Itaia 45 - Te B'aib'ara

E Ongeaba Tairati N Ana Tua Te Atua

¹ Ao e taku te UEA nakon Tairati, are e rineia: I a tia n taua baim te atai ni buokiko ni kataenikaia taiani botannaomata ao ni kanakoia taiani uea man m'aakaia. E na uki mataroan taiani kaawa nakoim; ao akea ae e na kainaki.

² Ngkana I kairiko, N na kabooraoi taian maunga ao a urui taiani mataroa aika biiti ke mataroan te kaawa aika taiani buraonti.

³ N na anganiko taiani kaub'ai aika a karabaaki n te roo ao n taabo aika a raba. Ao ane ko na ataia b'a boni Ngai te UEA ae Atuaia Iteraera, ae e a tia ni wetei ngkami n arami.

⁴ Tairati, ko aki ataai naba! Ma I a tia ni weteiko n aram ao n rangi ni karineko i bukin Iteraera, are au tia m'akuri ae e rineaki.

⁵ Bon ti Ngai te UEA! Bon akea riki atua i rarikiu. I a tia ni kakorakorako, e ngae ngke ko aki ataai.

⁶ Ngkai a bane aomata n nako mai mainiku nako maeao n ataia ae bon te UEA Ngai. Bon akea riki atua aika koaua.

⁷ I karika te oota ao te roo, te kukurei ao te nanokawaki. Boni Ngai ae te UEA ae I karaoi baikai ni kabane.

⁸ Kam na tuangiia taiani karawa b'a a na karuoa te kaetitaeka ae eti kaanga ai aron te maatim ni karau Katauraoa te aonnaba i bukin bwebweraken m'aakau ni kakamaiu b'a e na karekea te eti are I kariki Ngai ae te UEA.

Korakorani M'aakan Te UEA Ao e taku te UEA:

⁹ Iteraera, bon akea riaim b'a ko na kauntaeka ma te Tia Karikib'ai. Bon ti te m'angko te tano ngkoe ae ko borikaki iroun te tia karao m'angko. E aki konaa n titiraki te m'angko te tano, “E aera ngkai ko karaoai n te aekaki aei A anga taningau?”

¹⁰ Ataei bon akea riaimi b'a kam na kaangai nakoia ami karo, “E aera ngkai kam karikiira n arora aikai?”

¹¹ Bon te UEA Ngai, te Tia Karikib'ai, Atuan Iteraera ae E tabu. Ko na kataia n titirakinai i bukin au botannaomata ke i bukin te b'ai ae I a tia ni karaoia?

¹² I karika te aonnaba ao I kaonna irouia aomata; I arora nako karawa ao I kaonna n taian itoi.

¹³ I a tia ni karaoa te b'ai ae e eti ngke I katokaa Tairati i aon te m'aaka, ao N na kanakoraoi kawai ni bane ake e na m'ananga iai. Bon te UEA Ngai ae Moan te M'aaka! E na manga katea au kaawa are e buubura Tairati ao e na kainaomataia au aomata n akea te b'ai teuana ae e kabooaki. Bon aei au taeka Ngai ae te UEA.

Bon Ti Te UEA Ae E Konaa Ni Kakamaiu

¹⁴ au Aomata, bon Ngai ae te UEA ae I berita b'a kam na b'ain kaub'ain Aikubita ao b'ain Itiobia aika kakaawaki Kam na kairoroia aomata ake ab'ab'aki i Tabea b'a ami toro. Ane a na bobaraaki ni kaangai, “E memena iroumi te Atua ae koaua; bon akea riki atua tabem'aang.”

¹⁵ Kaain Iteraera, bon te kamimii Atuami, e ngae ngke bon ti ngaia ae E kakamaiu.

¹⁶ Aomata nako akana a karaoi taiani bouannanti a na bane ni kamangaongaoaki aia iango ao a na kamaamaaeaki.

¹⁷ Ma Ngai ae te UEA, N na bon teimatoa ni kaawakina Iteraera ma ni kararoa man te kamaamaaeaki.

A Bane Ni Kaoaki Aomata Nako

¹⁸ Bon ti te UEA te Atua! E karikii taiani karawa ao e karaoa te aonnaba ike a maeka iai aomata, ao e aki karaoa te rereua ae akea kanoana. Bon ti te UEA te Atua; bon akea riki atua tem'angina.

¹⁹ E aki taetae te UEA n taabo aika a roo aika a raba ke n tangiria kanoan Iakob'a b'a a na kua ni kakaaea. E na taekina te koaua te UEA ao aei te b'ai ae e taekinna

²⁰ nako ia aomata ni kabane aika a nikira ni maiu man taiani botannaomata ni kabane: “Ikotaki i rarikiu! karekea i nanomi aron aki riain taromaurian bouannanti aika taiani kai ke taromauri nakon taian anti aika akea te b'ai ae a konaa ni karaoia.

²¹ “E aera ngkai kam aki ikotaki ma ni kawarai n te kabowi? I bon aki tuangingkami ni boong ake ngkoa te b'ai ae e na riki? Bon ti te Atua Ngai! Akea riki i rarikiu. I karokoa te kaetitaeka ae eti, ao bon iai m'aakau ni kakamaiu.

²² “I kaooa te aonnaba ae e b'anin b'a e na rairaki nako iu ao e na maiu. Bon ti te Atua Ngai! Akea riki te Atua ni koaua.

²³ I a tia ni karaoa te berita ae e matoa, ae akea temanna ae e konaa n urua; A na bane ni boobaraaki aomata ni kabane ma n taromauriai.

²⁴ A na kakoaua b'a bon ti te Atua Ngai ae I karokoa te kaetitaeka ae eti. Ane e un ma ngai e na bon rangi ni kamaamaaeaki ao e na rairaki nako iu.

²⁵ Bon te UEA Ngai, ae e na anga te tokanikai ao te karineaki nakoia Iteraera.”