I-Rom 10 - Te B'aib'ara

¹ Taari, aio ae tangiraki i nanou ao au tataro nakon te Atua i bukiia Iteraera, b'a a na kamaiuaki.

² B'a I kakoauaia ae a babane nanoia nakon te Atua, ma akea aia atatai

³ b'a a aki ata te aro are e na kaetaki iai aroia n reitaki ma te Atua, ao a kataia ni karaoa te aro are e na reke iai i rouia; ao aroia aei e a oti iai b'a a rawa n are E a tia te Atua ni karaoia i bukiia.

⁴ B'a Kristo E a tia ni katoka bonganan te Tua i bukiia ake a reke i rouia kaetan aroia n reitaki ma te Atua n aia onimaki.

A Kona ni Kamaiuaki Aomata ni Kabaneia

⁵ Ao aei are e koreia Mote b'a taekani kaetan aron te aomata n reitaki ma te Atua n iran nanon te Tua: “Te aomata ane karaoi baikai, ao e na maiu.”

⁶ Ma aomata ake a reke kaetan aroia n reitaki ma te Atua n te onimaki a aki kona n titiraki ni kaangai, “Antai ae na rierake nako karawa?” (Ae nanona, b'a antai ae na kaira ri kaaki Kristo nako ira).

⁷ “Ao antai ae na ruo nako moone?” (ae nanona, b'a antai ae na kaira rake Kristo mai buakoia maate).

⁸ Ma aei taekana n te B'aib'ara: “E rangi ni kaan te taeka nako im, b'a ane i wiim ke i nanom.” Boni ngaia taekan te onimaki are ti tataekinna.

⁹ B'a ngkana ko taekina Iesu ni wiim b'a te UEA ao ko onimaki i nanom b'a E a manga uti iroun te Atua mai buakoia maate, ao ko na kamaiuaki.

¹⁰ B'a e onimaki te aomata i nanona ao e reke i rouna kaetan arona n reitaki ma te Atua; e tataekina ana onimaki ni wina ao e kamaiuaki.

¹¹ B'a e kaangai te B'aib'ara, “Ane onimakinna ao e na aki kamaamaeaki.”

¹² Te taeka aei bon i bukiia aomata ni kabaneia: b'a akea kaokoron te I-Iutaia ma te I-Erene, b'a ti temanna aia UEA aomata ni kabaneia, ae E kabatiai kab'aiaia aomata nako ake a butiia buokaia;

¹³ b'a ane taboa aran te UEA ao e na kamaiuaki.

¹⁴ Ao a na kanga ni wetea aran Teuare a aki onimakinna? Ao a na kanga n onimakinna ngkana a tuai n ongo taekana? Ao a na kanga n ongo ngkana akea te tia taekinna?

¹⁵ Ao a na kanga n tataekinna ngkana a aki kanakoaki? N ai aron are koreaki ni kaangai, “Ai tamaroa ra waeia ake a roko n uoti rongorongoni baika raraoi!”

¹⁶ Ma a aki bane aomata n ira nanon te euangkerio. B'a e kaangai Itaia, “Te UEA, antai ae onimakina ara rongorongo?”

¹⁷ Ma ngaia ae e reke te onimaki man te ongora n te rongorongo, ao te ongora n te rongorongo e reke man tataekinani Kristo.

¹⁸ Ma I taku, A tuai n ongo Iteraera? A bon tia-n ai aron taekana are kaangai: “E oti nako b'anaaia ni kabuta aonnaba ni kabane, Ao a nako aia taeka nako tabon aonnaba.”

¹⁹ I a manga titiraki riki ni kaangai, A aki ataia Iteraera? Aio moa ana taeka Mote: “N na kabakantangingkami i rouia ake tiaki oi ni botannaomata, Ao N na kauningkami iroun te botannaomata ae a nanobaba kaaina.”

²⁰ Ao e taetae Itaia n aki maku, ngke e taekina ana taeka te UEA are e kaangai: “I a reke irouia akana aki ukoukorai; I kaotai nakoia akana aki titiraki taekau.”

²¹ Ma aikai ana taeka, aika ana taeka te UEA i bukiia Iteraera: “I aroarori baiu ni kabongnga nakon te botannaomata ae aki ongeaba irou, ao e katei nako iu.”