Itaia 44 - Te B'aib'ara

Ana Berita Te UEA Nakon Iteraera

¹ Kaain Iteraera, I a tia n rineingkami b'a au tia m'akuri.

² Bon ami tia karikib'ai Ngai. I tararuaingkami ngke kam tuai naba bungiaki. Iteraera, kam na aki maaku! Bon au tia m'akuri ngkami ae kam rineaki, maamaten nanou.

³ N na kakab'aia te aba ae e m'autakataka ni kanakoa taiani karaanga n ran, N na kakab'aia ami kariki n anganiia Tamneiu

⁴ A na bwebwerake kaanga taiani uteute ke kaai aika wiiro aika a mena i rarikin taiani karaanga n ran.

⁵ A na taromauriai ao a na riki b'a au aomata. Ane a na korea arau i akuun baiia.

⁶ Bon te UEA Ngai ae Moan te M'aaka, Te moa ao te toki, ae ti Ngaia te Atua ae ti temanna. Iteraera, I a tia ni kamaiuko! Bon am Uea Ngai.

⁷ Iai ae e konaa ni kabotauaki ma ngai? Ngkana iai, ao ake a taetae tuangai n te tai aei. Tuangiia b'a a na taekina te b'ai ae e a tia n riki man te tai are I karaoa iai au botannaomata n taai ake ngkoa, ao ke a taekin b'aai aika a na riki

⁸ Kam na aki ruru ni maaku! I bon aki taekinna nakoimi n taai ake ngkoa? Kam bon aki ongongora irou? Bon ti Ngai te Atua bon akea ai aron te b'aa ae e korakora.

Akea Te B'ai Ae A Konaa Ni Karaoia Taian Bouananti E taku te UEA:

⁹ Bon akea manenaia aomata aika a kaakaraoi taian bouannanti, ao taian bouannanti aika a kariki b'a kaub'aia boni baika a akea maneia. A matakii, akea kanoan aia iango, ao a baba taan taromauri taian bouannanti.

¹⁰ E aera ngkai kam karaoa te bouannanti ke bannan te b'ai teuana ae e aki konaa ni karaoa te b'ai teuana?

¹¹ Aomata ni kabane aika a karaoi taiani bouannanti ma koraki akana a taromauri bon aomata aika tokiia bon te b'arannano ae e kananokawaki. Kanakomaia b'a a na kaitaraai n te kabowi n ruru ni maaku.

Bouananti Ao Kanaan te Ai

¹² E katea tamnein te bouannanti te tia karao biti n te aama ao ni kabuebuen te ai. E taua te aama ni baina ae e korakora, ngkana e orea te biti nakon teina are e tangiraki. Ma e a manga baki ao e taka ao e a manga akea korakorana.

¹³ Taani m'akuri n te kai tabem'aang a baairei taiani m'akoro ni kai, ao i mwiina, a korea aia m'aake i aona. Ao e a kenaki te kai ma te karaurau nakon tamneina ni koaua. Ao ngke e a tia ao e a riki b'a kaanga taraan te aomata ao e a karinaki i nanon te Tembora.

¹⁴ E na rineaki man te buaka tao te aroka te tiira, te m'aiango, te oke, ke aekaki n aroka tabeua. Ke tao bon te aroka te m'aiango ae e unikaki irouia taani korobanna n te kai ao e tebotebokaki n te karau.

¹⁵ A kamanenaaki tabeua taiani kai i bukin ain te kabuebue ke te kuuka. E karaoaki m'akoron te kai teuana b'a te bouannanti, ao e boobaraaki te tia korobanna n te kai nako iai ao e taromauriia.

¹⁶ E kukurei nanona n te ai ae kabuebue ao te irikomaiu are e tinimaki iai i aon taian kooro aika a kabuebue.

¹⁷ Ao i mwiin, anne e bobaraaki n taromauria te bouannanti te kai. ao e taku, “Kaawakinai, bon antiu ngkoe.”

¹⁸ A matakii ao a nanobaba koraki aika a taromauri taian bouannanti!

¹⁹ Bon akea kanoan aia iango n ataa ae e kaangai, “I kauraa te ai ni iteran te kai ao I kuukana kanau te kariki ao te irikomaiu i aona. Ao I a manga karaoa te b'ai ae akea manenana ni m'akorona are teuana. Ao e aera ngkai I taromauria te m'akoro ni kai?”

²⁰ E kaanga te aomata n akea kanoan ana iango n taromauria te b'ai ae e konaa ni kabuokaki ni kamannangaki? Bon akea ae e konaa ni kamaiuia n aron anne. A bon aki ataia b'a te bouannanti are a taui i nanoni baiia bon tiaki taian atua ni koaua?

E Bon Aki M'aninga Taekaia Ana Aomata Te UEA

²¹ Kaain Iteraera, bon au taani m'akuri ngkami; ma ngaia are, kam na uring b'aai aikai ni kabane. Iteraera, I karikingkami, ao bon au taani m'akuri ngkami. I bon aki m'aninga taekami.

²² Kam na okirai? I a tia ni kamaiungkami ao I kaitiaki ami bure nako ngke a matenten kaanga taiani karau.

Anene N Nebo Nakon Te UEA

²³ Kam na tuangiia taiani karawa ma aonaaba b'a a nang moana aia anene! Tuangiia taiani maunga ao taian aroka ni kabane n te buakonikai b'a a na ira buakon te anene! E a tia te UEA ni kamaiuia ana Aomata; ao ngkai a nang taromauria.

E Karaoi B'aai Nako Te UEA

²⁴ Iteraera, bon ami UEA Ngai. Boni Ngai boton maiumi. ao I a tia ni kamaiungkami. I kariki b'aai nako ma i karawa i eta nakon te aba i nano.

²⁵ I kariki aia kewe burabeti ni kewe ao nanobabaia taani kaiwa. I anaa wanawanan te aomata ao I karikia b'a te b'ai ae akea nanona.

²⁶ N na kakoroi bukin aia rongorongo au burabeti. A taku, “E na kaonaki i rouia aomata, ao e na manga karaoi kaawan nako Iuta te UEA.”

²⁷ Bon Ngai ae I baairea taari ma karaangana nako b'a a na m'autakataka.

²⁸ Boni Ngai naba are I kaangai, “E na kairiia au aomata Tairati ao e na ongotaeka nakon au babaaire. E na manga karaoaki Ierutarem ao te Tembora.”