Itaia 41 - Te B'aib'ara

E Babaairea Aron Te Aomata Te UEA

¹ Tai kakarongoa ao kakauongo, abam'akoro ni kabane i nanon te marawa. Kakorakoraingkami ao kaaningkami, aomata ni kabane aika taiani botannaomata. Ti na iangoa aron te b'ai ae e riki aei!

² Antai ae e rinea te tia tautaeka mai mainiku aei? Antai ae e katokaia botannaomata ma aia uea i aoni m'aakana? E bita ana kabaang ma ana kainikatebe nakon te taaurouro are e ukaki nako n te ang.

³ E rimwiia n te tai ae e waekoa n te aro are toko waena ma aontano ao e aki roko naba n te namakina te maraki.

⁴ Antai ae e kariki b'aai aikai? Antai ae e baairea aron te aomata? Boni Ngai! Bon te UEA Ngai. I mena ikekei ngke e moani karikaki b'aai; Ao N na manga mena naba iai ikekei n te toki.

⁵ A noora te b'ai are I a tia ni karaoia taian abam'akoro ao botannaomata aika ianena ao a rurubenebene ngke a tabe ni kaan.

Tera Ae A Konaa Ni Karaoia Bouannanti?

⁶ A karauinanoia i bon imarenaia taan taromaurii bouannanti, ni kaangai, “Tai raraoma!”

⁷ A kaungaia i bon irouia taan karaobanna n taiani kai, taani karaoi biti, ao taani m'akuri riki tabem'aang ao a kaangai, “Ti a tia ni karaoa te m'akuri ae e korakora!” Ao i mwiina, a neerana te bouannanti, b'a e aonga n aki b'aka.

Ana Tia M'akuri Te UEA Ae E Rineaki

⁸ Iteraera, bon au tia m'akuri ngkoe ae e rineaki, ana utu raoraou are Aberaam.

⁹ I uotiko nako ikai man iteran te aonaaba ae e raroa nako ao I kaangai, “Bon au tia m'akuri ae e rineaki ngkoe ae I aki konaa ni m'aninga taekam.”

¹⁰ Ko na aki maaku. Bon raou ngkoe. Ko na aki ruru ni maaku. Bon Atuam Ngai. N na kakorakorako, ngkana I kamanoko ni baiu ma n anganiko taian tokanikai.

¹¹ A na bane aika ribaiko ni kam'aitaki mamaaia; ao akana a buakaniko a na mauna nako i nanon te ang.

¹² Ane ko na taratara nako ni kakaaia am kairiribai aika a iowawa ma ane ko na bon aki kunea temanna b'a a tia ni bane nako.

¹³ Bon Ngai te UEA ae te Atua. I tautaua baim, ma ngaia are, ko na aki maaku. I roko ikai b'a N na buokiko.

¹⁴ Kaain Iteraera kam na aki raraoma, ngkana a kaangai tem'angina, Bon ti te m'ata Iteraera!” Bon Atuan Iteraera ae e tabu Ngai, ae E kamaiuko ma ni kaawakiniko.

¹⁵ N na kairiko kaanga te kai ae e onrake n taian ing. Ao ko na kamanti ma ni kamanatui taiani maunga ma tabuki ni karokoa a riki b'a te taaurouro.

¹⁶ Ane e na kamaaenakoia te ang ae e korakora nakon taabo aika a kakaokoro. Ao i mwiina, kam na karaoa ami bootaki ni kukurei ibuku ao kam na neboai, Ngai ae ami UEA, ae Atuaia Iteraera ae e tabu.

E Buokiia Aika A Maiu ni Kainano Te UEA

¹⁷ Ngkana a mate n taka ma n aki konaa ni kakaaea te ran aika a maiu ni kainano ao aika a tangira buokaia, Ao N na roko ae Atuan Iteraera ni buokiia. N na bon aki m'aninga taekaia.

¹⁸ N na karaangai taiani karaanga i aon taubukin taiani maunga. N na kanakoa taian raanga n ran ni kaoni taiani m'arua. E na onrake te aba ae e rereua n raangan taian koburake n ran ao a na riki b'a neei aika taian reke.

¹⁹ N na kaonrakea te rereua n aekaki n aroka nako aika tiira, aketia, ma motere; oriwa ma m'aiango; ao bureen ma teatura.

²⁰ Ana bane aomata n noora te baei ao a na ataia b'a boni Ngai aia UEA Iteraera ae tabu, ae e kariki b'aai nako.

Akea Boonganan Taian Bouannanti

²¹ Bon te UEA Ngai ae Atuaia Iteraera! Nakomai kaetieti ma Ngai. Kaoti am b'ai ni kakoaua.

²² Nakomai nako rarikiu, ngkami aika taian bouannanti. Tuangiira taekan boong aika a tia n nako, b'a ti na iangoia. Tuangiira taekan boong aika a na roko b'a ti aonga n ataa te b'ai ae e na riki.

²³ Anga te b'ai ni kakoaua b'a bon anti ngkami n taekin b'aai aika a na bon roko rimwi. Karaoa te b'ai teuana ae e raoiroi ke e buakaka, b'a ti aonga ni miimi iai ma ni maaku.

²⁴ Bon akea boonganami ngkami aika taian bouannanti, bon akea m'aakami. E na riki b'a te b'ai ae e rangi n ribaaki taromauriakimi.

²⁵ Boni Ngai ae te UEA ae I rinea te tia tautaeka are i meang; ao ngkai e a roko mai mainiku b'a e na neboa arau. E na toubekaia taiani uea kaanga te bokaboka, kaanga taani karaoi m'angko aika a toubekaa te bokaboka.

²⁶ Iai mai buakoia ami bouannanti ae e konaa n taekin baika a roko rimwi? Iai i buakoia ae e etieti? Bon akea mai buakomi ae e a tia n taekina aei ke n taekina te taeka teuana.

²⁷ Boni Ngai ae e moan tuangiia Iteraera ni kaangai, “Nooria, e a koro bukina!” Bon te moan Ngai ni katanoataa te rongorongo ae e raoiroi aei nakon Tion.

²⁸ Bon akea mai buakoia taian bouannanti aikai ae e konaa n anga ana reirei ke ni kaekai titiraki.

²⁹ Bon akea boonganaia, ao bon akea te b'ai teuana ae a konaa ni karaoia akea manenaia nakon te ang ae e a taonnako.