Karikani B'aai 16 - Te B'aib'ara

Nei Aka ao Itimaera

¹ Ao e tuai mani karika natin Aberam Nei Tarai are buuna. Ma bon iai ana toro te aine Nei Tarai ae kaain Aikubita ae arana Nei Aka,

² ao e taku nakon Aberam, “E tuukai te UEA man te kariki. E aera ngkai ko aki wene ma au toro te aine? E na mena ngkoa, ao e na reke natiu i rouna.” Ao e kariaia Aberam ana taeka Nei Tarai arei.

³ Ma ngaia are, e anga Nei Aka nakon Aberam b'a buuna ni kewe. (E riki aei i mwiin maekan Aberam i Kanaan i nanon tebwina te ririki.)

⁴ Ao ngke e a tia ni wene Aberam ma Nei Aka, ao e a bikoukou Nei Aka, ao e a rangi ni kamoamoa, ao e a aki kubara Nei Tarai.

⁵ Ao e taku Nei Tarai nakon Aberam, “E bon nako mairoum te b'ai aei ngkai e a manga aki kubarai Nei Aka. I bon anganiko ngkoa, ao ngkai e a ataia b'a e a bikoukou, ao e a aki kubarai. Ke E baairei taekara te UEA b'a antai ae bure mai roura, ngkoe ke ngai.”

⁶ Ao e taku Aberam, “E rangi n tamaroa, bon am toro, ao e mena i aan am babaire; karaoa ane ko bon taku nako ina.” Ao e karaoa ae aki tau Nei Tarai nakon Nei Aka ni karokoa e a biri nako Nei Aka.

⁷ Ao e kaitibo Ana anera te UEA ma Nei Aka n te koburake n ran are n te rereua are n te kawai nako Tiura

⁸ ao E taku, “Nei Aka ae ana toro Nei Tarai, Ko nako mai ia, ao ko na nakea?”

⁹ Ao e taku neierei, “I biri nako mairoun au toka.” Ao e taku te Atua, “Naako okiria, ao bon ongotaeka naba i rouna.”

¹⁰ Ao E a manga taku riki, “N na anganiko kanoam ae moan te m'aiti ae akea temanna ae kona ni warekia.

¹¹ E na riki natim te mm'aane, ao ko na aranna b'a Itimaera, b'a e a tia n ongo tangim te UEA.

¹² Ma e na riki natim ae kaanga maiun te aati ae aki manana, e na kaaitaraia aomata ni kabane, ao e na kaitaraki irouia aomata aika m'aiti. E na aki maeka i buakoia ana koraki.”

¹³ Ao e taku Nei Aka i nanona, “I a kara ao I a noora te UEA, tao E kamaiuai b'a N na taetaekinna!” Ma ngaia are e arana te UEA are E a tia n taetae nakoina b'a, “Te Atua ae matairiki.”

¹⁴ Ao boni ngaia anne bukina are a arana te m'anib'a aomata are i marenan Kateti ma Bereta b'a “Ana M'anib'a Teuare E Maiu ae noorai.”

¹⁵ Ao e riki natin Aberam te mm'aane iroun Nei Aka, ao e aranna b'a Itimaera.

¹⁶ Ao ai 86 ana ririki ni maiu Aberam n te tai anne.