Mataio 13 - Te B'aib'ara

Taekan te Tia Ununiki

¹ N te bongi naba arei, ao E nako Iesu man te auti, ao E tekateka i rarikin te nama.

² Ao a botaki aomata aika m'aiti i rarikina, ma ngaia are E toka n te booti ao E tekateka iai, ao a tei aomata n ua kaan ma mataniwin te nama.

³ Ao E atongi baika bati nako ia n taeka ni kabotau, ao E kangai, Noria, e oti nako te tia ununiki ni kamaae koraa n uniki.

⁴ Ao ngke e kamaae, ao a b'aka tabeua ri rarikin te kawai, ao a roko mannikiba ni kang.

⁵ A b'aka tabeua i aon ae ririb'a, ike e aki bati te tano iai, ao a kai riki b'a e mani te tano;

⁶ ma ngke e kabo rake taai, ao a urarake; a mate i bukina ngke a aki roro nako wakaaia.

⁷ Iai koraa ake a b'aka i buakoni kaai aika kateketeke; a riki rake kaai aika kateketeke, ao a karib'ai aroka ake a unikaki.

⁸ A b'aka tabeua koraa i aon te tano ae raoiroi, ao a riki b'a aroka aika uaa: tabekai tatabe bubua uaaia, ao tabekai kaka onobwi, ao tabekai kaka tenibwi.

⁹ Ane iai taningana, ao ke e ongo!

Nanon Taeka ni Kabotau

¹⁰ A roko ngkanne ana reirei Iesu, ao a taku nako Ina, “E aera ngkai Ko taetae nako ia n taeka ni kabotau?”

¹¹ Ao E kaekaia ni kangai, Kam a tia n anganaki baika raba aika b'ain Uean te Atua; ma ngaiia, a tuai n anganaki.

¹² B'a ane iai i rouna te atatai ni baika raba aika b'ain Uean te Atua, ao e na anganaki riki, ao e na reke i rouna ni bati; ma ane akea i rouna ao e na anaki mai rouna are iai, e aoria ngkana e rangi n uarereke.”

¹³ Aei bukin ae I taetae iai nako ia n taeka ni kabotau: b'a a taratara ma a aki noraba; ao a bon ongo ma a aki ongo, ao a aki ataia.

¹⁴ E a kakoroaki i rouia nanon ana taeka Itaia, are e kangai: ‘Ane kam na ongora ma n ongora, ma kam na aki atatai, ao kam na taratara ma n taratara, ma kam na aki noraba.

¹⁵ B'a e a reke irouia aomata aikai te roo n nano, ao a rawa taningaia ni kan ongo, ao a kamatakiaki mataia: b'a a kawa n noraba ni mataia, ao n ongora n taningaia, ao n atatai n nanoia, ao n rairaki b'a N na kamaiuia.’

¹⁶ Ma a kab'aia matami b'a a noraba; ao taningami b'a a ongo!

¹⁷ E koaua ae I a tuangngkami b'a a bati burabeti ma aomata aika raoiroi, ake a kan nori baika kam nori ao a aki nori; ao a kan ongo baika kam ongo, ao a aki ongo.

Kab'aran Nanon Rongorongon te Tia Ununiki

¹⁸ Kam na ongora ngkanne ni kab'arab'araan nanon te rongorongo ni kabotau are taekan te tia ununiki.

¹⁹ Ngkana e ongo taekan Uean te Atua te aomata ao e aki ata nanona, ao e roko iai teuare buakaka n anaa are e a tia n unikaki i nanona; aei te koraa are unikaki ri rarikin te kawai.

²⁰ Ao are unikaki i aon te ririb'a bon ane ongo ana taeka te Atua ao e butim'aia naba ma te kukurei;

²¹ ma akea wakaana i nanona, ao e aki tiku ni maan; ao ngkana e roko te kanganga ke te b'ainikirinaki i bukin ana taeka te Atua, ao e a b'aka naba.

²² Ao are unikaki i buakoni kaai aika kateketeke bon ane ongo ana taeka te Atua; ma n iango n raraoma nako i bukini b'ain te maiu aei ma mataiakinani kaub'aina a karib'a te taeka, ao e aki kariki uaa.

²³ Ao are unikaki n te tano are raoiroi bon ane ongo ana taeka te Atua ao e ata nanona; ao e kaoti uaana b'a tatabe bubua ke kaka onobwi ke kaka tenibwi.

Te Uita ao te Titania

²⁴ E a manga tuangiia te rongorongo ni kabotau teuana, ao E kangai, Uean te Atua e kona ni kabotauaki ma te aomata are uniki koraa n uita aika raraoi i abana.

²⁵ Ma ngke a matu aomata, ao e roko ana kairiribai ao e uniki koraan titania i buakoni koraa n uita, ao e nako.

²⁶ Ma ngaia are ngke a riki rake aroka ao a uaa, ao a tib'a kinaki iai ngkanne titania i buakoia.

²⁷ Ao a roko ana toro teuare ununiki, ao a taku nako ina, Te toka, tiaki ko uniki koraa ake a raraoi? Ao a roko maia titania?

²⁸ Ao e taku nako ia, E a tia ni karaoa aei te tia kairiribai. A taku tooro nako ina, Ko tangirira b'a ti na nako n taeki?

²⁹ Ao ngaia e taku, I aki; b'a a kawa ni koutaki nako uita ngkana kam taeki titania.

³⁰ Katikuia b'a a na uaia n riki rake ni karokoa tain te tai; ao ni bongin te tai, ao I a tuangiia taan rikoriko ni kangai, Booti moa titania, ao kabaei ni b'ab'ati b'a a na kabuokaki; ma ikoti uita nakoni nnen au am'arake.

Uaan te M'akeke ao te Iti

³¹ E a manga tuangiia te rongorongo ni kabotau teuana, ao E kangai, Uean te Atua ai aron uaan te m'akeke, are e anaia te aomata ao e unikia i abana.

³² Bon te kabanea n uarereke i buakon uaa nako, ma ngkana e a ikawai ao e riki b'a te aroka ae moan te buubura i buakon aroka nako. E a riki b'a te kai are a roko iai mannikiba ni karaoi ngaoia i aoni m'angana.

³³ E a manga tuangiia te rongorongo ni kabotau teuana, ao E kangai, “Uean te Atua ai aron te iti, are e anaia te aine ao e renganna ma te buraawa ae abwi rawawatana, ao e kabanea ni karikirakea te buraawa.”

Kamanenan Taeka ni Kabotau iroun Iesu

³⁴ E atongi baikai ni kabane Iesu nakoia aomata n taeka ni kabotau: b'a E tatangiria ni kani kakamanenaa te taeka ni kabotau ngkana E reireiniia aomata;

³⁵ B'a e na kakoroaki bukin are e atongaki iroun te burabeti, ngke e kangai: “N na kabonganai taeka ni kabotau ngkana I taetae nako ia; na taekini baika karabaki mani moani karikan aonnaba.”

E a Kab'araki nanon te Rongorongo ni Kabotau are Taekaia Titania

³⁶ E kitaniia aomata Iesu, ao E nako n rin n te auti. Ao a roko ana reirei i Rouna, ao a taku, “Ko na kaota nako ira nanon te rongorongo ni kabotau are taekaia titania ake ni nnen uita.”

³⁷ Ao E kaekaia ni kangai, Teuare uniki uaa aika raraoi bon Natin te Aomata.

³⁸ Nnen aroka bon te aonnaba; ao uaa ake a raraoi bon aomata aika kaain Uean te Atua; titania bon te koraki ake ana aomata teuare buakaka,

³⁹ ao te kairiribai are uniki titania bon te riaboro. Bongin te tai bon tokin aonnaba, ao taan tai bon anera.

⁴⁰ Ao aron titania, ngkai a botaki ni kabuokaki n te ai, ao ai aroia naba te koraki ake ana aomata teuare buakaka: a na botaki ao a na kabuokaki n te ai n tokin aonnaba.

⁴¹ Ane E na kanakoia ana anera Natin te Aomata, ao a na botiia mai buakoia kaain ueana te koraki ake a riki b'a taani kab'akab'aka nakoia aomata, ao koraki ni kabane ake a kakaraoa ae buakaka;

⁴² ao ane a na teweia nako nakoni nnen te ai, ike a na tang ao a na tenai riaia iai b'a kaotan ae a rotaki n te maraki ae korakora.

⁴³ Ao ane a na raneanea akana raoiroi n ai aron taai n uean Tamaia. Ane iai taningana, ao ke e ongo.

Te Kabotau ae Taekan te B'ai ae Kakawaki are Kuneaki

⁴⁴ Uean te Atua ai aron te b'ai ae kakawaki are karabaki n te tabo teuana, ao te b'ai are e kunea te aomata temanna ao e karaba; i nanoni kukureina ao e nako ni kabo nako ana b'ai ni kabane, ao e kaboa te aba are e karabaki iai te baerei.

Te Moomi ae bati Boona

⁴⁵ Ao aio riki: Uean te Atua ai aron te tia bob'ai are ukoukori moomi aika raraoi;

⁴⁶ ngke e kunea te moomi teuana ae e bati boona, ao e nako ni kabo nako ana b'ai ni kabane, ao e kaboa te moomi ni booia.

Te Rongorongo ni Kabotau ae Taekan te Karaun

⁴⁷ Ao manga aio: Uean te Atua ai aron te karaun are kab'akaki i nanon te nama, ao a reke iai ika n aekaia nako;

⁴⁸ ao ngke e on, ao a katikiarake aomata ao a tekateka ni kaokoroi ika ake a raraoi ni kaki i nanoni b'aene, ao a tetewe nako ake a bubuaka.

⁴⁹ Ao ai arona naba n tokin aonnaba. Ane a na roko anera ao a na kaokoroia akana buakaka ma akana raoiroi,

⁵⁰ ao a na teweia nako ni nnen te ai, ike a na tang ao a tenai riaia iai b'a kaotan ae a rotaki n te maraki ae korakora.

Koaua aika Boou ao Koaua Nikawai

⁵¹ Ao e titirakiniia Iesu b'a atai nanoni baikai ni kabane. A taku nako Ina, “Eng.”

⁵² Ao E taku nako ia, “Ma ngaia aei, b'a te tia koroboki ae reireiaki b'ain Uean te Atua, ai aron te aomata ae iai ana auti, ao te aomata arei e kaotinakoi b'aai aika boou ma b'aai nikawai mani nen ana b'ai.”

E Ribaaki Iesu i Natareta

⁵³ Ao Iesu, ngke E a tia n atongi taeka ni kabotau aikai, ao E kitana ikekei.

⁵⁴ Ao ngke E roko n ana kawa, ao E reireiia aomata i nanoni m'aneabaia, ao a mimi aomata ake a ongora i Rouna ao a taku, “E reke maia iroun Teuaei te rabakau aei ma te kona ni karaoi m'akuri aika kamimii aikai?

⁵⁵ Tiaki natin te kabenta Teuaei? Tiaki aran tinana Nei Maria? Ao tiaki tarina Iakobo, ma Ioteb'a, ma Timon, ma Iuta?

⁵⁶ Ao tiaki m'anena aika raora ni maeka? A reke maia ngkanne iroun Teuaei baikai ni kabane?”

⁵⁷ Ao a ribaia. Ma E taku Iesu nako ia, “Iai karinean te burabeti n taabo nako, ma akea i abana, ao i nanoni mwengana.”

⁵⁸ Ao E aki kabatiai ni karaoi m'akuri aika kamimii iai i bukina ngke a aki onimakinna.