Karikani B'aai 48 - Te B'aib'ara

Kakab'aiakin Eberaim ma Manate iroun Iakob'a

¹ Ao i mwiin tabeua te tai, ao e a tuangaki Ioteb'a b'a e a aoraki tamana. Ma ngaia are, e kairiia natina mm'aane ake uoman ake Manate ao Eberaim, ao a nako ni kawara Iakob'a.

² Ao ngke e ongo Iakob'a b'a e a roko natina are Ioteb'a b'a e na nooria, ao e kataia n tekateka i aon ana kainiwene.

³ Ao e taku Iakob'a nakon Ioteb'a, “E kaoti te Atua ae m'aaka nako iu i Ruti n te aba are Kanaan, ao E kakab'aiaai,

⁴ ao E taku nako iu, ‘N na anganiko am kariki aika m'aiti, ao a na riki b'a au botannaomata; N na anga te aba aei nako ia am kariki b'a abaia n aki toki.’ ”

⁵ Ao e reitanako ana taeka Iakob'a ao e taku, “Ioteb'a, au b'ai natim mm'aane ake uoman ake a bungiaki i Aikubita i m'aain rokou; ake Eberaim ao Manate. A na riki b'a kaanga ai aroia natiu mm'aane ake Reuben ao Timeon.

⁶ Ngkana a manga riki natim mm'aane ake uoman, ao a na aki atongaki b'a au b'ai; a na ti b'aib'ai i mwiiu ake a riki mairouia Eberaim ao Manate.

⁷ I karaoa aei i bukin tinam are Nei Rakera. I rangi n rawaawata ngke e mate n te aba are Kanaan, ni uakaan ma Eberata, ngke I tabe n oki mai Metobotamia. Ao I a taunna i rarikin te kawai nako Eberata.”

⁸ Ao ngke e nooriia natin Ioteb'a mm'aane Iakob'a, ao e taku, “Antai ataei ni mm'aane aikai?”

⁹ Ao e taku Ioteb'a, “Ao aikai natiu mm'aane aika E anganai te Atua i Aikubita ikai.” Ao e taku Iakob'a, “Uotiia mai nako iu b'a I aonga ni kakab'aiaia.”

¹⁰ Ao e aki rangi n noraaba matan Iakob'a b'a e a rangi ni kara, ao e a aki kona n taratara raoi. Ao e uotiia ana ataei ni mm'aane Ioteb'a, ao e rab'atiia ma ni kiiti ma ngaiia.

¹¹ Ao e taku Iakob'a nakon Ioteb'a, “I aki kantaningaia b'a N na manga nooringkami riki, ao ngkai, E a tia te Atua ni karekea au tai n nooriia natim.”

¹² Ao i mwiina, e anaia natina Ioteb'a mai aon waen Iakob'a, ao e bobaraaki i matana ni kabooa matana ma aontano.

¹³ E kaaki Eberaim Ioteb'a i angamaingin Iakob'a, ao Manate mai ataina.

¹⁴ Ma e kaaibibitii baina Iakob'a ni katokaa baina are te atai i aon atun Eberaim, e ngae ngke te karimwi, ao baina are te atai i aon atun Manate are te karimoa.

¹⁵ Ao i mwiin anne, ao e a kakab'aiaa Ioteb'a, “E bia kakab'aiaia ataei ni mm'aane aikai te Atua are a toro i rouna tamau ake Aberaam ao Itaaka. E bia kakab'aiaia te Atua are E a tia ni kairai nakon te bong aio.

¹⁶ E bia kakab'aiaia te anera are e kamaiuai man taian kangaanga ni kabane. E bia maiu arau ma aran Aberaam, ao Itaaka i nanoia ataei ni mm'aane aikai. A bia m'aiti natiia, ma aia kariki.”

¹⁷ Ao e b'ara nanon Ioteb'a ngke e noora tamana ni katokaa baina are te atai i aon atun Eberaim, ma ngaia are, e anaa bain tamana ni kam'aingnga mai atun Eberaim nakon atun Manate.

¹⁸ Ao e taku nakon tamana, “Tiaki arona anne tamau. Aio te karimoa, katokaa baim ane te atai i aon atuna.”

¹⁹ Ao e rawa tamana, ao e taku, “I ataia, I bon ataia. E na boni m'aiti naba kanoan Manate, ao e na riki naba b'a te botannaomata ae korakora. Ma e na korakora riki te bina aei nakoina, ao e na riki kanoana b'a te botannaomata ae korakora.”

²⁰ Ao e kakab'aiaia n te bong arei, ao e taku, “A na atoatongaki arami i rouia aomatan Iteraera ngkana a kakab'aiaa temanna. A na kaangai, E bia karikingkami te Atua kaanga Eberaim ma Manate.” Ao e karimoaa Eberaim Iakob'a i m'aain Manate.

²¹ Ao e taku Iakob'a nakon Ioteb'a, “N aron ae kam nooria, ao e a kaan mateu, ma E na memena iroum te Atua ma ni manga kaokiko rikaaki nako abaia am bakatibu.

²² I anga Tekem nako imi, ao tiaki nako ia tarim, are te tabo ae maiu reirei are I anaia ngkoa mairouia taian Amoraite n Au kabaang, ao Au kainikatebe.”