Iotua 9 - Te B'aib'ara

Kam'anean Iotua i rouia aomatan Kibeon

¹ Ao e tanoata rongorongon totokanikaia aomatan Iteraera nakoia uean maeaon te Ioretan ake uean Eta, ma uean Amoraite, ma uean Kanaan, ma uean Beritaite, ma uean Iwaite, ao uean Iebuti-ake n aaba ake i aon taian tabuki, ma aaba ake a rinano, ma ake a boraoi i mataniwiin taari are te Mereterenian ni bo nako iaang ni karokoa Reb'anon.

² A ikotii aia taanga ni buaka n ti teuana b'a a na buakana Iotua ma aomatan Iteraera.

³ Ma a tia n ongo aomatan Kibeon, ake Iwaite rongorongon te b'ai are e karaoia Iotua nakon Ieriko ma Ai.

⁴ Ma ngaia are a iangoa te iango ni kam'ane teuana ao a kanakoia m'aane ni bakaaea te uarongorongo man te tabo ae raroa kinokino. A katokai baeki aika a mangaingai i aon aia aati ma kunniman aika nnen te wain aika a b'ai ni kawai.

⁵ Ao a karin i aoia kunnikai ma aia kauniwae aika a mangaingai, ao a uoti kanaia taian kariki aika a bwebwee ma ni matoatoa.

⁶ Ao a nako n aia kaemb'a aomatan Iteraera i Kirekara ao a kaangai nakon Iotua ma aomatan Iteraera, “Ti roko man te aba ae raroa kinokino b'a ti na bubuti te boraraoi i bukin te raoi i marenara ma ngkami.”

⁷ Ao a kaangai aomatan Iteraera nakoia, “E aera ngkai ti na boraraoakina te raoi ma ngkami, e na mena ngkoa ao ngaia kam bon maeka ni kaan ma ngaira!”

⁸ Ao a kaangai uakekei nakon Iotua, “Taekara ane i nanon baim.” E titirakiniia Iotua ni kaangai, “Antai ngkami ao kam nako mai ia?”

⁹ Ao a karakina aia rongorongo ae kaangai, “Ti bon roko man te aba ae raroa kinokino, b'a ti a tia n ongo taekan te UEA ae Atuami ma baike e karaoi ni kabane i Aikubita,

¹⁰ ao arona naba nakoia uean Amora ake uoman i mainikun te Ioretan: Oka are uean Batian, are e maeka i Atitarota, ao Taion are uean Etibon.

¹¹ A tuangiira ara taan kairiri ma aomatan abara b'a ti na uoti ara tianaki aika a tau i bukin te m'ananga, b'a ti na butim'aai ngkami. A tuangiira naba b'a ti na tuangkami b'a e mena taekara i nanon baimi, ao ti na bubuti ngkami b'a kam na karaoa te boraraoi n raoi i marenara ma ngkami.

¹² Ngke ti moan anai ara berena aikai ao a kabuebue b'a a tib'a m'ai; ao nooria ngkai a m'au ao a bwebwee.

¹³ Ngke ti moan kanoai nnen ara wain aikai ao a rangi ni boou; ao nooria ngkai! A mangaingai ara kauniwae. A raeraeaki kunnikaira ma ara kauniwae b'a mwiin te m'ananga ae ab'ab'aki.

¹⁴ Ao a katoonga nikiran kanaia taan roko m'aanen Iteraera, b'a kanikinaean kariaiakan te bubuti i bukin te boraraoi n raoi, ma aki kakaea moa nanon te UEA i bukin te boraraoi anne

¹⁵ Ao e karaoa te boraraoi n raoi Iotua ma aomatan Kibeon ao e kamaiuia. Ao a karaoa aia berita ae matoa aia taan kairiri aomatan Iteraera b'a kaanga kamatoaan te boraraoi n raoi arei.

¹⁶ Tenibong i mwiin karaoan te boraraoi, a tib'a ataia Iteraera b'a aomata aikai a bon maeka n uakaan ma ngaia ni kaawa aika Kibeon, Kebira, Beerota, ao Kiriata-iearim.

¹⁷ Ma ngaia are a waakinako Iteraera ao i mwiin tenibong ao a roko ni kaawa aika; Kibeon, Kebira, Beerota, ao Kireata-ierim ake a maeka iai te koraki akekei.

¹⁸ Ma aki konaa ni buaka aomatan Iteraera ma aomatan Kibeon i bukina ngke a tia aia mataniwi ni berita n aran te UEA ae Atuaia Iteraera b'a a kariaia te boraraoi i bukin te raoi. Ao a bane ni ngurengure aomata nakoia mataniwi i bukin anne.

¹⁹ Ma a kaeka mataniwi ni kaangai, “Ti a tia ni berita n aran te UEA ae Atuaia Iteraera b'a ti kariaia te boraraoi i bukin te raoi ma I-Kibeon. Ao ngkai bon akea te b'ai ae ti na kona ni karaoia nakoia ae buakaka.

²⁰ Ti na aki tiringiia b'a ti a tia ni berita, b'a ngkana ti urua ara berita ao E na karekei kaira te UEA.

²¹ Ti na aki kuaia ma ti na anaia b'a ara taan koroaia ao ara taan itiran. Bon anne are a tangiria aia mataniwi.

²² Ao e kawaekoaia aomatan Kibeon Iotua ao e titirakiniia ni kaangai, “E aera ngke kam m'am'anaira b'a kam taku b'a kam roko man te aba ae raroa kinokino, ao ngaia kam bon maeka ni kaan ma ngaira ikai?

²³ Ao i bukin ami m'akuri aei ngkai ao E karekekaimi te Atua b'a kam na riki b'a ara toro. Kam na riki b'a ara taan koroaia, ao ara taan uraki ran i bukin um'an te UEA.”

²⁴ Ao a kaeka aomatan Kibeon ao a kaangai, “E tuanga Ana toro are Moote te UEA ae Atuami b'a kam na tiringiia aomata ni kabane aika a maeka ikai, ao kam na anaa naba abaia b'a abami. Ti maaku b'a kam na tiringiira naba ma ngaia are ti a m'am'anaai ngkami i bukin karekean te boraraoi n raoi ma ngaira.

²⁵ Ao ti kariaia ane kam taku; b'a taekara ane i nanon baimi.”

²⁶ Ao aio te b'ai ae karaoia Iotua: E kaawakiniia ao e tuangiia Iteraera b'a a na aki tiringiia.

²⁷ Ma e bon karikiia naba b'a aia toro, b'a taan koroaia, ao taan uraki ran i bukiia Iteraera ao i bukin baonikarean te UEA. Ao e a riki b'a aia taan m'akuri I-Kibeon ni karokoa boong aikai, n taabo ike E rineia te UEA b'a e na taromauriaki iai.