Itaia 26 - Te B'aib'ara

Te Anene N Tokanikai

¹ E a roko te tai are a na anene iai kaain Iuta n te anene ae e kaangai: “E kaawakinaki ara kaawa Bon ara nono te UEA, ao e anganiira te tokanikai.

² Kauki mataroan te kaawa i bukiia te botannaomata aika a maiuakina te tua aika a kakaonimaki nakon te Atua.

³ E anga te rau ae e tamaroa te UEA nakoia aika a matoa aia onimaki.

⁴ Ma ngaia are, onimakina te UEA n taai nako b'a bon ara b'aa ae e korakora

⁵ E a tia te Atua ni kab'akaia ara kairiribai man aia kaawa are e buubura are i aon te maunga ao e taunna n te baareka.

⁶ Ao ngkai a kabuakaka ma n aiwaa i nanon te kaawa arei aomata aika a buakaka.”

Onimakinan Te UEA

⁷ Ara UEA ko aki toki ni kakaraoa ae e eti ao ko kabooraoa te kawai i bukiia aika a ongotaeka iroum.

⁸ Bon temanna ae e onimakinaki b'a e na uota te eti; ao ti tangira riki neboan aram nakoni b'aai ni kabane.

⁹ E kakaaeko nanou inanou ngke e bong, i bukina ngke e kaotaia aomata nako n te aonnaba aei aron maiuia ae e eti.

¹⁰ E ngae ngkana e akoaki naba te aomata ae e buakaka i aon aban te eti aei, a karaoa ae kaairua ao a matakii nakon mimitongim, ara UEA.

¹¹ E mwemwe baim ao e tauraoi ni katuaaia, ma a aki nooria. Kamamaaia! Kaota korakoran nanom ni kaawakiniira ao karenakoia nako nanon te ai are a na kabuokaki iai am kairiribai nako.

¹² Ko na anganiira te rau i bukina ngkai ti a tia ni karaoi ni m'aakam.

¹³ A tia n tautaekaniira tem'angina i rarikim, te UEA ae te Atua, ma ti bon ti ongotaeka iroum.

¹⁴ A mate ngkai kairiribai aikai ao a aki konaa ni manga maiu. Ko a tia ni katuaaia a mauna nako, e a bon m'aninga te aba taekaia.

¹⁵ E a tia n rikirake ara botannaomata i bukim, te UEA ae te Atua. A m'aiti riki abara nakon ake mai m'aaina, ao ko karineaki.

Anganakiia Maate Te Maiu Iroun Te UEA

¹⁶ Ngkana ko katuaaia ara aomata, ao a rairaki man tataro nakoim, ara UEA.

¹⁷ Ti maraki n ai aron te aine ae e nang bung i bukin te b'ai are ko a tia ni karaoia nakoira.

¹⁸ Ma e oneaki mwiin bungiakin te nati, n te ang ae e reke man te maraki ae e korakora. Bon akea ara tokanikai ae ti a tia ni karekea, ao bon akea naba kanoara ake a na manga taua te aonnaba.

¹⁹ A na manga maiu am aomata! Tuangiia b'a a na kiitan ruanimateia ao a na kukurei ni bukamaru ma n takaarua. Ko kabooua te aonnaba kaanga aoin te ingabong; ko anga te maiu nakon te mate.

²⁰ Naako rinnako ao kaini taiani mataroa, ngkami aika au aomata. Karabaingkami ikanne n te tai ae e uarereke, ni karokoa te tai are e na toki iai unin te UEA.

E Na Katuaaeaki Te Aonnaaba Ma Taari

²¹ E na otinako te UEA ao e na katuaaia aomata nako i aon te aonnaba i bukin aia bure. Ao ane a na ataaki ma ni katuaaeaki aomata aika a tia ni karaoi buure aika a korakora ngkana E waaki.