ana toka.

¹⁹ Ao i mwini boong aika bati, ao e roko aia toka tooro akekei; ao e kaeti mwin ana b'ai nako ma ngaiia.

²⁰ Ao e roko teuare anganaki nimaua te tarena, ao e uoti riki nimaua te tarena, ao e taku, “Te toka, ko anganai nimaua te tarena; noria, aikai nimaua riki te tarena aika I a tia ni karekei.”

²¹ E taku ana toka nako ina, “Ko a tia ni m'akuri raoi, te toro ngkoe ae ko raoiroi ae ko kakaonimaki. Ko a tia ni kakaonimaki nakon te b'ai ae uarereke, N na karaoiko b'a ko na mataniwi i aoni baika bati; ko na rin i nanoni kim'areirein am toka!”

²² Ao e roko teuare anganaki uoua te tarena, ao e taku, “Te toka, ko anganai uoua te tarena; noria, aikai uoua riki te tarena aika I a tia ni karekei.”

²³ E taku ana toka nako ina, “Ko a tia ni m'akuri raoi, te toro ngkoe ae ko raoiroi ae ko kakaonimaki. Ko a tia ni kakaonimaki nakon te b'ai ae uarereke, N na karaoiko b'a ko na mataniwi i aoni baika bati; ko na rin i nanoni kim'areirein am toka!”

²⁴ Ao e roko teuare anganaki teuana te tarena, ao e taku, “Te toka, I ataiko b'a te aomata ngkoe ae ko matoatoa: ko boboti uaa n taabo ake ko aki ununiki iai, ao ko ikoikoti ike ko aki kamrara iai koraa;

²⁵ ma ngaia are I maaku, ao I nako ni karaba am tarena i aantano. Noria, ao aei am b'ai!”

²⁶ Ma e kaeka ana toka ao e taku nako ina, “Te toro ae ko buakaka, ae ko taningaroti! Ko ataai b'a I boboti uaa n taabo ake I aki ununiki iai, ao I ikoikoti ike I aki kamrarai iai koraa.

²⁷ Ko riai ngkanne ni karina au m'ane n te bangke, ao n rokou ao I a anaia ma rakana.”

²⁸ Ao e taku te toka, “Ma ngaia ae kam na anaa te tarena mai rouna, ao angan teuare iai i rouna tebwina te tarena.

²⁹ B'a ane iai ana b'ai ao e na anganaki riki, ao ane a na rangi ni m'aiti iai ana b'ai.

³⁰ Ao kam na tewea nako te toro ae akea manenana aei nako nanon te roo are i moone, are te tabo ike a na tanginiwenei iai aomata ao a na tenai riaia b'a kaotan ae a rotaki n te maraki ae korakora.”

A na Motikaki Taekaia Botannaomata

³¹ Ngkana E roko Natin te Aomata ma mimitongina, ma anera ni kabaneia i rarikina, ao ane E na tekateka i aon ana kaintokanuea ae mimitong.

³² Ane a na bane ni botaki botannaomata ni kabaneia i matana, ao E na kaokoroia tekorakina mairouia tekorakina, n ai aron te tia kawakin-tiibu ngkana e kaokoroia tiibu ma kooti:

³³ ao E na kakiia tiibu i angaataina, ao kooti i angamaingina.

³⁴ Ao ane E na kangai te Uea nakoia ake i angaataina, “Nako mai ngkami akana kam kakab'aiaki iroun Tamau; kam na b'aina Uean te Atua are a tia ni katauraoaki i bukimi mani moani karikan aonnaba:

³⁵ b'a I baki ao kam anganai kanau; I taka ni kani mooi, ao kam anganai te moi; te iruwa Ngai, ao kam akoai;

³⁶ akea kunnikaiu, ao kam karekea kunnikaiu; I aoraki, ao kam kawarai; I mena i nanon te karabuuti, ao kam kawarai.”

³⁷ Ao ane a na kaeka ngkanne ake a raoiroi ni kangai, “Te Uea, ti noriko n ningai ngke Ko baki ao ti kaam'arakeko, ao ngke Ko kani mooi ao ti anganiko nimam?

³⁸ Ao n ningai are ti noriko iai b'a te iruwa ao ti akoiko, ke ngke akea kunnikaim ao ti karekea kunnikaim?

³⁹ Ao n ningai are ti noriko iai b'a Ko aoraki, ke ngke Ko mena n te karabuuti, ao ti kawariko?”

⁴⁰ Ao E na kaekaia te Uea ni kangai, “E koaua ae I a tuangngkami, b'a are kam karaoia nakon temanna ae mangori riki i buakoia tariu aikai, ao kam karaoia naba nako Iu.”

⁴¹ Ao ane E na kangai nakoia ake i angamaingina, “Naako mai Rou! Ngkami akana reke kaimi iroun te Atua. Nakon te ai are aki mamate are katauraoaki i bukin te riaboro ma ana anera!

⁴² B'a I baki, ao akea te am'arake ae kam anganai; I taka ni kani moi, ao akea te moi ae kam anganai.

⁴³ Te iruwa Ngai, ao kam aki akoai; akea kunnikaiu, ao kam aki karekea kunnikaiu; I aoraki ao I mena i nanon te karabuuti, ao kam aki kawarai.”

⁴⁴ Ao ane a na kaeka naba ni kangai, “Te Uea, ti noriko n ningai ngke Ko baki, ke ngke Ko taka ni kani moi, ke ngke te iruwa Ngkoe, ke ngke akea kunnikaim, ke ngke Ko aoraki, ke ngke Ko mena i nanon te karabuuti, ao ti aki tabeakiniko?”

⁴⁵ Ao Ngaia E na kangai nako ia, “E koaua ae I a tuangngkami, b'a ngke kam aki karaoi baikai nakon temanna ae mangori riki i buakoia aikai, ao kam aki karaoi naba nako Iu.”

⁴⁶ Ao e taku Iesu, “Ane a na bane n nako nakon reken te kai are aki toki. Ma ake a raoiroi a na nako nakon te maiu are aki toki.”