Itaia 40 - Te B'aib'ara

Kaungaaki Nanoia Ana Aomata Te UEA

¹ E a tia ni kaangai te Atua: “Kaungai nanoia au aomata! Anganiia te rau.

² Taetae raoi nakon Ierutarem ao katanoataa ae e kaangai: A toki am bong n tautoronaki. Bon te UEA ngai, are I kataboroa tuaam i bukin am bure nako.”

³ E taakarua temanna ni kaangai, “Kaitiaka te kawai i nanon te rereua! Karaoa te kawai ae e eti i bukin te UEA ae te Atua.

⁴ Taun taiani m'arua; ao kanakoi taian tabuki ma maunga. Kabooraoa te tabo ae e bobuaka ao te tabo ae e aobuaka.

⁵ Ao i mwiina, ane e na kaoti mimitongin te UEA b'a e aonga n nooraki. E a tia te UEA ni berita i bukin aei!”

⁶ Temanna ae e takaarua n tuangai, ao I titiraki ni kaangai, Tera ae N na takaaruaia?” Bon ti taian uteute ngaira aika aomata, e aki tei maan maiura riki nakon taian uee aika a riki n aki akaaka

⁷ A mate uee ma uteute, n ana babaaire te UEA ao ai arora naba.

⁸ A mauna nako uee ma uteute, ma a na bon aki konaa ni bitaki b'aai aika e a tia n taekin.

E Mena Ikai Atuam!

⁹ Bon iai te rongorongo ae e raoiroi i bukin te kaawa ae e buubura ae Tion Takaaruaia n tokin korakoran b'anaam mai taubukin te maunga ae te kabanea n rietaata ni maunga. Ko na aki maaku n takaarua nakon kaawan nako Iuta, “E mena te Atua ikai!”

¹⁰ Nooria! E a roko te UEA ae te Atua ae e rangi ni M'aaka b'a E na tautaeka ma baina ae e korakora. Uotana te b'ai ake e a tia n uotia nakon te buaka, ao E anganiia ana Aomata kaniwangaia.

¹¹ E tararuaia ana Botannaomata te UEA, kaanga te tia kaawakintiibu ni kaawakiniia ana Nanai n tiibu. E uouotia tiibu ataei i aoni baina ao ngke e tabe ni kaira raoi te tina n tiibu.

Antai Ae E Bootau Ma Te Atua?

¹² Iai mai roumi ae e baairea te marawa n ti ngaia ke n taakina karawa n oini baina? Ngkoe ae ko kaaki te tano n te aonnaba i nanon te b'aketi ke n taua rawaawatan taian tabuki ao taiani maunga i aon te kainikatine?

¹³ Iai mairoumi ae e a tia n tuanga te UEA ke n tuangnga te b'ai ae e na karaoia ke ni kaetia?

¹⁴ Iai ae tuangnga te UEA b'a e na reireinna rabakauna ao te kaetitaeka ae eti? Antai ae e anganna te ataib'ai ao te rabakau?

¹⁵ Bon ti taian timtim n ran i nanon te b'aketi botannaomata ni kabane iroun te UEA ke te taaurouro i aon te kainikatine; bon ti te abutana te tano abam'akoro ni kabane.

¹⁶ E na bon aki tau m'aitin taiani kao ake i aon Maungan Reb'anon i bukin te angab'ai i bukin te karea nakon te Atua, ao a na bon aki tau naba m'aitin taian aroka i bukin kanaan te ai.

¹⁷ E iangoia botannaomata te Atua b'a b'aai aika akea manenaia.

¹⁸ Antai ae e na kabootauaki ma te Atua? iai te b'ai ae ai arona?

¹⁹ E boni bootau te bouannanti ma te Atua? E karaoaki man te buraonti ao ni kabiraki aona teutana n te koora, ao e katamaroaaki n te tirewa.

²⁰ Ke e na rineaki te aekaki ni kai ae e raka arona i bukina b'a e aki mka ao i mwiina e a karaoaki raoi ni baai aika a bairaoi ni karaoa te bouannanti ae e na aki konaa ni b'aka.

E Tautaekana Te Aonnaaba Ae E B'anin Te Atua

²¹ Ko tuai man ataia? Ko tuai man ongongo, E bon aki teretere raoi b'a bon te Atua ae e karika te aonnaba?

²² Bon te Atua ae e tautaekana te aonnaba ni kabane, ao ngaira aika ti maeka ikai bon ti taian man aika a uarereke. E taakin nako taiani karawa kaanga te kunnikai ke te autinrianna ae e aki rokinaki.

²³ E karuoia taan tautaeka te Atua ao E karaoia b'a baika akea manenaia.

²⁴ Ti te bo ngaiia ma taian uee aika a tib'a ure ao a tabe n rikirake. Ma ngke e ukia te Atua, ao a rai ma n uotakinako kaanga te maange n tain te angibuaka.

²⁵ E titiraki te Atua ae tabu, “Antai ae e kabootaua ma Ngai? Bon iai ae e boraoi ma Ngai?”

²⁶ Bon noora karawa n te tairiki! Antai ae e karaoi taian itoi? Antai ae e anganiia araia n tatabemaniia nako? Antai ae e kairiia kaanga te taanga ni buaka? E bon rangi ni korakora te UEA n te aro are bon akea mai buakon taian itoi aika bua.

Bon Te UEA Ae E Anga Te Korakora

²⁷ Kam kaangai ngkami aika Iteraera, “E bon aki kubariira te Atua! E aki tabeakiniira ngkana e karaoaki ae e aki raoiroi nakoira.” Ma kam na kangaa n taekina anne?

²⁸ Kam tuai ataia? Kam tuai naba ongo? Bon akea tokin te UEA, Te tia karaoa te aonnaba. E bon aki konaa ni kainano ke ni kua; bon akea tian wanawanana.

²⁹ Bon te UEA ae e anga te korakora nakoia aika a kua.

³⁰ A na boni kua roronrikirake, a na tatatata ao a na b'aka.

³¹ Ma e na manga reke te korakora ae boou irouia akana a onimakina te UEA. A na korakora kaanga ikare a na betiraoi i aoni baiia ni kiba; a na nakonako ao a na biribiri ao a na aki kua.