Itaia 9 - Te B'aib'ara

¹ Ma koraki aika a tia n rawaawata a na aki manga maraki. A ribaaki ngkoa aban nako Teburun ao Nabetari i Kariraia. Ma e na rangi ni karineaki te aba aei ae abaia Tientaire nakon te Karaanga are Ioretan ri mataniwiin te Taari are Mereterenian.

Tokin Te Buaka

² A tia n noora te oota aomata ake a tia n nakonako i nanon te roo. Ao a oota nako i aoia ni kabane aomata ake a maeka n te aba are te kabanea n rootongitong nuuna.

³ Ara UEA, ko a tia ni kakorakoraia am botannaomata. E reke mairoum kukureia ao karaoan aia bootaki ni kukurei kaaina kaanga taani m'akuri n tain te tai ke kaanga tautia aika a tib'ai b'aai ake a tia n reke irouia.

⁴ Ko a tia n urua m'aakaia koraki ake a kabuakakaia ao a tautoroniia am Aomata. Ko a tia ni kamaiua n ai aron are ngke ko kamaiuia am Aomata mairouia kaain Miria.

⁵ E a tia n urarake ao ni kanaki n te ai aia kauniwae taani buaka ake a m'aati ao aia kaboraoi ake a memea n te raraa.

E A Tia Ni Bungiaki Te Teei

⁶ E a tia ni bungiaki te teei i bukira. Ti a tia n anganaki te nati te m'aane are e na riki b'a ara tia tautaeka. Aikai arana Te Tia Iango Ae Kamimii ao te Atua ae e M'aaka, te Tama ae Akea Tokina ao Te Uea n Raoi.

⁷ E na aki tootoki m'aakana; e na akea tokin te raoi. E na tautaeka n abanuean Tawita ao e na kakorakoraa. E na tautaeka n taai nako ma te raoiroi ao te eti. E na bon kakoaua raoi te UEA ae Moan te M'aaka b'a a na koro nanon baikai.

E Na Katuaaea Iteraera Te Atua

⁸ E a tia te UEA ni kauringiia Iteraera,

⁹ ao a bon bane n ataia, n reitaki ma aomata ni kabane n te kaawa n tautaeka are Tamaria. Ma a kainikatonga ao a taningabono ao a taku,

¹⁰ “A tia ni b'aka taian auti aika a karaoaki n te buriki ao te tukomorea, ma ngaira ti na karaoi auti aika a karaoaki n taian atiibu ao taian tiira.”

¹¹ E karaoia aia kairiribai te UEA b'a a na buakaniia.

¹² E kanakoia kaain Turia mai mainiku ao kaain Biritia mai maeao ao a kab'auta Iteraera. Ma e bon aki toki naba unna n anne, ma ngaia are, e bon waakina nako naba katuaeakiia.

¹³ Ma a bon aki okirikaaki naba Iteraera nakon te UEA ae Moan te M'aaka ma n taromauriia.

¹⁴ N te bong teuana, e koroi atuuia ao bukibweeia, baaia ao m'aangaia.

¹⁵ Bon atuuia taan tautaeka, ao bukibweeia bon taiani burabeti ni kewe.

¹⁶ A tia ni kairiia ni kab'akaia botannaomata n te kawai ae e kaairua, ao a mangaongao aomata irouia.

¹⁷ E a un te UEA irouia ana Aomata ao e bon teimatoa naba ni katuuaia, i bukina ngke a tia ni kaaitaraa. A buakaka ao a taetae n nanobaba. Ao bon anne bukina are e aki nanoangaiia aia roronrikirake ke aia aine aika a tia ni mate buuia ao ataei aika akea aia karo.

¹⁸ E raababa nako te buakaka kaanga te buakonikai ae e urarake mani kabuoki taian buakoako ni kai aika a kateketeke ma ni kawaerakea te bubu.

¹⁹ E rangi ni un te UEA ae Moan te M'aaka ao e kabonganaiia b'a kaanga te b'aa ni kanaiai are e tiringa aon te aba. A manga bon rairi buareia i bon irouia

²⁰ kaanga taiani man aika a aki manana aika a un man tiringiia aomata nako ake i rarikiia, n reitaki naba ma bon aia koraki. Ma a bon aki naba rauaki.

²¹ A manga bon raira buareia Eberaim ma Manate, ao i mwiina, a ikoti aia taanga ni buaka ni buakana Iuta. Ma e bon teimatoa naba n un te UEA ao e tauraoi nakon katuaaeaia te botannaomata n ae e rawaawata riki.