Itaia 42 - Te B'aib'ara

Ana Tia M'akuri Te UEA

¹ Aio au tia m'akuri! I a tia ni kakorakoraa. Bon au rinerine; I kukurei i rouna. I a tia n anganna Tamneiu, ao e na uota te eti nakoia botannaomata.

² E na aki takaarua ke n tang ke ni weewete i nanon kawain nuukan te kaawa.

³ E na bon aki otea naba te uteute ae manamana ke ni kabuokia, ma e na kakoaua raoi b'a e na karaoaki ae eti.

⁴ E na bon aki b'ara nanona ke ni kua ni karokoa e roko raoi te eti n te aonnaba ni kabane, ao a kariaria botannaomata nako nakon ana reirei.

⁵ Bon te UEA Ngai ae te Atua. I karaoi taiani karawa kaanga te autinrianna ae e tangaina nako ieta. I karaoa te aonnaba ma b'ai ni kabane aika a maiu i aona. Boni Ngai boton te maiu ni baika a maiu ni kabane n te aonnaba, ma ngaia are, kakauongo nakon te b'ai ae I taekinna.

⁶ I rineiko b'a ko na uota te eti, ao I mena ikai i rarikim. I rineiko ao I kanakoko b'a ko na uota te oota ao au berita i bukin te kaantaninga nakoia botannaomata ni kabane.

⁷ Kam na anga te noraaba nakoia aika a matakii; kam na kainaomataia buure man taian karabuuti aika a roo.

⁸ Arau bon te UEA! N na bon aki kariaia taian bouannanti ke aomata b'a a na ono ni mimitongiu ao neboau.

⁹ A na roko b'aai ni kabane ake a tia n roko naba i m'aaina n aron are I taku; ao ngkai N nang katanoata are i mwiina.

Anene N Nebo Nakon Te UEA

¹⁰ Tuanga te aonnaba ni kabane b'a e na anenea te anene ae e boou nakon te UEA! Tuangiia akana a ieie i marawa ao akana a maeka n taabo aika a raroa b'a a na ira te nebonebo.

¹¹ Tuangiia baronga akana n te rereua ao aomata akana i aon taiani maunga b'a a na bootaki ni kukurei ao n anene.

¹² Ke a katanoataa aron neboana n taabo nako.

¹³ E m'ananga n oti nako te UEA kaanga te tia buaka ae e un, ma ni kabanea takaaruana ngke e tabe ni un ma ana kairiribai nako.

E Na Buokiia Ana Aomata Te UEA

¹⁴ I a tia n tautaua marakin nanou n te tai ae e maan Ngai ae te UEA; ao ngkai N nang takaarua mani ngirangira kanga te aine ae e ariri ni bung.

¹⁵ N na kamaunai taiani maunga ma b'aai ni kabane ake a maiu i aoia; N na kaorai taiani karaanga ma taian nei.

¹⁶ N na kairiia aomata i aon taiani kawai aika a tuai atai; N na kaawakiniia i nanon te kawai aika a tuai man tootoua. E roo kawaia ao e aobuaka, ma n anga te oota b'a a aonga n aki toki waeia. Bon aei au berita ae e matoa.

¹⁷ A na bane aomata aika a taromauriia taian bouannanti b'a kaanga antiia ni kamamaaeaki n ae moan te korakora.

A Aki Ongotaeka Ana Aomata Te Atua

¹⁸ Kam bonotaninga ao kam matakii ngkami aika aomata, ma e tuangngkami te UEA b'a kam na kakauongo ma n taratara.

¹⁹ Bon akea ae e matakii riki ke e bonotaninga riki nakon ana tia uarongorongo, are ana tia m'akuri are e rineaki,

²⁰ are e rangi n noraaba ao n raoiroi taningana, ma e aki muuti.

²¹ E kaakaraoa ae e raoiroi n taai nako te UEA, ai ngaia are e tangira ana Tua b'a e na rangi n neboaki.

²² Ma a m'ane n te b'ainikam'ane ana aomata ao a kabureaki n taiani b'angab'anga aika akea ae konaa ni kamaiuia mai iai. A uotaki nako aia b'ai ni kabane, ao bon akea ae e kukurei ni manga kaoki.

²³ E aera ngkai a rawa ana aomata n kakauongo?

²⁴ E bubure Iteraera ao e rawa n ongotaeka iroun te UEA ke n aki iri ana babaaire. Ma ngaia are, e karaoia te UEA b'a a na iraeaki aia b'ai ni kabane.

²⁵ E a rangi ni un irouia ao e katuuaia ana botannaomata n taiani buaka aika a kabuebue. Ma a bon aki tabe iai. A bon aki naba tabe ngkana a katobibiaki ma n rootaki ni kabuebuen te ai.