Itaia 43 - Te B'aib'ara

E A Tia te UEA Ni Kamaiuia Ana Aomata

¹ Kanoan Iakob'a, Boni Ngai, ae I karikiko ma ni boboota ami botannaomata. Iteraera, ko na aki maaku. I a tia ni kamaiuko. I a tia ni weteiko n aram; ao ngkai ai au aomata ngkoe.

² Ngkana ko ri nanon te iabuti, ao I memena iroum, ao ko na aki b'ab'a. Ngkana ko ri buakon te ai, ko na aki bue ke ni maraki ni kabuebuena.

³ Ngai te Uea, ae Atuam. I anga Aikubita, Itiobia, ao aonon Tieba b'a oneani mwiim.

⁴ Ko rangi n tangiraki irou, Ao bon anne bukina ngke I kaaki taekaia botannaomata ma taian aomata i bukin kamaiuam.

⁵ Ko na aki maaku b'a I raoniko. N na ikotingkami mai mainiku ao maeao.

⁶ N na kaangai nakon meang ao maiaki, “Kainaomataia natiu m'aane ma natiu aine! kaokiia man aaba aika a raroa.

⁷ Bon au aomata I karikiia n tatabemaniia nako b'a a na karineai.”

Bon Ti Te UEA Te Atua Ao e taku te UEA:

⁸ Ikotiia au aomata. Bon iai mataia ao taningaia, ma a aki konaa n ongo ke n noraaba.

⁹ Tuangiia botannaomata ni kabane b'a a na ikotaki. Bon akea mai buakoia ae e konaa n taetae ni kaangai, “Antai ae e tuangingkami!” Ngkana iai ae e ongo b'a a taekina te baei, ao tuangiira taekana n te tai aei.

¹⁰ au Aomata bon au taani kakoaua ngkami ao taani m'akuri aika kam rineaki. I tangiringkami b'a kam na ataai, n onimakinai, ao n ataia b'a bon ti Ngai te Atua. Bon te Atua Ngai mangkoa; ao bon akea riki temanna i rarikiu.

¹¹ Bon ti te Atua Ngai; bon ti Ngai ae I konaa ni kamaiuko.

¹² I berita b'a N na kamaiungkami, ao I kaawakina au berita. Bon au taani kakoaua ngkami b'a bon akea riki te anti temanna ae a tia ni karaoa aei. Bon aei au taeka Ngai ae te UEA.

¹³ Bon te Atua Ngai ngkai ao n aki toki. Bon akea ae e konaa n rawei ngkami mai irou. ke n te tei i m'aain kawaiu.

E Na Katauraoa Te Kawai Te UEA

¹⁴ Bon Ngai ae te UEA ae N na kamaiungkami! Bon Atuan Iteraera ae e tabu Ngai, N na kanakoa te taanga ni buaka nako B'aburon i bukimi b'a e na uaakiniia nako aomatana, ao a na tang ngke e tabe n nako.

¹⁵ Bon Atuam Ngai ae e tabu, Ana tia karikib'ai Iteraera ao ana Uea.

¹⁶ Boni Ngai are I katabwena te kawai i nanon te marawa ae korakora.

¹⁷ I kanakoa te taanga ni buaka b'a e na kakioko n taian kaanibuaka ao taian aoti; ao ngkai a wene ni mate, a aki konaa ni kakam'akuri. A riki b'a kaanga te taura te b'aa are e a tiringaki.

M'aninga Taekan Boong Aika A Tia N Nako

¹⁸ M'aninga b'aai aika a tia n nako n taai aika a nako! Kam na aki ururinga te tai ae e a tia n nako.

¹⁹ I a karika te b'ai ae e boou. Bon arei! Kam nooria? I a tia ni karaoi taiani kawai i nanon taian rereua, ma taiani karaanga n aaba aika a m'auteretere.

²⁰ A bane maan aika a aki manana ni karineai, ao ni karokoa naba taian tiakaore ao taian aure. I katauraoa te ran n taian rereua taian karaanga n ran n aaba aika a m'autakataka i bukiia au aomata aika a rineaki.

²¹ I karikiia b'a oin au botannaomata, b'a a aonga n neboai.

²² I taku Ngai ae te UEA nakon Iteraera: Ko a rangi ni kua, ma ko aki kua i bukin taromauriau.

²³ Ko a tia n aki karineai ni karean taian tiibu ma maan riki tabeua. Ao I tuai ni karawaawatako n tangiri taian karea ke taiani b'ai ni kaboiarara.

²⁴ Kam tuai man uoti taian b'ai ni kaboiarara aika a raraoi i buku ke n anganai raraoin m'akoron ami man ake taian karea. Ma n onea mwiin anne, kam karawaawataai n ami bure aika a rangi ni buakaka.

²⁵ Ma I kamaunai ami bure i bukina Ngke Ngai ae boni Ngai. Ma ngaia are, I m'aninga taiani kairua ake kam a tia ni karaoi.

²⁶ I a kaitibo ma ngkami n te kaboowi! Kaota ami tangitang ao kaota te kakoaua b'a kam bon eti.

²⁷ A kakaitaraai ami moani bakatibu ma ami taani kairiiri

²⁸ Ao bon anne bukina ngkai I aki kariaia ami ibonga b'a a na m'akuri ibuku; E na kamaunaaki Iteraera ao a na kamaamaaeaki ami aomata.