I-Karatia 5 - Te B'aib'ara

¹ B'a E kainaomataira Kristo i bukin te aro n inaomata; ma ngaia ae kam na teimatoa, ao kam na tai manga bae i aan te amo n toronaki.

Te Inaomata ni Kristian

² Noria, I taku nakoimi ngai ae B'auro, b'a ngkana kam korotabonim'aneaki, ao akea manenani Kristo iroumi.

³ Ao N na taekinna riki nakoia aomata ni kabaneia aika korotabonim'aneaki, b'a a kabaeaki b'a a na toua mwin te Tua ni kabanea.

⁴ Kam a raure ma Kristo, ngkami aika kam taku b'a e reke reitakimi ma te Atua n te Tua; kam b'aka man te akoaki.

⁵ B'a a ingainga nanora ni kakariaria reken reitakira ma te Atua; ao ti kaantaninga aei b'a e na karaoaki ri nanon ara onimaki ni m'aakan te Tamnei.

⁶ B'a akea i nanoni Kristo Iesu manenan te korotabonim'aneaki ke te aki korotabonim'aneaki; ma e manena te onimaki are e oti arona n te m'akuri ae iai te tangira iai.

⁷ Kam nako raoi ngkoa; antai ane tukingkami b'a kam na aki ira nanon te koaua?

⁸ Tiaki mairoun Teuare weteingkami te aro n anai nano anne.

⁹ E kaangai te taeka, “Te iiti ae ti teutana e kona ni karikirakea te buraawa ae na karikaki.”

¹⁰ Ngkai I uaia n reitaki ma ngkami i nanon te UEA, ao I aki nanokokoraki b'a kam na bon aki b'aina te iango ae kaokoro. Ma te aomata are aki karaungkami, b'a antai ngaia, e na karawaawataaki ni motikan taekana.

¹¹ Ma ngaia aei, taari, ngkana I bon tabe naba n tataekina te korotabonimm'aane b'a e riai, ao e aera ngkai I teimatoa ni b'ainikirinaki? Ma ngkana I tuangiia aomata b'a a na korotabonim'aneaki, ao e a aki riki ngkanne taekan te kaibangaki b'a te b'ai ni kab'akab'aka.

¹² A bia boni koroia ngaiia te koraki akana aki karaungkami!

¹³ B'a kam weteaki nakon te aro n inaomata, taari; ma kam na tai b'aina te aro n inaomata b'a aonami i bukini baika e tangiri te rab'ata; ma kam na i torotoro iroumi n te tangira.

¹⁴ B'a e kabaneaki te Tua n touaki mwina n ae kaangai, “Ko na tangira raom n ai aron tangiram i bon iroum.”

¹⁵ Ma ngkana kam i tenatena ma n i kaakang, ao kam na tarataraingkami b'a kam kaawa ni kamaunaingkami temanna iroun temanna.

Uaan te Tamnei ao Ana M'akuri te Rab'ata.

¹⁶ Ma aio au taeka: Kam na kairaki iroun te Tamnei, ao ane kam na aki karaoa nanon te rab'ata ni kaib'ab'aru n aron are e tangiria.

¹⁷ B'a e bati ni kan eekaanako te Tamnei te rab'ata, ao E bati ni kan eekaanako te rab'ata te Tamnei; b'a a i kairiribai, b'a kam aonga n aki karaoi baika kam kani karaoi.

¹⁸ Ma ngkana kam kairaki iroun te Tamnei, ao kam aki mena i aan te Tua.

¹⁹ A bon ataaki ana m'akuri nako te rab'ata, b'a te wene ni bure, te kammaira, te kaitataan,

²⁰ te taromauri bouananti, te tabunea, taian riribai, te kauntaeka, te tauaninne, taian un, taian unra i marenaia ami botaki nako, taian i raraaure, taiani kakaokoro n iango,

²¹ taiani bakantang, te momooi manging, taiani bobotaki ni kukurei ni kammaira, ma baika ai aroni baikai; ao I a manga tuangngkami ngkai, n ai arou naba ngke I tuangngkami ngkoa, b'a a aki kona ni karekea uean te Atua akana karaoi baikai.

²² Ma uaan te Tamnei te tangira, te kim'areirei, te raoi, te taotaonaki n nano, te ataataiaomata, te raoiroi, te kakaonimaki,

²³ te nimamanei, te taotaonaki n nano mani karaoani baika e tangiri te rab'ata; akea te tua ae ekinako baikai.

²⁴ Ao akana ana aomata Kristo Iesu a taura te maiu n rab'ata ma nanona ni kammaira ma ni kaib'ab'aru n te kaibangaki.

²⁵ Ngkana te Tamnei ae ti maiu i rouna, ao boni Ngaia naba ae na kairi maiura.

²⁶ Ti na tai riki ni kainikatonga, ti na tai i kaunun, ao ti na tai i babakantang.