I-Korote 1 - Te B'aib'ara

Taeka ni Kamauri

¹ Mairouni B'auro, ae ana tia tuatua Kristo Iesu n nanon te Atua, ao mairoun Timoteo ae tarira,

² nakoia ake a itiaki i Korote, ake taari aika kakaonimaki n aroia n irira Kristo:

Ana Katituaraoi B'auro i bukiia Kristian i Korote

³ Ti aki toki ni katituaraoa te Atua ae Taman ara UEA are Iesu Kristo n ara tataro i bukimi,

⁴ ngkai ti ongo taekan onimakinani Kristo Iesu i roumi, ma tangiraia ake a itiaki ni kabaneia i roumi,

⁵ i bukin te kaantaninga are e kamenaki i m'aimi i karawa; are kam ongo taekana ngke kam moa n onimakina taekan te koaua, ae bon te euangkerio,

⁶ are roko i roumi ao i aonnaba ni kabane: ao e kariki uaa ma n riki rake naba i nanomi man te bong are kam ongo taekana iai, ao n ata raoi ana akoi te Atua n arona ni koaua.

⁷ N ai aron are kam reireiaki iai iroun Eb'abera are raora ni m'akuri ae tangiraki, ae ana tia m'akuri Kristo ae kakaonimaki, ae onei mwira ni m'akuri.

⁸ Boni ngaia naba are kaota nako ira aron ami tangira are kam anganaki iroun te Tamnei.

Antai Kristo ao Tera ana M'akuri

⁹ Ma ngaia ae ti aki toki naba n tataro i bukimi, man te tai are ti ongo iai taekami, ao ti aki toki ni butia te Atua b'a kam na kaonaki n ataakin nanona, ao n te rabakau ma te ataib'ai ni kabanea are mairoun te Tamnei,

¹⁰ b'a kam aonga ni karaoi baika boraoi ma nanon te UEA, aika E na kukurei iai, n aromi ni karaoi m'akuri nako aika raraoi; ao b'a kam aonga n ata riki aron te Atua,

¹¹ ngkai kam kakorakoraki n te kakorakora ni kabanea, are nako mani m'aakana ae kamimii, b'a e aonga n reke i roumi te nanom'aka ni kabanea ma te taotaonaki n nano ma te kim'areirei;

¹² ao b'a kam na katituaraoa te Tama, are karaoingkami b'a kam na tau ni karekea tib'angami n te baere E a tia ni kawakinna te Atua b'a aia b'ai ana aomata aika itiaki ake n te oota.

¹³ E a tia ni kamaiura mani m'aakan te roo, ao E uotiira nako aan ana tautaeka Natina are tangiraki;

¹⁴ are e reke mai Rouna kainaomatakira, ae nanona, b'a a kab'araki ara bure.

¹⁵ Kristo boni katotongan te Atua ae aki nonoraki, ao bon te moa n Nati ae kakannato i aoni b'aai ni kabane aika karikaki.

¹⁶ B'a a karikaki b'aai ni kabane mai Rouna, ake i karawa ma ake i aon te aba ake a noraki ma ake aki noraki, ma baika iai m'akaia ma aroia n tautaeka; a bane ni karikaki mai Rouna, ao i bukina.

¹⁷ Iai Ngaia i m'aini b'aai ni kabane, ao a nako raoi aroni b'aai ni kabane n reitaki i Rouna.

¹⁸ Ao Ngaia bon atun te rab'ata, ae te ekaretia; Ngaia ae reke mai Rouna maiun te ekaretia, ao te moa n Nati ni kamaiuaki man te mate, b'a e aonga ni moanibaan te kakannato i aoni b'aai ni kabane.

¹⁹ B'a boni man nanon te Atua ae e reke iai iroun te Nati aron te Atua ni kabane;

²⁰ ao bon nanona naba b'a E na raoiakini b'aai ni kabane nako Ina i Rouna, aika i aon te aba ma ake i karawa; ao E karaoa aei ni maten Natina i aon te kaibangaki.

²¹ Ao ngkami, kam raroa nako ngkoa mairoun te Atua, ao kam ribaia i nanomi i bukin ami m'akuri aika bubuaka;

²² ma ngkai, E raoiakiningkami n rab'atan natina ni matena, b'a E aonga ni kaakingkami i matana b'a aomata aika itiaki aika akea aia kairua ma kabuakakaia.

²³ Ma kam bon riai ni matoatoa ma n nene n ami onimaki, ao kam na aki kam'aingaki man te kaantaninga are reke i roumi ngke kam ongo taekan te euangkerio; are e tataekinaki nakoia aomata ni kabaneia i aonnaba ni kabuta ao are I riki iai, ngai ae B'auro, b'a te tia m'akuri i bukina.

Ana M'akuri B'auro i bukin te Ekaretia

²⁴ I kim'areirei ngkai ni marakiu i bukimi, b'a I a kona ni kakororaoa iai marakin Kristo ni marakin rab'atau i bukin rab'atana, ae te ekaretia;

²⁵ are I riki iai b'a te tia m'akuri n ai aron te nakoa are I anganaki mairoun te Atua i bukimi, b'a N na kabanea ana taeka te Atua n taekin,

²⁶ are te baere raba, are karabaki ma ngkoangkoa ao mairouia rooro nako; ma ngkai, e a kaotaki nakoia ana aomata aika itiaki.

²⁷ E karaoa aei te Atua b'a E tangiringkami aika tiaki I-Iutaia b'a kam na ata te baere raba ae kamimii ae mimitong; ao te bae raba aei boni Kristo i nanomi, are Ngaia ami kaantaninga b'a e na reke neboami.

²⁸ Boni ngaia are ti tataekinna, n tuatuangia aomata ni kabaneia ma n reireiia n te rabakau ni kabane, b'a ti aonga ni kaotiia aomata ni kabaneia b'a a ikawai ni maiuia n reitaki ma Kristo;

²⁹ ao anne bukin ae I kekeiaki m'aaka naba ni m'akuri, ao I kamanena te korakora ae bati are E anganai Kristo, ao ae e m'am'akuri i nanou.