Mataio 23 - Te B'aib'ara

Ana Taeka Iesu i bukiia Taani Koroboki ma B'aritaio

¹ E taetae ngkanne Iesu nakoia aomata aika m'aiti ao nakoia ana reirei, ni kangai:

² A onea mwini Moote n nakoana taani koroboki ma B'aritaio;

³ ma ngaia ae kam na kawakini baikana a tuangngkami ao karaoi, ma tai kakairi i rouia n aia m'akuri: b'a a reireingkami baika kam na karaoi, ma a aki kona ni karaoi ngaiia.

⁴ A kabaei uota aika rawawata, ao a kaki i aon angaia aomata; ma ngaiia a rawa ni kani kam'aing n tabonibaia naba teaina.

⁵ A karaoi aia m'akuri ni kabane b'a a aonga n noraki irouia aomata: a karababai aia burakitere, ao a kam'arairai riki rabini kunnikaia!

⁶ A tangiri taabo n tekateka aika nneia aomata aika karineaki n tain te am'arake ni baka, ao kaintekateka ake mai moa i nanoni taian tinekaoki.

⁷ A tangiria b'a a na kamauraki n te aro ni karinerine n taabo ni m'akete, ao b'a a na atongaki irouia aomata b'a taan reirei.

⁸ Ma ngkami, kam na aki atongaki b'a ‘Taan Reirei’, b'a ti temanna ami Tia Reirei, ao taari ngkami ni kabaneingkami.

⁹ Ao tai atonga te aomata temanna i aon te aba b'a tamami, b'a ti temanna Tamami b'a Teuare i karawa.

¹⁰ Ao kam na tai atongaki b'a mataniwi, b'a ti temanna ami Mataniwi b'a te Kristo.

¹¹ Ane moanibaan te kakannato i buakomi ao e na riki b'a ami tabonibai;

¹² ane karietata ao e na kamangoraki, ao ane kamangoria ao e na karietataki.

¹³ Ma a na reke kaimi, taani koroboki ma B'aritaio, aika taani m'am'ana-te-aba! B'a kam kaina mataroan Uean te Atua nakoia aomata; ao ngkami kam aki rin, ao kam tukiia akana kan rin iai.

¹⁴ A na reke kaimi, taani koroboki ma B'aritaio, aika taani m'am'ana-te-aba! B'a kam kurib'ai aia auti aine, ao kam kaananau ami tataro b'a kam aonga n taraaki iai; ma ngaia ae kam na anganaki tuaami ae korakora riki.

¹⁵ A na reke kaimi, taani koroboki ma B'aritaio, aika taani m'am'ana-te-aba! B'a kam ri nanoni marawa ao kam ri aon te aba b'a kam na anaa nanon te aomata nakon ami koaua; ao ngkana e reke, ao kam karaoa ae e na reke iai uoua aron taun teuanne n riki b'a kaaini Keenna n ai aromi.

¹⁶ A na reke kaimi taani kairiri aika kam mataki, aika kam kangai, Ngkana e m'anewea aran te um'antabu te aomata b'a te b'ai ni kakoaua ngkana e taetae n tuea, ao e aki bae iai; ma ngkana e m'anewea aran te koora are b'ain nanon te um'antabu, ao e bae iai.

¹⁷ Te koraki ni baba aika mataki! B'a e nga ae kakawaki riki, te koora ke te um'antabu are ngaia ae karekea ae e na riki n tabu iai te koora?

¹⁸ Ao kam kangai naba: Ngkana e m'anewea aran te baonikarea te aomata b'a te b'ai ni kakoaua ngkana e taetae n tuea, ao e aki bae n ana taeka anne; ma ngkana e m'anewea aran te karea ane i aona ngkana e taetae n tuea, ao e bae iai.

¹⁹ Aomata ngkami aika kam mataki! B'a e nga ae kakawaki riki, te karea ke te baonikarea are ngaia ae e riki n tabu iai te karea?

²⁰ Ma ngaia aei, b'a ngkana e taetae n tuea te aomata ao e m'anewea aran te baonikarea, ao e taetae n tuea n te baonikarea ma karea nako akana mena i aona.

²¹ Ao ane m'anewea aran te um'antabu b'a te b'ai ni kakoaua ngkana e taetae n tuea, ao e taetae n tuea n te um'antabu ao iroun Teuare maeka i nanona;

²² ao ane m'anewea arani karawa b'a te b'ai ni kakoaua ngkana e taetae n tuea, ao e taetae n tuea n ana kaintokanuea te Atua, ao iroun naba Teuare tekateka i aona.

²³ A na reke kaimi, taani koroboki ma B'aritaio, aika taani m'am'ana-te-aba! B'a kam angaanga teuana te katebwina ni m'akoro mani m'aitin ami b'ai are te minte ma te aneto, ma te kumino, ao kam katiku taekani b'aai aika kakannato n taekan te Tua, n ai aron te kaeti raoi taekani b'aai, ma te nanoanga, ma te kakaonimaki nakon ana kaantaninga te Atua.

²⁴ Taani kairiri aika kam mataki! Kam raumea te manibeti, ao kam oonga te kamero.

²⁵ A na reke kaimi, taani koroboki ma B'aritaio, aika taani m'am'ana-te-aba! B'a kam kaitiaka akuun te m'angko ma te raurau, ma a on nanoia n am'arake ma ninima aika reke n te aro n iowawa ma ni kani b'aib'ai.

²⁶ Te B'aritaio ae ko mataki, kaitiaka moa nanon te m'angko, ao ane na itiaki naba tinanikuna.

²⁷ A na reke kaimi, taani koroboki ma B'aritaio, aika taani m'am'ana-te-aba! B'a ai aron ruua ni mate aika kamainainaki ngkami; a tara n tamaroa mai tinanikuia, ma a on nanoia n riia maate ma baika mka n aekaia nako.

²⁸ Ao ai aromi naba, b'a kam tara n raoiroi nakoia aomata mai tinanikumi, ma a on nanomi n te m'am'ana-te-aba ma te buakaka.

²⁹ A na reke kaimi, taani koroboki ma B'aritaio, aika taani m'am'ana-te-aba! B'a kam karaoi ruani mateia burabeti, ao kam katamaroai aon ruani mateia aomata ake a raoiroi;

³⁰ ao kam kangai, Ngke tao ti maiu n aia bong ara bakatibu, ao ti na bon aki raoniia ni kamateia burabeti.

³¹ Ma ngaia ae kam boni kaotioti i bukimi b'a kam riki mairouia ake a kamateia burabeti.

³² Kam na waki ni katia te baere a tia ni moana karaoana ami bakatibu.

³³ Ngkami aika naeta, aika buniia naeta aika kamamate, kam na kanga ni kamaiungkami mani motikan taekami are kam na karawawataki iai i Keenna?

³⁴ Ma ngaia ae N na kanakoia burabeti, ma aomata aika rabakau, ma taani koroboki nako imi: ao ane kam na kamateia tem'angina, ao kam na tauriia tem'angina ni kaibangaki; ao ane kam na kataereia tem'angina i nanoni m'aneabami, ao kam na kakioia nako man te kawa teuana nakon te kawa teuana.

³⁵ Anne bukin ae kam na bukinaki iai i bukini mateia aomata ake a raoiroi i aon te aba, mairoun Abera ni karokoa natini Barakia are Tekaria, are tiringaki i roumi i marenan te um'antabu ma te baonikarea.

³⁶ E koaua ae I a tuangngkami b'a a na bane n roko baikai i aon te roro aei.

Tangiran Ierutarem iroun Iesu

³⁷ Ierutarem, Ierutarem, ae ko kamamateia burabeti, ae ko karebanaia ake a kanakomaiakaki nako im, ai bati ra au kani bobotiia am aomata, n ai aron te moa aine ngkana e botiia bunna i aani baina, ma kam rawa!

³⁸ Noria, e nang kitanaki ami um'antabu, ao a nang akea kaaina.

³⁹ B'a I taku nako imi b'a kam na aki manga norai ni karokoa kam kangai, “E na karaoiroaki Teuare nako mai n aran te Uea.”