Itaia 29 - Te B'aib'ara

Karawaawataan Ierutarem E taku te UEA:

¹ Ierutarem ae ana kaawa Tawita, are nnen au baonikarea, Ko a reke n te kaangaanga! bukamarui am toa n te ririki teuana ma teuana.

² N na bon teimatoa naba ni karawaawatako, ao a na tang am aomata ngkana I karaoa te baonikarea i bukim.

³ N na katobibiko ma ni katauraoi nakon buakanakim man itera ni kabane.

⁴ Ane ko na weewete buokam, mai inano i kabin aonnaba n te b'anaa ae moan te mamaara.

⁵ Ao i mwiina, e na karina ni uotaki nako am kairiribai ae moan te tiritiri n ai aron baareka i nanon te angibuaka.

⁶ N na roko ni kamaiuko ma m'aiei ao te baa ma te ukeukenanti Ngai ae te UEA ae Moan te M'aaka.

⁷ a na bane ni mauna kaanga te mii ngkana e a ngaina botannaomata ni kabane aika a iowawa aika a buakana Ierutarem ma ni karawaawataa.

⁸ Ao a na mate n te baki ao te taka botannaomata aikai aika a buakana te Maunga are Tion. Ane a na miia te am'arake ma te mooi ma a na uti ni kua ma ni baki ao n taka n aron ae a tuai man noonoria.

Buraabeti Aika A Kaburababaia I Bon Irouia

⁹ Kam na tiaoki ao kam na ntongitong, ngkami aika burabeti! Ao e na aki oota raoi ami taratara. Kam na koro ni manging mani bebebebe, ma tiaki mwiin te wain.

¹⁰ E a tia te UEA ni karaoingkami b'a kam na nimatutuu; ma ni karokoa te matu ae e korakora i aomi ao n rabun atuumi.

¹¹ Ti te bo ana rongorongo ma te reta nakoimi ae e kanikinaeaki.

¹² A taku tabeman, “Ti aki konaa ni warekia b'a ti babanga ni wareware.”

¹³ E a tia ni kaangai te UEA: “A neboai aomata aikai n aia taeka ma bon akea raoi nanoia i Rou. A taromauriai ni kakaokioki taian tua ake a karaoaki i rouia aomata.

¹⁴ Ma ngaia are, N na manga karaoi b'aai ake a katiaokiia ma ni kamimiia, ao N na kamaunai wanawanaia akana a taku b'a a rabakau ma n ataib'ai.”

¹⁵ ko a bon reke n te kaangaanga, ngkana ko kataia ni karabai am babaaire mai roun te UEA! Ke ngkana ko taku b'a a na aki konaa n nooraki baika ko karaoi n te roo.

¹⁶ Kam kareei b'aai ni kabane. E aki taetae ni kaangai te raurau te tano ae e anaanau nakon te boora te tano, “Ko aki karaoai. ao bon akea naba te b'ai ae ko ataia mairou.”

Te Kaantaninga I bukin Boong Aika A Na Roko

¹⁷ Ao ane e na oneaki n te tai ae e waekoa buakonikain Reb'anon nakon te tawaana ni uita ae buakoako kaanga te buakonikai.

¹⁸ Ane a na konaa n ongo taningabono te b'ai ae e warekaki nakoia; ao ane a na kainaomataaki matakii ma n te maiu i nanon te rotongitong.

¹⁹ Ane a na bootaki ni kukurei ma n takaarua aomata aika a maiu ni kainano ma aika a tangira buokaia i bukin te UEA ae Atuaia Iteraera ae E tabu.

²⁰ A na bane aika a iowawa ma aika a kainikatonga n nako n aki manga oki. Ao a na mauna nako aika maiuakina te bure,

²¹ n reitaki ma aomata ni kabane aika a tataekina te kewe n tain te bowi ma n teimatoa n aki anganiia aika akea aia bure te babaire ae e eti.

²² Aikai taeka aika e na taekin te UEA are e kamaiuia Aberaam i bukin kanoan Iakob'a: “Ane a na aki manga mamaa ao ni b'ainrang.

²³ Ane a na neboai ma ni karineai, ngkana a noora korakoran aia botannaomata n aron ae I a tia ni karaoia, Ngai ae Atuaia Iteraera ae E tabu.

²⁴ Ane a na ataia aomata ni kabane akana a mangaongao aia iango, ao ane a na ongotaeka n Au reirei akana a tia ni ngurengure.”