Karikani B'aai 21 - Te B'aib'ara

Bungiakin Itaaka

¹ E kakab'aiaa Nei Taara te UEA n aron are E a tia n berita iai,

² ao e a bikoukou, ao e bungiia natin Aberaam te mm'aane ngke e a bon kara Aberaam. E bungiaki te tei arei ni bon te tai are e taekinna te UEA b'a e na bungiaki iai.

³ E arana te tei arei Aberaam b'a Itaaka,

⁴ ao ngke ai wanibong ana bong Itaaka i mwiin bungiakina, ao E a koreaki kunin tabonim'anena iroun Aberaam n aron are E a tia ni mwioko iai te Atua.

⁵ Ai tebubua ana ririki ni maiu Aberaam ngke bungiaki Itaaka.

⁶ Ao e taku Nei Taara, “E a tia ni kakukureiai ma ni kangarengareai te Atua. Naake a ongo naba aei, a na ngare naba ma ngai.

⁷ Ao e a manga taku, “Bon akea ae kakoaua b'a e na kona n riki natin Aberaam iroun Nei Taara. Ai maia naba te aro aei, ae I a b'ab'akoa naba natin Aberaam te mm'aane ngkai e a kara.”

⁸ Ao e tabe n rikirake te ataei aei, ao ngke e a roko te tai are e a karaaureaki iai man te mamma, ao e a karaoa te baka ae buubura Aberaam.

Kanakoakin Nei Aka ma Itimaera

⁹ Ao n te bong teuana ao Itimaera are natin Aberaam ma Nei Aka are kaain Aikubita, e takakaro ma natin Nei Taara are arana Itaaka.

¹⁰ Ao e nooriia Nei Taara, ao e taku nakon Aberaam, “Ko na kanakoa te toro aei ma natina, b'a e na aki reke tib'ana tabeua mani kaub'aim, b'a e bon riai natiu te mm'aane ae Itaaka ni b'ain.”

¹¹ Ao e rangi n uruaki iai nanon Aberaam i bukina ngke bon natina naba Itimaera.

¹² Ma E taku te Atua nakon Aberaam, “Ko na tai raraoma iroun te ataei ma Nei Aka are te toro. Karaoa te b'ai ane tuangko Nei Taara, i bukina b'a N na karekeia kanoam iroun Itaaka n aron au berita ngkoa nakoim.

¹³ Ao N na karekeia naba natin Itimaera aika m'aiti, are natin Nei Aka are te toro te aine, b'a aonga n riki b'a te botannaomata ae korakora. Ao bon natim naba te mm'aane ngaia.”

¹⁴ Ao n te moaningabong are n te bong are i mwiina, ao Aberaam e angan Nei Aka tabeua te am'arake, ao te kun ni man ae on n te ran. Ao Aberaam e katokaa te ataei i nukan neierei, ao e a kanakoia. Ao e m'ananga nako neierei n tiotio nako i nanon te Rereua are Beerateb'a.

¹⁵ Ao ngke a bane nimaia te ran, ao e a katuka te ataei i aani kaai tabekai

¹⁶ ao e a tekateka ngaia tao e kaaniia tebubua te miita raroana ma te ataei. Ao e taku i nanona, “I aki kona n taratara natiu ngkana e mate.” Ao e a tekateka n tang ikekei.

¹⁷ Ao E ongo te Atua tangin te ataei arei, ao E a taetae te anera mai karawa nakon Nei Aka, ao e taku, “Tera ae aki rau nanom iai Nei Aka? Tai maaku. E ongo tangin te ataei te Atua.

¹⁸ Teirake, ao naako anaia, ao katoka tangina. N na karekea te botannaomata ae korakora mairouia kanoana.”

¹⁹ Ao e kaureaki matana iroun te Atua, ao e noora te m'anib'a. Ao e nako ni kanoa ana kun ni man are nnen te ran, ao e anga teutana nakon natina te mm'aane arei.

²⁰ Ao E raoraona te ataei arei te Atua i nanon rikirakena. E maeka n Rereuan B'aran, ao e riki ngaia b'a te tia kaeman ae moan te rabakau.

²¹ Ao e karekeaki buuna ae ainen Aikubita iroun tinana.

Te Boraraoi i marenan Aberaam ma Abimereka

²² Ao n te tai aei ao e m'ananga Abimereka ma Bikora are ana mataniwi n ana taanga ni buaka, ao e nakon Aberaam n tuangnga ni kaangai, “E raoningkami te Atua ni b'aai ni kabane akana kam karaoi.

²³ Ma ngaia are, kam na karaoa ami berita ikai i matan te Atua b'a kakoauaan ae kam na bon aki kam'aneai ma au koraki n ataei, ke kanoau rimwi. I a tia ni kakaonimaki nakoim, ma ngaia are, ko na kakaonimaki naba nako iu, ao nakon te aba aei ae ko maeka iai.”

²⁴ Ao e taku Aberaam, “I berita.”

²⁵ Ao e ngureakina te m'anib'a Aberaam are a taua ana toro Abimereka.

²⁶ Ao e taku Abimereka, “I aki ataia b'a antai ae karaoa te b'ai aei. Ko aki kaman tuangai taekana, ao bon ai tib'a au moan tai n ongo taekan anne.”

²⁷ Ao Aberaam, e angan Abimereka taian tiibu ma kao, ao a kaai ni karaoa te boraraoi.

²⁸ Ao e kaokoroia itiman taian tiibu ataei mai buakoia ana nanai,

²⁹ ao e titirakinna Abimereka, ao e taku, “E aera ngkai ko karaoa anne?”

³⁰ Ao e taku Aberaam, “Taiaoka, ma ko na butim'aai tiibu ataei aika itiman aikai, b'a ngkana ko butim'aai, ao ko kakoaua iai b'a bon au m'anib'a te m'anib'a aei.”

³¹ Ao e a aranaki te tabo arei b'a Beerateb'a i bukina ngke a karaoa aia berita ikekei ngaiia ake uoman.

³² Ao ngke a tia ni karaoa aia boraraoi i Beerateb'a, ao a oki Abimereka ma Bikora nako Biritia.

³³ Ao Aberaam, e unika te aroka ae te Tamaritiki i Beerateb'a, ao e taromauria te UEA, ae te Atua ae akea tokina.

³⁴ Ao e maeka Aberaam i Biritia n te tai ae maan.