Mataio 14 - Te B'aib'ara

Maten Ioane are te Tia B'abetito

¹ Ni boong akekei, ao e ongo rongorongon Iesu Erote are te tia tau-taeka,

² ao e taku nakoia ana toro, “Bon Ioane teuarei, are te tia B'abetito! E a manga uti mai buakoia maate, ma ngaia ae e a reke i rouna te m'aaka ni karaoi m'akuri aika kamimii.”

³ B'a e a tia n anga ana taeka Erote b'a e na tauaki Ioane b'a te bure, ao e tua b'a e na kabaeaki ao e na kakiaki i nanon te karabuuti. E karaoa aei Erote i bukin Eroria b'a e a tia ni iein ma ngaia, ao neiei boni buun tarina are Biribo.

⁴ B'a e a tia ni kangai Ioane nakon Erote, “E aki riai i aan te tua b'a ko na buuna Eroria!”

⁵ Iai nanon Erote ni kani kamatea Ioane, ma e makuia aomata.

⁶ Ma n te tai are e kauringaki iai ana bongi ni bung Erote, ao e b'ab'atere natin Eroria te aine i mataia kaain te botaki. E kukurei Erote i rouna

⁷ ma ngaia are e kab'aka ana taeka ni bau nako ina, ao e tuea b'a e na angan neierei te baere e tangiria mai rouna.

⁸ E a kaman tuangaki neierei iroun tinana, ma ngaia are e taku, “Anganai atun Ioane are te tia B'abetito ikai i aon te raurau!”

⁹ E rawawata nanon te uea; ma e tua b'a e na anganaki i bukin ana taeka ni bau are e a tia n atongnga i mataia ana iruwa;

¹⁰ ao e kanakoa ana aomata temanna b'a e na korea roroan Ioane n te karabuuti.

¹¹ E uotaki atuna i aon te raurau, ao e anganaki te teeinaine arei, ao ngaia e uotia nakon tinana.

¹² Ao a roko ana reirei n anaa rab'atana, ao a taunna; ao a nako n tuanga Iesu.

E Kaam'arakeia Aomata aika Nimangaa Iesu

¹³ Ngke E ongo taekan Ioane Iesu, ao E kitana ikekei n te booti, ao E nako n te tabo ae akea kaaina ni kaokoroa iai. Ma ngke a ongo taekana aomata, ao a kitan aia kaawa n ri mwina n nakonako ri etan te nama.

¹⁴ Ngke E aerake man te booti, ao e noriia aomata aika rangi ni m'aiti; ao E nanoangaiia, ao E kamaiuia aia aoraki.

¹⁵ Ngke e a kani bong, ao a nako Ina ana reirei ao a taku, “E aki maekanaki te tabo aei, ao e a b'akanako te tai; kanakoia aomata nakoni kaawa b'a a na kabooi kanaia i bon i bukiia.”

¹⁶ E taku Iesu, “A riai n aki nako; anganiia ngkami kanaia!”

¹⁷ A taku nako Ina, “Ti nimaai te kariki aika iai i roura ikai, ao uoman te ika.”

¹⁸ Ao Ngaia E taku, “Uoti mai nako Iu.”

¹⁹ E tuangiia ngkanne aomata b'a a na tekateka i aon uteute; ao e anai kariki ake nimaai ao ika ake uoman, ao E tara rake nako karawa, ao E kaitaua te Atua. E urui kariki ao E angania ana reirei, ao ana reirei a angania aomata.

²⁰ Ao a bane n am'arake ao a ngae. A rikoi am'arake ana reirei ao a on iai tengauni ma uakora te b'aene.

²¹ M'aitiia aomata ake a am'arake tao nimaua tengaa te mm'aane, ao iai naba aine ma ataei.

E Nakonako Iesu i aon te Nama

²² E kairoroia ngkanne ana reirei b'a a na toka n te booti n ri moana nakon iteran te nama, are iterana are teuana, ngkae E tabe ni kanakoia aomata.

²³ Ao ngke E a tia ni kanakoia aomata, ao E ararakea te maunga n ti Ngaia b'a E na tataro. Ngke e a tairiki, ao bon ti Ngaia naba ikekei;

²⁴ ma te booti n te tai aei e mena n raroa nako ma te aba, ao e reimaurua n te nao, b'a e tutuki te ang.

²⁵ I marenan te aoa tenua ma onoua n te karangaina, ao E nako ia Iesu n nakonako i aon te nama.

²⁶ Ao ngke a noria ana reirei n nakonako i aon te nama, ao a maaku, ao a kangai, “Te anti!” Ao a tang, b'a a maaku.

²⁷ Ma E waekoa Iesu n taetae nako ia, ao E taku, “Kam na karau nanomi, boni Ngai; tai maaku!”

²⁸ Ao e kaekaa Betero ni kangai, “Te Uea, ngkana boni Ngkoe, ao Ko na tuangai b'a N na nako Im i aon te ran.”

²⁹ Ao E taku Iesu, “Nako mai!” Ma ngaia are e ruo Betero man te booti ao e nakonako i aon te ran n nakon Iesu.

³⁰ Ma ngke e nora te ang b'a e korakora karena ao e maaku, ao ngke e tabe n inako ao e takarua ni kangai, “Te Uea, kamaiuai!”

³¹ E waekoa Iesu ni kanakoa baina n taua, ao E taku nako ina, “Te aomata ae e karako am onimaki! Ko aera ngkai ko nanokokoraki?”

³² Ao ngke a toka n te booti, ao e b'aka te ang.

³³ Ao aomata ake n te booti a bobaraaki ni karinea ao a kangai, “Bon te koaua b'a Natin te Atua Ngkoe!”

E Kamaiuia Aomata aika Aoraki Iesu i Kennetareta

³⁴ Ao ngke a ri nanon te nama, ao a roko n te aba are Kennetareta.

³⁵ Ao ngke E kinaki Iesu irouia aomata ake kaain te tabo arei, ao a kanakoa aia rongorongo ni kabuta te aba arei, ao a kabaneia ake a aoraki n uotiia nako Ina.

³⁶ A butia Iesu b'a a na ti riinga rabin ana kunnikai aoraki; ao ake a riingnga a kamaiuaki.