Itaia 25 - Te B'aib'ara

Te Tataro Ni Kaaitau Nakon Te Atua

¹ Bon Atuau, Ngkoe, te UEA! N na neboiko i bukin karaoan b'aai aika a kamimii aika ko a tia ni baairei ma ni berita iai man taai ake ngkoa.

² Ko a tia n urua nonoia ara kairiribai, ma ni katikuia ma aia kaawa ae e buubura ma te urubekebeke. Bon akea riki te b'ai ae e na manga konaa ni kateaki n te kaawa ane e buubura anne.

³ Ao ngkai a nang maakuko ma ni karineko botannaomata aika a korakora ma ni iowawa.

⁴ Ko a tia n riki b'a te tabo ni kamanomano i bukiia aika a maiu ni kainano ma n tangira buokaia i nanon tain te kaangaanga. A buakaniira ara kairiribai kaanga rokon te karau ae e korakora ke kaanga riringan taai n te tawanou, ma ko bon riki b'a katanara.

⁵ A oroira ianena aikai kaanga korakoran kabuebuen te rereua. Ma ko bon riki b'a te nang, are e kataniira man kabuebuen taai. Ko katoka anenean te anene n tokanikai irouia ara kairiribai.

Kamaiuara Iroun Te UEA

⁶ E na katauraoi am'arake aika a rangi n raraoi te UEA ae Moan te M'aaka i bukin te baka n am'arake i bukiia botannaomata. A na kabutaki wain aika a rangi n raoiroi ao iriko ni man aika kabanea n tamaroa.

⁷ E na kamaunaa nako taiani kunnikai ni mate are a rabunaki iai botannaomata.

⁸ E na kamaunaa m'aakan te mate te UEA ae Moan te M'aaka ao e na kaoi rannimata ni kabane. E na akea te tabo ae e na manga karawaawataaki iai ana Aomata Bon ana taeka te UEA!

⁹ Ane a na kaangai aomata n te tai arei, “E a tia te UEA ni kamaiura! Ti na karaoa ara bootaki ni kukurei. Ti tataninga ma ni kakantaninga ao ngkai e a mena Atuara ikai.”

¹⁰ E na kaawakina te maunga aei bain te UEA ae e m'aaka. Ane a na kab'akaaki kaain Moaaba ma ni booketaketa kaanga taian b'ab'ati ni uteute i nanon te m'arua i bukin nakotariia maan.

¹¹ Ane a na inimaki ni kakaaea angan otinakoia, ma e na kab'ainrangiia te Atua e ngae ngkana a kai nanoia.

¹² Ane a na b'aka oon aia nono nako ma ni maae nako i buakon te baareka.