Karikani B'aai 44 - Te B'aib'ara

Te m'angko ae bua

¹ Ao e taku Ioteb'a nakon ana toro ake a tararuaa ana auti, “Kanoai aia baeki mm'aane aikai n te am'arake n tokin ane a boni kona n uotia, ao kaoki aia m'ane nako matan aia baeki.

² Ao karina au m'angko i nanon ana baeki teuare te bina, n ikotaki naba ma ana m'ane are boon ana uita.” Ao e karaoa aron are e tuangaki te toro arei.

³ Ao ngke e a tib'a ingabong, ao a m'ananga nako taari akekei ma aia aati.

⁴ Ao ngke a tib'a raroa teutana man te kaawa, ao e taku Ioteb'a nakon ana toro are e tararuaa ana auti, “Kawaekoako rimwiia mm'aane akekei. Ngkana a reke iroum, ao tuangiia b'a e aera ngkai a karaoa te m'akuri ae e buakaka ni kabooan te m'akuri ae e raoiroi?

⁵ E aera ngkai kam iraea te m'angko te tirewa are ana m'angko au toka? B'a tiaki ti ana m'angko ni mooi ma bon ana b'ai naba ni kaiwani kanoan taai aika a na roko? Kam a tia ni karaoa te bure ae moan te buakaka.”

⁶ Ao ngke e roko te toro arei irouia, ao e a taekin taeka aikai nakoia.

⁷ Ao a taku, “Nao, tera ae ko nanonna ngkai ko taetae n aron anne? Ti boni berita b'a bon akea te b'ai ae ti a tia ni karaoia n aron anne.

⁸ Kam a bon tia n norira b'a ti a manga kaoki mm'aane ake ti noori i matan ara baeki, ngke ti a roko n te aba are Kanaan. Ao ti nang kangaa riki n iraea te tirewa, ke te koora man ana auti am toka?

⁹ Nao, ngkana arona b'a iai mai buakora ae a kuneaki baikanne i rouna, ao e na tiringaki, ao ngaira aika nikirana ti na bane n riki b'a am toro.”

¹⁰ Ao e taku te toro arei, “I kukurei n anne, ma bon ti teuane e kuneaki i rouna te m'angko ae e na riki b'a au toro, ao nikirana a na bane n inaomata n nako.”

¹¹ Ma ngaia are, a kawaekoaia ni karuoi aia baeki nako aontano, ao a bane ni kauki.

¹² Ao e karaua ni kakae raoi ana toro Ioteb'a ni moa mairoun te karimoa ni karokoa te bina, ao e a kuneaki te m'angko n ana baeki Beniamin.

¹³ Ao a raeuai aia kunnikai taari akekei i bukin rawawatan nanoia. A katokai aia b'ai i aon aia aati ma ni manga oki rikaaki nakon te kaawa.

¹⁴ Ao ngke a roko Iuta ma tarina n ana auti Ioteb'a, ao e bon mena Ioteb'a ikekei. Ao a bobaraaki i matana.

¹⁵ Ao e taku Ioteb'a nako ia, “Tera ngkai ae kam a karaoia? Kam bon aki ataia b'a I kona ni kuneingkami n te kaiwa?”

¹⁶ Ao e taku Iuta, “Tera ae ti na kona n taekinna nakoim? Ao tera ae ti na kona ni kauntaekaia? Ti na kanga n taku b'a ti aki bure? E a tia te Atua ni kaotia b'a bon taani bure ngaira.”

¹⁷ Ao e taku Ioteb'a, “Tiaki ngaia anne. I aki kona ni karaoa anne. Bon ti te aomata are e reke i rouna au m'angko ae na riki b'a au toro. Ao ngkami nikirana kam na oki ma te rau nakon tamami.”

Ana onon Iuta i bukin Beniamin

¹⁸ Ao e waerake Iuta nakon Ioteb'a ao e taku, “Taiaoka Nao, kariaia b'a N na inaomata n taetae ma ngkoe. Tai un irou, b'a bon ti te arona ngkoe ma te uea.

¹⁹ Ko titirakiniira ao ko taku, ‘Iai tamami, ao tarimi riki temanna?’

²⁰ Ao ti taku, ‘Eng, iai tamara ae e a kara, ao iai naba tarira ae uarereke, ae e a tib'a bungiaki ngke e a boni kara. E a tia ni mate tarin Beniamin, ao bon ti ngaia ngkai ae e maiu, ao e rangi n tatangiraki iroun tamana.

²¹ Nao, Ko tuangiira b'a ti na kairiia mai b'a ko aonga n nooria,

²² ao ti kaekako b'a e aki kona ni kitana tamana te ataei ni mm'aane, b'a ngkana e kitanna, ao e na mate tamana iai.’

²³ Ao ko taku nako ira, ‘Kam na bon aki kona ni manga roko i matau ni karokoa kam kaira tarimi are uarereke i rarikimi.

²⁴ Ao ngke ti okira tamara, ao ti tuangnga b'aai ake ko taekin.

²⁵ Ao i mwiina, e a manga tuangiira b'a ti na manga nako ni kabooa te am'arake riki teutana.’

²⁶ Ao ti taku nako ina, ‘Ti aki kona n nako; ti na bon aki manga roko i matan te aomata arei ni karokoa e iriira tarira are uarereke. Ti tii kona n nako ngkana e m'ananga naba tarira ane uarereke.’

²⁷ Ao e taku tamara nako ira, ‘Kam bon ataia b'a bon ti uoman natiu mm'aane aika e bungiia Nei Rakera.

²⁸ E a tia ni kiitanai are temanna. E a tia n raebitiaki irouia mannikaakang, ao I bon tuai man nooria man te tai are e kiitanai iai ni karokoa te tai aei.

²⁹ Ao ngkana kam a manga anaa natiu aei ngkai mairou, ao ane N na boni mate n te kangaanga ae kam karaoia nako iu ngkai I a bon aki konab'ai b'a I a kara.’

³⁰ Ao e reitanako ana taetae Iuta ma n taku, ‘Ao ngkai, ngkana I nako n okira tamau ao akea te ataei ni mm'aane anne, ao ni bon te tai naba are e nooria iai b'a akea natina irou, ao e na boni mate.

³¹ E bon rangi n tangira natina anne, ao e na bon mate iai b'a e aki kona ni kaitaraa te rawaawata ngkai e a boni kara.

³² Ao teuana riki, I berita nakon tamau b'a N na anga maiu i bukin te ataei ni mm'aane. I tuangnga b'a ngkana I aki kaoka te ataei ni mm'aane nako ina, ao e na katuaaeai ni karokoa tokin maiu.

³³ Ma ngaia ae, I butiiko Nao, N na tiku ikai b'a am toro n onea mwiin te ataei ni mm'aane aei. Kaokia ma tarina.

³⁴ N na kanga n okira tamau ngkana e aki irai te ataei ni mm'aane? I a bon aki kona moan te kangaanga are e nang roko nakon tamau.”