Iotua 4 - Te B'aib'ara

Katean atiibu aika kanuringa

¹ Ngke a tia aomata ni kabane n ri nanon te Ioretan, ao E taku te UEA nakon Iotua,

² “Rineia tengaun ma uoman m'aane; kakatemanna mani baronga nako,

³ ao tuangiia b'a a na anai tebwi ma uoua atiibu mai nukan te Ioretan, man te tabo are a tei raoi iai ibonga. Tuangiia b'a a na uoti atiibu akanne, ao a na katikui n te tabo ane kam na wene iai nakon te tairiki.”

⁴ Ao e weteia uaake tengaun ma uoman Iotua ake e a tia n rineia,

⁵ ao e kaangai nakoia, “Rimoan Ana Ati ni Berita te UEA ae Atuami ri nanon te Ioretan, ao uota te atiibu i aon angami; tatabeua te atiibu i aon temanna, b'a teuana te atiibu i bukin teuana te baronga.

⁶ A na riki atiibu aikai b'a kauringaia kanoan Iteraera ana m'akuri te Atua are e a tia ni karaoi. Ngkana a titirakiningkami natimi n tai aika a na roko b'a tera baikai,

⁷ ao kam na kaongoraaia b'a ngke e ri nanon te Ioretan Ana Ati ni Berita te UEA ao e rina n toki raangan ranin te karaanga. A na kateimatoa uringan baika a riki n te bong aei ikai atiibu aikai.”

⁸ Ao uakekei a karaoa are e tuangiia Iotua. A anai tebwi ma uoua atiibu mai nukan te Ioretan, n aron ana taeka te UEA nakon Iotua. Kaka teuana uotaia uake kakatemanna man baronga nako.

⁹ Ao iai naba atiibu ake e katei Iotua i nukan te Ioretan n te tabo are a tei iai ngkoa ibonga ma te Atiniberita. (Ao bon akekei naba ni karokoa boong aikai atiibu akekei.)

¹⁰ A tei ibonga i nukan te Ioretan ni karokoa banen raoi baike e tuangaki Iotua i roun te UEA b'a e na tuangiia tibun Iteraera b'a a na karaoi. Bon aikai ana mwioko Moote nakon Iotua. A kawaekoaia aomata akekei n ri nanon te Ioretan.

¹¹ Ao ngke a bane raoi ni iteran te karaanga are teuana, ao a manga m'ananga ibonga ake a uota te Ati ni Berita n rimoaia aomata.

¹² A kawaekoaia n rimoaia aomata tibun Reuben, ma Kata, ma iteran te baronga are Manate ma aia b'ai ni buaka n aron are e a tia n tuangiia Moote.

¹³ Tao e nakon abwi te ngaa m'aane ake a tauraoi nakon te buaka, ao a raonaki iroun te UEA. Ao a ikotaki n te tabo teuana are aoraoi i rarikin Ieriko.

¹⁴ A karika Iotua b'a te aomata ae karineaki i bukin b'aai ake E karaoi te UEA n te bong arei. A karinea Iotua aomatan Iteraera ni kabane bongin maiuna, n ai aron karinean naba Moote ngkoa i rouia.

¹⁵ Ao te UEA e tuanga Iotua,

¹⁶ b'a e na tuangiia ibonga ake a uouota te Atiniberita b'a a na aerake man te Ioretan.

¹⁷ Ao e karaoa arei Iotua.

¹⁸ Ao ngke a bane n aerake raoi ibonga man te karaanga, ao e a manga tao te karaanga n arona are mai m'aaina.

¹⁹ A ri nanon te Ioretan aomata ni katebwinan bongin te moan nam'akaina. Ao a kaemb'a i mainikun Ieriko i Kirekara

²⁰ Ao ikanne are e a katei iai atiibu ake tebwi ma uoua Iotua ake a uotaki mai nanon te Ioretan.

²¹ Ao e taku nakoia kanoan Iteraera, “Kam na kangai nakoia kanoami ngkana a titirakiningkami i bukin atiibu aikai n ririki aika a na roko.

²² Kam na tuangiia rongorongoia Iteraera ngke a ri aon te tano ae m'au i nanon te Ioretan.

²³ Tuangiia rongorongon te UEA ngke E kaoraa te Ioretan ni karokoa ti roko raoi ni iterana are teuana, ma arona naba ngke E kaoraa Taari are Uraura i bukira.

²⁴ E na ataaki m'aakan te UEA ni baikai i rouia kaain aonnaba, ao kam na neboa te UEA ae Atuami n aki toki.”