Itaia 48 - Te B'aib'ara

E Kaetiia Ana Aomata Te UEA

¹ Kaain Iteraera kam nako mai roun ana utu Iakob'a ao barongan Iuta. Kam taekinna b'a kam taromauriia, te UEA ae Atuan Iteraera, ma kam kewe.

² Kam atonga Ierutarem b'a mwengami ao kam taekinna b'a kam onimakinai, Ngai ae te UEA ae Moan te M'aaka, ae Atuan Iteraera.

³ I katanoata ni bong ake ngkoa te b'ai ae e na riki, ao i mwiina I karikia, n te aro ae akea te katauraoi.

⁴ I ataia ae kam taningabono ao kam atuumatoa.

⁵ Ao I tuangngkami b'aai aikai, b'a ngkana a riki ao kam na aki kaangai, “A karaoa te aekaki aei taian bouannanti ake ti taromaurii.”

⁶ Kam ongo ngkoa te b'ai are I taekinna, ao kam a tia n nooria b'a e a tia n riki. Ngkai kam na taekinna b'a e boni koaua! N na kaoti nakoim b'aai aika a raba aika kam tuai man atai.

⁷ I karaoa te b'ai ae e boou n te bong aei, te b'ai ae kam aki konaa n taekinna ae kam a tia n ongo mai m'aaina.

⁸ Kam tuai mani kan kakauongo nakon te b'ai ae I taekinna; man te tai are kam bungiaki iai, I ataia b'a kam na kaaitaraa.

E Kauringiia Kaain Iteraera Te UEA

⁹ Bon te UEA Ngai, ae I bon koaua i bon irou; N na neboaki tiaki i bukin katuaeakimi ke tiringakimi.

¹⁰ I katai ngkami n taai aika a matoatoa kaanga te tirewa ae e a manga karaoaki n te ai ae e uram'aaka.

¹¹ I karaoa aei bon ibuku. I rawa ngkana I aki karineaki ke n tib'aa neboau ma anti tem'angina.

¹² Iteraera ae au aomata ae e rineaki, kakauongo irou Bon ti te UEA Ngai, te moan ao te kabane.

¹³ I karika te aonnaba n oin baiu ao n taakina nako karawa. A ongotaeka n taeka ni kabane.

E taetae Te UEA Nakoia Bootanaomata Nako

¹⁴ Bootaki i rarikiu, ngkami ni kabane! kakauongo nakon te b'ai ae N na taekinna. Iai mairouia ami bouannanti aika a kaman taekinna b'a a na riki baikai? A taekinna b'a e na karaoa te b'ai ae a tangiria raoraou nakon ae N na karaoia nakon B'aburon?

¹⁵ Bon Ngai ae I rineiko. I a tia ni uotia man te tabo ae e raroa, ao e na tootokanikai.

¹⁶ Kaaniko ao kakauongo! I tuai man karabai b'aai aika I a tia n taekin, ao I a kaman mena ikai i m'aain waakin te tai. E a tia ni kanakoai te UEA ae te Atua ni m'aakan te Tamnei are Raoiroi.

E Raoiroi Te Ongotaeka Iroun Te UEA

¹⁷ ma taian rongorongo aika: Kaain Iteraera, Bon te UEA ae te Atua ae e tabu Ngai, are e kamaiungkami. bon i bukimi, I reireiningkami, ao I kairingkami i aon te kawai ni koaua.

¹⁸ Ai korakorara nanou n tangiringkami b'a kam na ongotaeka nakon au tua! E na riai n taorake n te karaanga ae e taonako ami tootokanikai ao tekeraoimi.

¹⁹ A na kakab'aiaki am botannaomata n anganaki riki ana aomata ae kaanga te uita ao te bike. Ao N na aki manga kariaia b'a e na manga kamaunaaki abami.

²⁰ Kam na kiitana B'aburon ngkai! Ao kam na karaoa ami kukurei i nanoni kawaimi n nako. Kam na kukurei ao n takaarua b'a a aonga n ongo aomata nako, “E a tia te UEA ni kamaiua ana toro ae Iteraera!

²¹ E kairiira i nanon te rereua ao e karaanga nako te ran man te b'a ni katoki nanoia aika a taka.

²² Ma e a tia te UEA ni berita b'a bon akea temanna ae e buakaka ae na maeka ma te rau.”