Karikani B'aai 49 - Te B'aib'ara

Ana kabanea n taeka Iakob'a

¹ Ao e weteia natina mm'aane Iakob'a ao e taku, “Katobibiai, b'a N na tuangngkami te b'ai ae a na riki ni boong aika a na roko:

² “Booti ngkami, ao kakauongo natiu mm'aane. Ongora iroun tamami ae Iteraera.

³ “Reuben ae au karimoa, boni ngkoe korakorau Moan natiu i nanon au bong n rorobuaka, Te kabanea ni kakatonga ma ni korakora i buakoia natiu mm'aane.

⁴ Kanga ai aron te raanga n ran ae buriti airana ngkoe, Ma ko na aki rangi ni kakannato, B'a ko matu ma buu ni kewe Ko bon aki karinea ana kainiwene tamam.

⁵ “Bon taari Timeon ma Rewi. A kamanenai aia b'ai ni buaka ni karaoa te m'akuri n tiritiri iai.

⁶ N na bon aki rin i nanon aia taetae ni karaba, N na aki reitaki ma ngaiia n aia kakabowi, B'a a tiringiia aomata ni marakin nanoia ao a katoaraaia taian kao i bukin aia takakaro.

⁷ E na mena te maraia i nanon uniia, i bukina ngkai a rangi n tiritiri, ao i aon naba bonon nanoia, i bukina ngkai a rangi ni bee. N na kakionakoia mai aon abaia Iteraera. N na kauamaaeia i buakoia kaain aia kaainga.

⁸ “Iuta, a na neboiko tarim. Ko tauia am kairiribai mai roroaia. A na bobaraaki tarim i matam.

⁹ Bon te raian ngkoe Iuta, E tiringiia konana, ao e uotia nakon b'angana, E aroria ni wene. Bon akea ae kona n aki karaua.

¹⁰ E na taua te oko ni uea Iuta i nanon baina, Ao a na teimatoa n tautaeka kanoana. A na anga te m'ane botannaomata nako ina Ma ni bobaraaki, ao n ongotaeka i rouna.

¹¹ E rooa ana aati te teei n te kureebe, Te kureebe ae rangi n raraoi uaana. E uati ana kunnikai n te wain. E uatiia kunnikaina n te wain ae uraura n raraa.

¹² A uraura matana b'a mwiin te mooi wain, A mainaina wiina b'a mwiin te mooi miriki.

¹³ “E na maeka Teburun i rarikin taari. E na riki mataniwin taari are i abana b'a aia matabaiawa kaibuke. E na rokoroko tian abana i Titon.

¹⁴ “Bon te aati ae korakora Itaakara ae wene i aan uotana ake i aon akuuna.

¹⁵ Ma e nooria b'a e raoiroi te tabo arei Ao e nooria naba b'a e kakukurei te aba arei. Ma ngaia are, e a manga kab'aoua nuukana ni uoti uotana akekei Ao ni kairoroaki ni m'akuri b'a te toro.

¹⁶ “E na riki Taan b'a te tia tautaekaniia ana aomata. A na riki b'a aekakiia barongan Iteraera ake tabeua.

¹⁷ E na riki Taan b'a te naeta i rarikin te kawai, Te naeta ae rang ni boitin i rarikin te kawai, Are e tenai waeia taian aoti, B'a a aonga ni b'aka rikaaki taan toka i aoia.

¹⁸ “I tataningaa am m'akuri ni kamaiu te UEA.

¹⁹ “E na buakanaki Kaata i rouia koraki aika taani kimoa, Ma e na rairakiia ni kakioia.

²⁰ “E na katauraoa te am'arake aban Atera. E na katauraoi am'arake aika a tau i bukin te uea.

²¹ “Bon te ria te aine Nabetari ae taekin taeka aika raraoi.

²² “Kaanga ai aron m'angan te aroka Ioteb'a ae bati uaana, Te m'aanga n aroka ae tei i rarikin te karaanga n ran; aika a rabuna aon te o m'angana.

²³ A buakanna ana kairiribai n te aro ae moan te kamaamate, Ao a kakioa ma aia kainikatebe ma aia kanoanikatebe.

²⁴ Ma e bon tiku n ariraki ana kainikatebe ma ana kanoanikatebe. Ao a kakorakoraaki angan baina Ni m'aakan te Atua ae Moan te M'aaka, ae Atuan Iakob'a, Ae te Tia kawakin tiibu, ae te Tia kawakina Iteraera.

²⁵ Bon Atuan tamami ae buokingkami, Te Atua ae Moan te M'aaka ae kakab'aiaingkami N te karau mai eta ao te ran mai aan te aba, Ao taiani kakab'aia aika kao ma ataei aika m'aiti,

²⁶ Taian kakab'aia aika uita ma ueen kaai, Taian kakab'aia aika maunga ake mangkoa, B'aai aika kakukurei man taian tabuki ake akea tokiia. A bia mena taian kakab'aia aikai i aon atuun Ioteb'a, I aon ram'an te aomata ae raure nako ma tarina nako.

²⁷ “Beniamin kaanga ai aron te kameanti ae unun. E tiritiri ma ni kaakang n te ingabong ma te tairiki.”

²⁸ Ao aikai barongan Iteraera ake tengaun ma uoman, ao ana taeka tamaia are e taekin n ana taeka ni karaure aika tamaroa nako ia natina mm'aane n tatabemaniia nako.

²⁹ Ao e tuangiia natina Iakob'a ni kaangai, “Ngkai, N nang raoniia au koraki ake n te mate, taunai ma tamau n te b'angani matang are n ana tawaana Eberon are te Itaite,

³⁰ are i Makebera i mainikun Mamre n te aba are Kanaan. E kabooa te b'angani matang aei Aberaam mairoun Eberon b'a ana tabo n taunimate.

³¹ Ao bon anne te tabo are a tauna iai Aberaam ma buuna are Nei Taara; a tauna naba iai Itaaka ma buuna are Nei Rebeka; ao a tauna naba iai Nei Reea.

³² E kabooaki te tawaana ma te b'angani matang mairouia taian Itaite. Kam na taunai ikekei.”

³³ Ao ngke a bane ana taeka ni mwioko Iakob'a nakoia natina mm'aane, ao e karaua ni wene, ao e mate.