Itaia 16 - Te B'aib'ara

Taiani Kaangaanga Riki Tabeua Nakon Moaaba

¹ Kanakoia taian tiibu ataei b'a taiani b'aintangira nakoia taan tautaeka n te aba. Kanakoia ri nanon te rereua mai Tera nakon te Maunga are Tion.

² Ti te bo ainen Moaaba ake a ri nanon te Karaanga are Arenon ma te nanai ni man ni kiba ake a tionako mani ngaoia.

³ E taku ana tia uarongorongo Moaaba nakoia kaain Iuta, “Nanoangaira ao buokiira! Kataniira man kabuebuen riringan taai n te tawanou. Kamanoia ara aomata aika a rawei maiuia! Tai tannako mai rouia.

⁴ Kariaia b'a a na maeka ara aomata n abam i bukin karekean mwengaraoia.” Moaaba, e na mauna nako am kairiribai ae e rangi n tiritiri; a na aki manga buakaningkami mani urui abami.

⁵ Ao i mwiina, e na tei abanuean te tangira, ao e na tautaeka ma te eti temanna man ana utu Tawita. E na karaoa ae e raoiroi mani uota te riai.

Kamaunaan Kainikatongan Moaaba

⁶ Ti a tia n ongo kainikatongan Moaaba. A taningamatoa ao a kamoamoa kaaina, ma bon akea uaana.

⁷ Tuangiia kaain Moaaba ni kabane b'a a na tang i bukin aia botannaomata. Tuangiia b'a a na tang ma ni katuu ranin mataia i bukin kureeben Kiri-Areteta aika a tamaroa.

⁸ A tia n riki ni buraun taian nne n aroka ni kureebe ake i rarikin Etibon ao Tibema A aki toki ni momooi man wainin taian nne n aroka ni kureebe aikai taan tautaeka man taiani botannaomata ake a rokoroko i Iatera, ao i mwiina n ri nanon te rereua ao ri nanon taari.

⁹ Ao I tang ngkai n ai aron Iatera i bukin taian nne n aroka ni kureebe i Tibema. I katuu rannimatau i bukin Etibon ao i bukin Areare. E na aki manga karaoaki te baka n am'arake i bukin te tai

¹⁰ ke taiani kim'areirei ao taai ni kukurei, ngkana e tabe ni uotakimai uaan te tawaana. A tia n nako taian anene ao taian takaarua man te nne n aroka ni kureebe. A na akea manga taiani takaakaa ni kukurei ngkana a kamantaki taiani kureebe. E a tia ni katoki b'anaa ni kabane te Atua.

¹¹ E uruaki nanou inanou i bukin Moaaba ao Kiri-Ereti.

¹² Bon akea boonganan naanakoia kaain Moaaba nakon aia baonikarea n taromauri ao n tataro.

¹³ E a tia n taekin b'aai aikai ni kabane te UEA i bukin Moaaba.

¹⁴ Ao e taku ngkai, “E raoiroi ae ti tenua te ririki maanin aia tai taani m'akuri ake a kabooaki, ma e na bon aki maan riki nakon anne mimitongin ma kakannaton Moaaba. A na ti tabeman aomatana n tiku ni maiu, ma a na tiku n akea aroia.”