Karikani B'aai 10 - Te B'aib'ara

Kanoaia natin Nooa ake mm'aane

¹ Aikai kanoaia natin Nooa ake mm'aane aika: Tem, Aam, ao Iabeta. A karikiia natiia mm'aane i mwiin te ieka.

² Natin Iabeta mm'aane bon Komera, Makoka, Matai, Iawan, Tubara, Meteka, ao Tirati. Boni ngaiia aia bakatibu aomata ake a ingoanaki araia iai.

³ Kanoan Komera bon kaain taabo aika Atikenati, Rib'ata, ao Tokarema.

⁴ Kanoan Iawan bon kaain taabo ake Eritia, Taretiti, Kubero, ao Roriti;

⁵ Bon ngaiia aia bakatibu aomata ake a maeka i mataniwiin taari, ao i aon taian abam'akoro. Ao aikai kanoan Iabeta, ake a maeka n aia baronga, ao abaia aika kakaokoro. A bon kakaokoro aia taetae n aia m'akoro nako.

⁶ Natin Aam mm'aane---Kuti, Aikubita, Ribia, ao Kanaan---boni ngaiia aia bakatibu botannaomata akana bon kaotaki araia iai.

⁷ Ana kariki Kuti boni ngaiia akana kaain taabo aika Teba, Awira, Tabeta, Raama, ao Tabeteka. Kanoan Raama boni ngaiia kaain taabo aika Tieb'a, ao Tetan.

⁸ Iai natin Kuti te mm'aane ae arana Nimrota, are boni ngaia te moan tia buaka ae korakora n te aonnaba.

⁹ Ao n ana buobuoki te UEA, ao e bon riki ngaia b'a te tia kaeman ae bane arona, ao bon anne bukina are a kakaangai iai aomata, “Ke E karikiko te UEA b'a kaanga ai aron te tia kaeman ae bane arona are Nimrota.”

¹⁰ A reke ngkoa i nanon abana B'aburon, Ereka, ao Akata, a bane ni mena ni katenua i nanon B'aburon.

¹¹ Ao e nako man te aba anne nako Aturia, ao e katei kaawa aika buubura aika Ninewe, Reobota-Ira, Kara,

¹² ao Reten, are e mena i marenan Ninewe ma te kaawa ae buubura are Kara.

¹³ Ana kariki Aikubita boni ngaiia kaain taabo aika Rurim, Anam, Reaba, Nebutu,

¹⁴ Bateru, Katiru, Kirete, are boni ngaiia ake a riki mai iai kaaini Biritia.

¹⁵ Natin Kanaan mm'aane bon Titon are te karimoa, ao Eta are boni ngaiia aia bakatibu aomata akana a bon ingoani araia.

¹⁶ Bon aia bakatibu naba kaain Iebuti, kaain Amora, kaain Kirekata,

¹⁷ kaain Iwa, kaain Areka, kaain Tini,

¹⁸ kaain Arewata, kaain Temara, ao kaain Amata. A uamaae nako barongan Kanaan aika kakaokoro,

¹⁹ ni karokoa e roko tian Kanaan i Titon are nakoiang nako Kera i rarikin Kaata, ao ni waerake naba nako Tootom, Komora, Atema, ao Teboiim i rarikin Ratia.

²⁰ Ao aikai kanoan Am, ake a maeka ni baronga, ao aaba aika kakaokoro, ao a boni kakaokoro aia taetae n aia m'akoro nako.

²¹ Karimoan Iabeta are Tem boni ngaia aia bakatibu kaain Ebera.

²² Natin Tem mm'aane---Eram, Atura, Arebaketiata, Ruuta, ao Aram---boni ngaiia aia bakatibu aomata akana a boni kaotaki araia iai.

²³ A nako mani kanoan Aram Kaain aaba aika Uti, Ura, Ketera, ao Mati.

²⁴ Taman Teera bon Arebaketiata, are taman naba Ebera.

²⁵ Iai natin Ebera uoman mm'aane: aran temanna bon Bereka, i bukina ngke a tib'auaaki aomatan te aonnaba n ana tai ni maiu; ao aran are temanna bon Ioketan.

²⁶ Ana kariki Ioketan boni ngaiia kaain taabo aika Aremotata, Tereba, Ataremaweta, Iera,

²⁷ Atoram, Utara, Rikera,

²⁸ Obara, Abimaera, Tieba,

²⁹ Obira, Awira, ao Iobaba. A bane n nako man kanoan Ioketan.

³⁰ A maeka n te aba are e moa mai Metia ni karokoa Teba n aaba ake a tabukibuki ake i mainiku.

³¹ Ao aikai kanoan Tem ake a maeka ni baronga, ao aaba aika kakaokoro, a kakaokoro aia taetae n aia m'akoro nako.

³² Bon kanoan Nooa aomata aikai ni kabane n aron kateirikiaia n aia botannaomata n te roro teuana ma teuana. I mwiin te ieka, ao a bane n riki botannaomatan te aonnaba mairoun natin Nooa mm'aane.