Karikani B'aai 2 - Te B'aib'ara

¹ Ao a bane n tia ni karikaki karawa ma aonnaba ma kanoaia ni kabane.

² Ao e bane ana m'akuri te Atua n te kaitiua ni bong, ao E toki ni m'akuri iai.

³ E kakab'aiaa te kaitiua ni bong, ao E kaokoroa b'a te bong ni motirawa i bukina ngke E toki ni m'akuri iai.

⁴ Ao anne aron karikan karawa ma aonnaba.

Te Nne n aroka are i Eten

⁵ Ngke E karaoa karawa ma aonnaba te UEA, ae te Atua, ao bon akea taian aroka ma taian koraa aika bwebwerake n te aonnaba i bukina b'a E tuai karokoa te karau te Atua, ao bon akea naba te aomata are e na m'akuriia te tano ma taian aroka,

⁶ ma e waerake te ran mai nano ni kam'aim'aa te tano.

⁷ Ao E buatii taian tano tabeua te UEA ae te Atua man tanon aonnaba, ao E karaoa te mm'aane mai iai; ao E uka te ikeike ni maiu nako b'angab'angan b'airina, ao e a maiu te mm'aane arei.

⁸ Ao E karaoa te nne n aroka i Eten te UEA ae te Atua n taabo ake i mainiku, ao E katuka iai te mm'aane are E karaoia.

⁹ Ao E kariki aekaki n aroka nako ikekei aika tikiraoi b'a a na riki rake ma ni kariki uaa. Ao iai aroka i nuukana, ae te aroka ae anga te maiu, ao te aroka ae anga ataan te raoiroi ma te buakaka.

¹⁰ Ao e raanga te karaanga i Eten n teboka te nne n aroka, ao e a manga raanga nako tinanikun Eten ni bwenauaaki nakon aua te karaanga.

¹¹ Te karaanga are teuana bon Bition, are e raanga i nanon Awira ni kabutaa,

¹² (A kuneaki ikekei taian koora ni koaua, ma baika boiarara, ao atiibu aika kakaawaki).

¹³ Ao te kauoua ni karaanga bon Kion, are e raanga i nanon te aba are Itiobia.

¹⁴ Ao te katenua ni karaanga bon Taaikiriti, are e raanga i mainikun Aturia. Ao te kaaua ni karaanga bon Iuberetiti.

¹⁵ Ao E katuka te mm'aane n te nne n aroka are i Eten te UEA ae te Atua, b'a e na m'akuriia ma n tararuaia.

¹⁶ Ao E tuangnga ni kaangai, “Ko kona n am'arake ni uaanikain te nne n aroka aei ni kabane,

¹⁷ ma ti te aroka are e anga ataan te raoiroi ma te buakaka ae ko na aki kana uaana, ao ngkana ko kanna, ao ko na mate naba n te bong anne.”

¹⁸ Ao E taku te UEA ae te Atua, “E bon aki raoiroi b'a e na maiu te mm'aane n ti ngaia. N na karaoa raona ae e tau.”

¹⁹ Ma ngaia are, E anaa te tano teutana mai aontano, ao E karaoi maan aika kawakawa ma mannikiba ni kabane mai iai. Ao E kairiia ni kabane nakon te mm'aane arei b'a e na nooriia ma ni karekei araia. Ao ai anne ngkanne aron reken araia maan aika kawakawa ni kabaneia aika a maiu.

²⁰ Ma ngaia are, e karekei araia mannikiba ma maan aika kawakawa ni kabane, ma bon akea mai buakoia ae e tau n raona te mm'aane arei.

²¹ Ao te UEA ae te Atua, E karokoa te matu ae korakora i aon te mm'aane, ao ngke e a kironako ni matu, ao e anaa riin kaokaona teaina, ao E a manga bonota mwiina.

²² Ao E karaoa te aine man te ri ni kaokao arei, ao E kaira neierei nakon te mm'aane.

²³ Ao e taku te mm'aane arei, “Ao ngkai bon riini kaokaou, ao irikou; ao e na aranaki b'a te Aine i bukina ngkai e anaaki mairoun te mm'aane.”

²⁴ Ao aei bukina are e kitana iai tamana ma tinana te mm'aane n nim ma buuna, ao a riki n ti teuana.

²⁵ Ao a uaia ni bebeekan te mm'aane ma te aine arei, ao a aki mamaa iai.