Itaia 14 - Te B'aib'ara

Okiran Mwengaia Ana Aomata Te UEA

¹ E na nanoangaea Iteraera te UEA ao e na manga karikiia b'a ana aomata aika a rineaki. E na kaokiia nakon abaia, ao a na iraki irouia ianena b'a a na riki b'a Iteraera naba.

² A na kairaki nakon mwengaia irouia botannaomata ake tabeua, ao e na karikiia Iteraera b'a a na toro n te aba are aban te UEA.

Maten Uean B'aburon!

³ E na kainaomataingkami te UEA man nanokawakimi, rawawatami, ao tautoronakimi.

⁴ Ao i mwiina, ane kam na b'ainingarea Uean B'aburon n anenei kuuna aikai: E a mate te man ae e kakamaaku! E a aki manga un nakoira.

⁵ E a tia ni kamanatuai m'aakaia uea ake a buakaka te UEA,

⁶ ake a kiunuun ma n aki toki ni kabuakakaia aomatan botannaomata ake tekorakina.

⁷ A bane ni wene n rau te aonnaba ni kabane; a karaoa aia baka ni kukurei aomatana ma taian anene ni kukurei.

⁸ A kukurei Uean B'aburon a karaoa naba aia baka ni kukurei taian aroka naba aika taiani m'aiango ao tiiran Reb'anon ao a taku, Ti kaeinakoaki ngkoa, ma akea ae e roko ni korokoroira.”

⁹ E a mate te aonnaba ma ingainga ni kaantaningaiko. a ongo taekan rokom ma te kukurei ae e bati tamneia taan tautaeka nikawai.

¹⁰ A na kaangai n tatabemaniia, “Ko a mamaara ngkai kaanga aekakira naba n tatabemaniira nako!”

¹¹ A toki ikai am kainikatonga ma am katangitang n aia aonnaba maate. Ko na rabuniko n taiani m'ata, ao ko na kieniko n taian ino.”

¹² Ko a tia ni b'aka Ngkoe ae te itoi ni ngaina ae e raneanea! Ko kab'akaia botannaomata ake tabeua; ao ngkai ko a kab'akaaki.

¹³ Ko taku i bon iroum, “N na tam'arakea karawa ni kaaki au kaintokanuea iai i etan taian itoi. N na tekateka ikekei ma taian anti ake a raroa nako i meang.

¹⁴ N na mena i aon taian nang, n aron te Atua ae Moan te Rietaata.”

¹⁵ Ma ko a mena inano ngkai i abaia maate.

¹⁶ Ane a na miimi akana a nooriko ao a na taraiko ao a na kaangai, “Aio ngkoa te m'aane are e karurua te aonnaba man ioioi taian abanuea?

¹⁷ E tauai taian kaawa aika a buubura ni kabane ao e karika te aonnaba b'a te rereua? Boni ngaia are e rawa ni kaokiia buure nakoni mwengaia?”

¹⁸ A taunaki taiani uea ngkana a mate n taiani ruanimate aika a mimitong.

¹⁹ Ma ngkoe ko na katukaki n aki taunaki, ao te mate riki temanna ae e wene i aan te wae kaanga te m'aoto ni m'aanga. Ko na riki b'a temanna mai buakoia tautia aika a mate n te buaka ao a ruorikaaki nakon b'angab'angan te b'aa ae moan te nano.

²⁰ Ko na aki taunaki ma taiani uea: ko urua abam ao ko tiringiia am aomata. Bon te mannikaakang ngkoe ae e buakaka! Ti kaantaningaia b'a a na m'anuokinaki taekaia am utu n aki toki.

²¹ Ti na tiringiia natim m'aane b'a kaboan mwiin aia bure aia bakatibu. A na bon aki taua taekan te aonnaba ke taiani kaawa aika a buubura n taabo nako n te aonnaba.

²² E a tia te UEA ae moan te M'aaka ni berita b'a e na buakaniia kaain B'aburon ao e na tiringiia aomata ake ikekei ni kabane, ma ngaia are, bon akea temanna mai buakoia ae e na manga ururingaki.

²³ E na kanakoia aomata te UEA, ao e na riki te aba b'a te tabo ae e aoneinei ae nneia maan aika a aki manana.

Katuaaean Aturia

²⁴ E a tia ni karaoa te berita aei te UEA ae Moan te M'aaka: A na koro bukin b'aai nako aika a I a tia ni baairei n aron are I taekinna.

²⁵ N na kanakoia kaain Aturia mai abau, ao N na kamanatuaia akana a mena i aon taiani maunga. N na kainaomataia au aomata man te tautoronaki irouia kaain Aturia.

²⁶ I a tia ni baairea te tai aei i bukin te aonnaba, ao e na tau aroia botannaomata baiu ae e m'aaka.

²⁷ E a tia te UEA ae Moan te M'aaka ni baairei baikai. Akea ae e konaa ni katokai ngkai!

Katuaeakiia Kaain Biritia

²⁸ E roko te rongorongo aei mai roun te UEA n te ririki are e mate iai te Uea are Aati:

²⁹ Kam na aki kukurei kaain Biritia ti i bukina ngkai e a uruaki te kai are kam oreaki iai. E na manga riki te kai b'a te naeta ae moan te boitin, ao i mwiina, e a manga riki b'a te raakon ae te ai rab'atana ae e kibakiba.

³⁰ A nang reke aia uteute i bukin kanaia aia tiibu aomata aika a maiu ni kainano aika a tangira buokaia ao a na maeka ma te rau. Ma N na kabakiia tabem'aang mai buakomi, ao a na tiringaki tabem'aang.

³¹ Kam na tang ma ni katuu ranin matami ni mataroan nako taiani kaawa. ngkami aika kaain Biritia! E a roko te bubu mai meang, ao a bane n tauraoi taiani tautia.

³² Ngkana e roko te tia uarongorongo man te botannaomata ae e raroa, ao ko na kaangai nakoina: “E karaoa Tion te UEA. Ao e na reke naba ikekei te rau iroun te aomata ae e rangi ni kainano.”