Itaia 21 - Te B'aib'ara

B'akan B'aburon

¹ Aio rongorongon te rereua are i rarikin taari: A na buaka kairiribai man aia botannaomata kairiribai kaanga te ukeukenanti man Rereuan Maiaki.

² Bon te kaotioti ae e kakamaaku are e kaotaki nako iu te kaotioti i bukin te kam'aam'ane ao te urub'ai. Tuanga Eram ao Miria b'a a na katobibia man buakaniia kaain B'aburon. E a tia n tuea te UEA b'a na katoka te karawaawata are a karikia.

³ E a rangi ni korakora marakiu kaanga te aine ae e ariri ni bungiia natina. I tiaoki mani ikoaki korakora n te aro are I a bonotaninga ke n aki noraaba.

⁴ E minotaki atuu; I a maaku! N te moan tairiki, a onikaki au tai aika a kukurei nakon te miibuaka.

⁵ A karaoa aia baka n am'arake taiani mataniwi aika a rietaata i B'aburon. A am'arake ma ni mooi, ngke e a ti takaarua naba temanna ni kaangai, Mataniwi, kaei ami tabo! Kurii otangami.”

⁶ E taku te UEA nako iu, “Kanakoia taan tei b'a a na kakaaea b'a tera ae e a riki.

⁷ Ngkana a nooria te taanga ni buaka aika taan toka i aoia aoti ao te koraki n tautia aika a boorein man toka i aoia aati ma kaamero, ao tuangiia b'a a na tauraoi.”

⁸ Ao a taku taan tei “I a tia n tei n te ngaina ma te bong i aon te taua n taratara aei, te UEA.

⁹ Ao ngkai I a nooriia taanga n tautia teuana ma teuana aika boorein aika taan toka i aoia aoti.” Ao e takaarua temanna ni kaangai, “E a b'aka B'aburon! a bane ni wene n uruaki taiani bouannanti i aon tano ni uruaki.”

¹⁰ Ao i mwiina, I a kaangai, “Au aomata, kam a tia n rangi n rawaawata, ma iai au rongorongo nakoimi mai roun te UEA ae Moan te M'aaka, ae Atuan Iteraera.”

Ai Ti Maanra Riki?

¹¹ Aio te rongorongo i bukin Ruma: E takaarua temanna nako iu man te kaawa are Teira “Taan tei, ai ti maanra riki ao e a ngaina?”

¹² Ao I kaeka man te boua are au tabo n tei ni kaangai, “E na waekoa n roko te ngaina, ma e na manga oki naba te tairiki. Ngkana ko kan ataia riki, ao ko a manga oki riki rimwi.”

¹³ Aio te rongorongo i bukiia kaain Arabia ake a maeka n te rereua are e mate are n aonon Tetan: Ko riai ni kaoiia am kaa ni m'ananga

¹⁴ b'a a na uota te ran i bukiia aika a bora n taka. Ngkami aika kaain Tema kam na riai ni uoti taian am'arake i bukiia taan rawei maiuia aika a bora ni baki.

¹⁵ A kua ma ni kainano i mwiin kakioakiia irouia aia kairiribai ma taian kabaang ao taiani kainikatebe.

¹⁶ E taku te UEA nako iu: A nang toki mimitongiia kaain Keta man te ririki aei, kaanga aron banen ana tai te tia m'akuri i mwiin teuana te ririki.

¹⁷ A na ti tabeman nikiraia aia taani buaka ma aia kainikatebe ao aia kanoa nikatebe. Bon te berita te b'ai aei ae I a tia ni karaoia Ngai ae te UEA ae Atuan Iteraera.