Itaia 23 - Te B'aib'ara

Katuaaean Te Kaawa Ae Buubura Are Turo

¹ Aio te rongorongo man te abam'akoro ae e raroa nako ae taekan te kaawa ae e buubura are Turo: Kam na tang ngkami aika kaibuke ni m'am'ananga! A na wene n uruaki autin Turo ni kabane.

² Tanginiwenei ma te aki kakarongoa, ngkami aika taani kaboob'ai i Titon, ao ngkami naba aika kam maeka i mataniwiin te aba. Ami kaimoa aika a riri nanon taiani marawa, are karikirakea kaub'ain ami kaawa are e buubura anne.

³ A boborau i marawa ami taani boob'ai ni karekei kaub'aia n te kakaboob'ai ma te botannaomata teuana ma teuana. A uoti rikaaki taian uita ake a maiu i mataniwiin te Naire.

⁴ Titon, bon te nono ngkoe ae ko korakora ae ko kateaki i mataniwiin taari. Ma ane ko na kamaamaaeaki kaanga te aine ae akea natina.

⁵ Ngkana e ongo Aikubita taekan Turo ao ane e na ruru ni maaku.

⁶ Kam na bane n tang ngkami akana kam maeka i mataniwiin taari ao kam na ie nako ni kararoai ngkami i marawa.

⁷ E konaa n riki te kaawa aei are e a tia n tei i nanon bubua n ririki b'a te kaawa ae e kakukurei? A tia ni uamaaenako kaaina nakon aaba aika a raroa kinokino;

⁸ ana taani boob'ai bon taiani uea aika a karineaki ni kabutaa te aonnaba. Antai ae e baairea kamaunaan Turo?

⁹ Bon te UEA ae Moan te M'aaka ae e baaireia b'a e na karokoa te mamaa ma te b'ainrang nakoia akana a karineaki irouia aomata nako n te aonnaba.

¹⁰ Kaain Turo, e na uruaki am matabaiawa! Kam na manga riki b'a taan ununiki ngkami kaanga aroia kaain Aikubita.

M'anuokinan Turo

¹¹ E a tia ni kaenakoa baina te UEA ri aon taari, ni kab'arai nanoia botannaomata. E a tia n anga ana babaaire i bukin uruakan taian nono n te aba are Kanaan.

¹² E a tia n taku te UEA nakoia kaain Titon, “E a roko n tokina ami baka ni kukurei kam a mantinti. E ngae ngkana ko biri nako Kubero, e na bon aki reke naba iroum te rau.”

¹³ Bon noora te b'ai ae a karaoia kaain Aturia nakoia kaain B'aburon! A tia ni buakaniia, ma n uruaki taiani bareti ni kabane ake i aon te aba. Ao ngkai a maeka taiani man aika a aki manana i buakon aia b'ai koraki aika a uruaki.

¹⁴ Bon akea teuana te nono ae e na tiku n tei, ma ngaia ae kam na tuangiia taiani kaibuke ni m'am'ananga b'a a na maangoo n tang.

¹⁵ E na m'anuokinaki taekan te kaawa ae e buubura ae Turo i nanon itingaun te ririki, are bon anauni maiun te uea. Ao i mwiina, e na riki Turo b'a kaanga te aine ae ainen matawa ae e m'aneweaki n te kuna are e kaangai:

¹⁶ Ko a nako n aki manga ururingaki. ngkoe te aine ni kam'araa! Ma ngaia ae ko aiwaa i nanon te kaawa, n anene ma ni katang am katangitang aika ko taatangiri b'a ko aonga ni manga ururingaki.

¹⁷ I mwiin banen itingaun te ririki akanne, ao e na manga kaoka Turo te UEA nakon te karikirake. E na riki te kaawa b'a kaanga te aine ae e kabooa nako rab'atana nakoia aomata nako n taian botannaomata n te aonnaba,

¹⁸ ma e na bon akea te b'ai teuana ae e karekeaki ae e a tiku n te kaawa. E na riki te m'aane anne b'a a na b'ai te UEA, ao e na kabonganaaki ni kabooaki iai te kunnikai ae e raka i aon are e kainanoaki i bukiia koraki ake a onimakina te UEA.