Itaia 2 - Te B'aib'ara

Te Rau Ae Akea Tokina

¹ Aio te rongorongo mai roun te Atua ae anganaki Itaia are natin Amoti i bukin Iuta ao Ierutarem:

² E na riki b'a te kabanea n rietaata te maunga are e tei iai ana Tembora te UEA ni boong aika a na roko. E na bura i aon taian tabuki nako; ao a na uarurung botannaomata nako iai.

³ A na m'aiti aomata ake a na roko ao a na kaangai, “Ti a nakon ana Maunga te UEA ae Atuan Iakob'a ma n taromauri n ana Tembora.” E na reireiniira te UEA ana Tua mai Ierutarem, ao ti na ongotaeka i rouna.

⁴ E na katoki taiani ngurengure imarenaia botannaomata. Ane a na urui aia kabaang ma aia kainiwai ni manga kariki b'a taian reeke ma tiabora; ane a na aki manga karika te buaka ke ni buakaniia i marenaia.

⁵ Kaain Iteraera, ti na maiu n ootan te UEA.

Irakin Katei Aika A Bure

⁶ Ara UEA, ko a tia ni kiitaniia am Aomata aika Iteraera, i bukina ngke a katotoongi kateia botannaomata ake mai mainiku. A taromauriia antiia kaain Biritia ao a rangi ni iraorao ma taian ianena.

⁷ Bon iai kaub'aia aika akea tokiia aika tirewa ma taiani koora; iai naba aia aoti ma aia kaanibuaka aika a aki konaa ni warekaki.

⁸ A taromaurii taiani bouannanti aika a tia ni karaoi n taabo nako i nanon te kaawa.

⁹ Ma ngaia are, a na bane ni mamaa ma ni b'ainrang. Tai buokiia!

Te Bong Ni Motikitaeka

¹⁰ Kam na nako ni karabaingkami i buakon taiani b'a ao i aan te tano ngkami ni kabane, b'a e kakamaaku, e kamimii, ao e mimitong te UEA.

¹¹ Ngkana e roko te UEA, ao a na kananorinanoaki aomata ngkoa ake a kamoamoa, ao e na neboaki te UEA n ti ngaia.

¹² E a tia te UEA ae Moan te M'aaka n rinea te bong are a na b'aka iai aomata ake a kamoamoa ao a kainikatonga.

¹³ A na mate tiiran Reb'anon ake a rangi n rietaata ao ai aron naba taian kai ake oken Batian,

¹⁴ ma taian maunga ma tabuki ni kabane ake a rietaata,

¹⁵ taian nono aika a matoatoa.

¹⁶ kaibuke ni m'am'ananga i taari, ao booti ni kabane aika a tamaroa.

¹⁷ Ngkana e roko te bong anne, ao a na bane aika a kamoamoa ni kab'akaaki. Bon ti te UEA ae e na neboaki.

¹⁸ A na nako taiani bouannanti i bukin karaoan te raoiroi.

¹⁹ E raoiroi riki ngke kam karabaingkami i nanon taian nangananga ni b'aa ma taiani b'angab'anga e na kakamaaku te UEA, ma n tamaroa, ao ni mimitong ngkana e roko ni ioioa te aonnaba.

²⁰ Ao n te bong arei ao a na karenakoi aia bouannanti aomata ni kabane, aia bouannanti ake a karaoaki n te tirewa ma te koora i bukin te taromauri.

²¹ E na kakamaaku te UEA, man tamaroa, ao ni mimitong ngkana e roko ni kakamaakuia kaain aonnaba ane a na karabaia i nanoni b'angab'angan taiani b'a ao i aon taian tabuki.

²² Katoka onimakinan m'aakaia aomata. A na boni bane ni manga mate, ao a na kangaa ni buokingkami?