Iotua 5 - Te B'aib'ara

¹ Ao a ongo aia uea kaain Amora ni kabane ake i maeaon te Ioretan, ma aia uea naba kaain Kanaan ni kabane ake i mataniwiin taari are te Mereterenian, b'a E kaoraa te Ioretan te UEA i bukin karokoaia Ana aomata ni iterana, ao a bane ni maaku ma ni biu nanoia i rouia kanoan Iteraera.

Te Korotabonim'aane i Kirekara

² Ao E a manga taku te UEA nakon Iotua i nanon boong akanne, “Karaoi biiti tabeai man atiibu aika a kakang, ao koroi tabonim'aneia kanoan Iteraera aika m'aane iai.

³ Ma ngaia are e karaoa tuangakina Iotua iroun te UEA, ao e koroi tabonim'aneia kanoan Iteraera aika m'aane n te tabo ae aranaki b'a te Tabuki ni korotabonim'aneaki.

⁴ A bane n tia ni korotabonim'aneaki kanoan Iteraera aika m'aane i m'aain kitanan Aikubita i rouia,

⁵ ma a tuai korotabonim'aneaki ake a tib'a bungiaki i nanon te m'ananga are abwi te ririki. Imwin te tai anne a bane n tia ni mate m'aane ma ake a rorobuaka n tain te otinako mai Aikubita.

⁶ Bukin naba mateia b'a aki ongotaeka nakon te UEA. E baireia te UEA b'a bon akea temanna mai rouia m'aanen te roro arei ae e na noora te aba ae maiu reirei are kanoan ana berita nakoia aia bakatibu. Ao e bon koro bukin anne nako ia.

⁷ Ao natiia m'aane akekei ake ataei ni m'aane ake a tuai mani koreaki tabonim'aneia i nanon tain te m'ananga, ngaia te roro ae boou are korei tabonim'aneia Iotua.

⁸ I mwiin tian te korotabonim'aane, ao a bane n tiku aomata n tataninga maon mwiin koreaia, n te tabo are a motirawa iai.

⁹ E taku te UEA nakon Iotua, “I kataenakoa mai aomi n te bong aei rawawatan taekami b'a toro ngkami ngkoa i Aikubita.” Ao bon aei bukina are a arana iai te tabo arei Iteraera b'a Kirekara ni karokoa boong aikai.

¹⁰ Ngke a tabe ni motirawa kanoan Iteraera i Kirekara n te tabo ae aoraoi i rarikin Ieriko, ao a karaoa te toa are te riao ni moan tairikin te katebwi ma aua ni bong n te nam'akaina.

¹¹ Te bong are i mwiina bon te bong are a moan kana iai am'araken Kanaan: are te uita are e tinimaki ma te Kariki are Aki Karikaki.

¹² Ao e toki b'akan te maana n te bong naba arei, e aki manga reke i rouia kanoan Iteraera, ao mai ikanne are a moana iai am'arakeia man taian am'arake ake a kona n reke mai aon te aba are Kanaan.

Iotua ma te m'aane ae iai ana kabaang

¹³ Ao ngke e kaania Ieriko Iotua, ao e rina n noora te m'aane ae e tei i m'aaina ao e buuta ana kabaang. E kawaria Iotua ma n titirakinna, “Raora ngkoe, ke aiara?”

¹⁴ Ao e kaeka teuarei, “Tiaki ngai raomi ke aiami, ma bon mataniwiin ana taanga ni buaka te UEA.” Ao e b'aka nako aontano Iotua ma n taromauria ao e kangai, “Bon am toro ngai. Tera ae ko tangiria b'a N na karaoia?”

¹⁵ Ao e taku teuare mataniwiin ana taanga te UEA, “Buuti am kau mai waem b'a aontano ae tabu te tabo ane ko tei iai. Ao e karaoa te b'ai are e tuangaki Iotua.