Itaia 47 - Te B'aib'ara

E Na B'aka B'aburon E taku te UEA:

¹ Te Kaawa ae e buubura ae B'aburon, ko rangi ni maraurau ao ko ubu, ma ko na bitaki. Kaaki m'aakam ni uea ao tekateka i aon te baareka.

² Moana kamantan te uita! Kanakoa rabunan matam. Buuti kunnikaim aika a tamaroa ao ri aon te karaanga.

³ Ko na rawata ni mamaa ni kabebeekanaki, i bukina b'a I a tia ni karaoa te irantaanga, ao bon akea ae e konaa ni biri nako.

⁴ Bon te UEA Ngai ae Moan te M'aaka, Atuan Iteraera ae e tabu. Boni Ngai aia tia kamaiu.

⁵ B'aburon, kainab'aabu! Tekateka n te roo. Ko nang aki manga butim'aeaki irouia botannaomata nako b'a aia ueanaine ngkoe.

⁶ I un ngkoa irouia au aomata. Ma ngaia are, I kanakoko b'a ko na anaa abaia ma ni karokoa te kamaamaaeaki i aoia. Bon akea am Nanoanga nakoia, ma ai moaraara riki nakoia ake a kara.

⁷ Ko taku n am iango ko na riki b'a te ueanaine n aki toki. Ko aki tabe ma te b'ai ae ko a tia ni karaoia; ko bon aki roko n te uringnga ae ko na manga m'ane.

⁸ Ko taku inanom b'a ti ngkoe ae ko rangi ni m'aaka, n te aro are manga akea buum ma ni bua natim nako. Ti te b'ai ae ko tabeakinna bon te kukurei, ma ko na kakauongo nakon te b'ai ae I taekinna.

⁹ A na toki korakoran m'aakam n tabunea ma am b'ainikawai, ao ane e na akea buum ao a na mauna nako natim.

¹⁰ Ko na karabako i akuun te buakaka kaanga te otanga ao ko na kaangai, Akea ae konaa n noorai!” Ko kananobabaaki n rabakaum ao am ataib'ai; ko iangoia i bon iroum b'a bon ti ngkoe ae ko tautaeka.

¹¹ Ma e na oro te kabuanib'ai n akea te katauraoi ao a na aki konaa ni buobuoki m'aakan am tabunea.

¹² Teimatoa ni kamanenai am tabunea ma am b'ainikawai. n aron are ko a tia ni kakaraoia. Tao e na mena ngkoa, tao ko a tia ni kakamaaka temanna!

¹³ Ko a tia ni kakuako, n titiraki taeka ni buobuoki mairouia ake a kamateb'ai taian itoi n taekin iai kanoan bong aika a na roko te nam'akaina teuana i mwiin teuana. Naako titirakiniia arom ni kamaiuaki man b'aai aika a nang riki.

¹⁴ Bon akea te b'ai ae a konaa ni karaoia aomata aika a onimakini taian itoi kaanga taian uteute i nanon te ai ae e ura. Bon akea naba ae e konaa ni kateimatoa n aangnga, i rarikin te ai ae e ti am'arake ma n te uteute.

¹⁵ Bon aikai taan kaiwa aika kam a tia ni karaoa te m'akuri ni bitineti ma ngaiia ni kabane bongini maium. Ma a bon aki ataa te tabo ae a na nako iai, a aki konaa ni kamaiungkami.