Karikani B'aai 1 - Te B'aib'ara

Karikan te aomata ma te aonnaba iroun te Atua

¹ Ngke E moana te karikib'ai te Atua, ao E karika moa karawa ma aonnaba,

² ao e tuai karaoaki aon te aonnaba, ao akea te maiu iai. E rabunaki aonnaba n te marawa ae rotongitong ma ni kakamaaku, ao E m'am'akuri Tamnein te Atua i aoni marawa.

³ Ao E taku te Atua, “Ke e riki te oota!” Ao e kaoti te oota.

⁴ Ao E noora te oota arei te Atua b'a e raoiroi, ao E karaurea te oota ma te roo.

⁵ Ao E arana te oota b'a te “Ngaina,” ao te roo b'a te “Tairiki.” E tairiki, ao e ngaina, bon te moa ni bong.

⁶ Ao E a manga taku te Atua, “Ke e riki te raure i marenan taian ran.”

⁷ Ao e koro bukin are E taekinna. Ma ngaia are, a raure nako raan ake i annang ma taari.

⁸ Ao E arana annang b'a “Karawa.” E tairiki, ao e ngaina, bon te kauoua ni bong.

⁹ Ao E taku te Atua, “Ke a bootaki n te tabo ae ti teuana raan ake i aani karawa b'a e aonga n otirake te aba mai iai,” ao e koro bukin are E taekinna.

¹⁰ Ao E arana te tabo ae m'au b'a te “Aba,” ao taari b'a “Marawa.” Ao E nooria te Atua b'a e raoiroi.

¹¹ Ao E a manga taku te Atua, “Ke a bwebwerake taian aroka n aekaia nako i aon te aba, taian aroka aika manguroroo baaia, ma aroka aika uaanikai aika uangingi uaaia, ao aroka naba aika bon taian uaanikai uaaia (aika iai atiia i nanon uaaia).” Ao e kororaoi bukin are E taekinna.

¹² Ma ngaia are, e karikii aekakin aroka nako te aonnaba, ao E nooria te Atua b'a a raoiroi.

¹³ E tairiki ao e ngaina, ao bon te katenua ni bong.

¹⁴ Ao i mwiina, E a manga taku te Atua, “Ke e riki te oota i karawa, ao e na kaokoroa te ngaina ma te tairiki, ao ni kaotii boong, ririki, ao aeka ni bobotaki nako ni moanaki aroia.

¹⁵ A na oota i karawa ni kaota te aonnaba,” ao e koro bukin are E taekinna.

¹⁶ Ao te Atua, E karaoi oota aika uoua aika buubura ake taai ma nam'akaina. E angan taai te taua taekan te ngaina, ao nam'akaina te taua taekan te tairiki, ao E karaoi naba taian itoi.

¹⁷ E katikui i karawa taian oota b'a a na kaotaa te aonnaba,

¹⁸ b'a a na taua taekan te ngaina ma te tairiki, b'a a na kaokoroa te oota ma te roo. Ao E nooria te Atua b'a e raoiroi.

¹⁹ Ao e tairiki, ao e ngaina, ao bon te kaaua ni bong.

²⁰ Ao E a manga taku te Atua, “Ke e kaonaki taari ni maan aika maiu n aekaia nako, ao ke e kaonaki annang n taiani mannikiba.”

²¹ Ao E kariki manin marawa aika kakamaaku te Atua, ma aekaki ni man nako aika maiu i taari, ao aekaki ni mannikiba nako. Ao E nooria te Atua b'a a raoiroi.

²² E kakab'aiaia, ao E tuangiia maan ake a maiu i taari b'a a na kaona marawa, ao E tuangiia naba mannikiba b'a a na kam'aitiia.

²³ E tairiki, ao e ngaina ao bon te kanimaua ni bong.

²⁴ Ao i mwiin tabeua te tai, E a manga taku te Atua, “Ke e kariki aekaki ni maan aika kawakawa nako aika ikeike i aonnaba, maan ni kawakawa aika manana, ma aika aki manana aika buubura, ma aika uarereke.” Ao e koro bukin are E taekinna.

²⁵ Ma ngaia are, E karaoia ni kabane te Atua, ao E nooria b'a e raoiroi.

²⁶ Ao i mwiin arei, ao E a manga taku te Atua, “Ao ngkai ti nang karaoia aomata; a na riki b'a aekakira. A na tautaekaniia ika, mannikiba ma maan ni kabane aika manana ma aika aki manana aika buubura ma aika uarereke.

²⁷ Ao E karaoia aomata te Atua. E karaoia b'a katotongana, E karikia b'a te mm'aane ao te aine,

²⁸ ao E kakab'aiaia, ao E taku, “Karikiia natimi aika m'aiti, b'a a aonga ni kaona te aonnaba kanoami ma n taua taekan te aonnaba. I anganingkami te tautaeka i aoia ika, mannikiba, ma maan ni kabane aika aki manana.”

²⁹ Ao E taku te Atua, “Nooria, I a tia n anganingkami kaai n am'arake n aekaia nako i aon te aba aika kaai aika uangingi uaaia n aroia nako, ao kaai aika taiani uaanikai.

³⁰ Ao I a tia naba n anga taian aroka aika mawaawa b'a kanaia maan aika kawakawa aika korakora i aon te aba ma mannikiba ni kabane i aan nang, ma maan ni kabane ake iai te ikeike ni maiu i rouia.” Ao e koro bukin are E taekinna.

³¹ Ao E noori b'aai ni kabane te Atua ake E a tia ni kariki, b'a a raoiroi. E tairiki, ao e ngaina ao bon te kaonoua ni bong.