Karikani B'aai 8 - Te B'aib'ara

Tokin te Ieka

¹ Ao te Atua, e aki m'aninga taekan Nooa ma maan aika kawakawa ni kabane ake raona i nanon te kaibuke; E karokoa te ang ae korakora, ao e a tabe n ikinako te ran.

² A in kawain raan n tiinako ake i aan te aba, ao a bono mataroan raan ake i karawa.

³ E toki te karau, ao e tabe n ikirikaaki te ran i nanon 150 te bong.

⁴ Ao ni katebwi ma itiuan bongin te nam'akaina, ao e a koro te kaibuke i aon taubukin taiani maunga ake i Ararata.

⁵ E tabe n ikinako iabutin te ran, ao a oti taiani maunga ni moanibongin te katebwina n nam'akaina.

⁶ Ao i mwiin abwi te bong, ao e a kauka te winto Nooa,

⁷ ao e kakibanakoa te mannikiba are te reeben. E aki oki rikaaki ma e a bon kibakiba naba ni karokoa banen raoi te ran n ikinako.

⁸ Ao i mwiina riki, e a manga kakibanakoa te taobe Nooa b'a e na tuoa ikinakon te ran iai,

⁹ ao e a aki reke nnen te taobe n tiku i bukina ngke e bon iabuti naba aon te aba. E kiba n okira te kaibuke, ao e kaotinakoa baina Nooa n anaia ni karinna.

¹⁰ Ao e a manga tataninga riki itiua te bong, ao e a manga kakibanakoa riki te taobe.

¹¹ E okira Nooa ngke e a bong, ao e uota baan te oriwa i wiina, ma ngaia are, e ataia Nooa b'a e a ikinako te ran mai aon te aba.

¹² Ao e a manga tataninga riki i nanon itiua riki te bong, ao e a manga kanakoa riki te taobe naba arei; ao n te tai aei, e a aki okirikaaki.

¹³ Ngke ai 601 ana ririki ni maiu Nooa, ni moanibongin te moan nam'akaina, ao e a bane raoi te ran n ikinako mai aon te aba. E a kanakoa taubukin autin te kaibuke Nooa, ao e taratara nako, ao e nooria b'a e a m'au aon te aba.

¹⁴ Ao ni kauabwi ma itiuan bongin te kauoua n nam'akaina, ao e a boni m'au raoi iai te aonnaba.

¹⁵ Ao E taku te Atua nakon Nooa, “Otinako man te kaibuke ngkoe ma buum,

¹⁶ ao natim mm'aane ma buuia naba.

¹⁷ Kairiia mannikiba ni kabane, ao maan aika kawakawa ni kabane n otinako ma ngaiia, b'a aonga ni manga kariki ma ni kaona te aonnaba.”

¹⁸ Ma ngaia are, e otinako Nooa man te kaibuke ma buuna, ao natina mm'aane ma buuia naba,

¹⁹ ao a bane n otinako n utuia nako maan ma mannikiba man te kaibuke.

Ana Berita te Atua

²⁰ Ao e karaoa te baonikarea Nooa i bukin te UEA, ao e anaa kakatemanna te man ae kawakawa mai buakoia maan aika kawakawa ake a itiaki, ao mani mannikiba naba ake a itiaki, ao e kabuoki ni kab'anini b'a taiani karea i aon te baonikarea.

²¹ E kakukureia te Atua boiararan te karea aei, ao E taku te UEA i boni nanona, “N na bon aki manga karokoa te rekenikai n te aonnaba i bukin aia m'akuri aomata, b'a bon anuani maiuia karaoan te bure ma ngke a moan rikirake. N na bon aki manga kamaunai b'aai aika maiu ni kabane n aron ae I a tia ni karaoia n te tai aei.

²² Ngkai e a riki te aonnaba, ao e na riai n iai taai n ununiki, ao taai n tai. E na teimatoa te m'aitoro, ao te kabuebue, te aumaiaki ma te aumeaang, te ngaina ma te bong.”