M'akuri 1 - Te B'aib'ara

¹ Teobiro, n te boki are I moa ni koreia ao I taekin iai b'aai ni kabane ake E karaoi Iesu, ma n reirei

² ni karokoa te bong are E uotaki rake iai nako karawa, i mwin tiana n anga ana mwioko iroun te Tamnei are Raoiroi nakoia taan tuatua ake E a tia n rineia.

³ I nanon abwi te bong i mwini matena ao E kaoti nakoia n aaro aika a na aki nanokokoraki iai teutana b'a E a tia ni manga uti. E noraki i rouia n taai aika bati, ao E taekini b'ain uean te Atua nakoia.

⁴ Ao ngke E botaki ma ngaiia, ao E kab'aka ana taeka nakoia ni kaangai, “Kam na aki kitana Ierutarem, ma kam na taninga koron nanon ana taeka n akoi Tamau are kam ongo mairou:

⁵ B'a e b'ab'abetito Ioane n te ran, ma ane kam na b'abetitoaki n te Tamnei are Raoiroi i mwini boong tabebong.”

E Uotaki rake Iesu nako Karawa

⁶ Ma ngaia are, ngke a botaki taan tuatua ma Iesu, ao a titirakinna ni kaangai, “Te UEA, Ko nangi manga kaoka nakoia Iteraera aroia n tautaeka n te tai aei?”

⁷ E taku Iesu nakoia, “Tiaki ami b'ai te atai taian tai nako ma boong ake E bairei te Tama ni m'aakana.

⁸ Ma ane kam na anganaki te m'aaka, ngkana E roko te Tamnei are Raoiroi i aomi; ao ane kam na riki b'a taan tataekinai nakoia aomata i Ierutarem ao n taabo nako i Iuta, ao i Taamaria, ao i aonnaba ni kabuta.”

⁹ Ngke E a tia n atongi baikai, n te tai are a tabe n tarataraia iai taan tuatua, ao E uotaki rake; ao a aikoa noria ngke a tukaki mataia n te nang.

¹⁰ Ngke a bon tabe naba n tara rake n tara karawa, ngke E nako Iesu, ao noria, a tei i rarikiia uoman te aomata aika kunnikaiia ni kunnikai aika mainaina;

¹¹ ao a taku, “Mm'aane aika I-Kariraia, kam aera ngkai kam tei n tara rake nako karawa? Iesu aei, are uotaki rake mai roumi nako karawa, E na manga nako mai n te aro ae ti te bo naba ma aron ae kam noria iai ngkai, ngkae E nako karawa.”

Rinean Oneani Mwin Iuta Itekariota

¹² A okira ngkanne Ierutarem taan tuatua man te maunga are Oriweta. E kaan te maunga aei ma Ierutarem, b'a tao te iterana te maire raroana mai iai.

¹³ Ao ngke a rin i Ierutarem, ao a nako n te ru are i eta, are a kabongana b'a neia ni maeka n te tai ae aki maan Betero, ma Ioane, Iakobo, Anterea, Biribo, Toma, B'aretorom'aio, Mataio ma Iakobo are natin Areb'aio, ma Timon are te Terote, ao Iuta are tarin Iakobo.

¹⁴ A aki toki uakekei ni kabaneia ni kakaonimaki ni bobotaki n tatataro, ma aine, ma Nei Maria are tinan Iesu, ma tarin nako Iesu.

¹⁵ N te bong teuana ao e teirake Betero i buakoia taari akekei, ae tao tebubua ma uangaun m'aitiia ake a botaki ao e taku,

¹⁶ “Mm'aane, taari, e riai kakoroan nanon te taeka are n te B'aib'ara are E atongnga ngkoa te Tamnei are Raoiroi ni wiin Tawita, are taekan Iuta, are kairiia ake a taua Iesu.

¹⁷ B'a e warekaki Iuta i buakora, ao e reke tib'angana n te nakoa aei.”

¹⁸ E kaboa te aba teuana Iuta n te m'ane are e karekea i bukin ana m'akuri are buakaka. Ngke e b'aka n unika atuna ao e tabwena rab'atana mai nuuka, ao a nna nako kanoan nanona.

¹⁹ E ataaki te baerei irouia aomata ni kabaneia ake a maeka i Ierutarem, ma ngaia are a arana te aba arei n aia taeka b'a Akeritama, ae nanona, “Te aba n raraa.”

²⁰ B'a e koreaki n te boki are Taian Areru ae kaangai, “Ke e kitanaki nena ni maeka, Ao ke e aki maeka iai temanna.” Ma e kangai naba, “Ke e anaa nakoana temanna.”

²¹ Ma ngaia aei, e riai temanna n riki b'a raora n tataekina Iesu b'a E a manga uti. E na rineaki mai buakoia aomata aika iriri ma ngaira n taai ake E mena i buakora iai te UEA are Iesu,

²² man te tai are e b'ab'abetito iai Ioane ni karokoa te bong are E uotaki rake iai Iesu mai roura.

²³ Ao a kaoti araia aomata aika uoman, b'a Ioteb'a are aranaki b'a Baretaba, are arana teuana Ioutito, ao Matia.

²⁴ Ao a tataro ni kaangai, “Te UEA, ae Ko atai nanoia aomata, Ko na kaotia b'a antai ae Ko rineia n uake uoman aikai,

²⁵ b'a e na bonota mwin Iuta n te m'akuri aei ao n nakoan te tia tuatua, are e kitanna, n nako n are boni nena.”

²⁶ Ao a kakaaea n te aro ni kaiwa b'a antai ae na rineaki i rouia, ao e reke b'a Matia; ao e warekaki b'a raoia taan tuatua ake tengauni ma temanna.