Iotua 24 - Te B'aib'ara

A na kabanea n taeka Iotua nakoia aomatan Iteraera

¹ E a bootia barongan Iteraera ni kabane Iotua i Tekem. E weteia unim'aane ma taan kairiri, ma taan moti, ma b'akuakun Iteraera ni kabane b'a a na ikotaki i matan Ana Ati ni Berita te UEA.

² Ao e taku Iotua nakoia aomata ni kabane, “Aikai Ana taeka te UEA, A taromauriia anti tabem'aang ami bakatibu ngkoa ngke a maeka n iteran te karaanga are Iuberetiti, are i mainiku. Ao ami bakatibu anne bon teuare Tera, are taman Aberaam ma Naora.

³ Ao I anaa Aberaam are ami bakatibu anne man te aba anne ri aon te Iuberetiti ma ni karinna i aon te aba ae Kanaan ni kabuta. Ao I anganna ana kariki aika a m'aiti kurikuri. I a anganna natina are Itaaka.

⁴ Ao I angan Itaaka Iakob'a ma Etau. I a angan Etau aaba ake a tabukibuki i Etom b'a abana, ao ami bakatibu are Iakob'a e nako Aikubita ma natina.

⁵ Rimwi riki ao I kanakoa Moote ma Aaron, ao I karokoa te kaangaanga ae ab'ab'aki i aon Aikubita, ma I kaotinakoi ngkami mai iai.

⁶ I kaotinakoia ami bakatibu mai Aikubita, ao a rimwi aomatan Aikubita ma aia kaa ni buaka ao taan toka i aoia aoti. Ma ngke a roko ami bakatibu n taari are uraura

⁷ ao a tang nako iu ao I kab'aroa taari i aoia ana taanga ni buaka Aikubita ao a bane ni b'ab'a ni mate. Ao kam bane n noori baike I karaoi nakoia taanga ni buaka mai Aikubita. Kam maeka n te rereua n te tai ae e maan,

⁸ ao i mwiina I a manga uotingkami nako abaia aomatan Amoraite ake a maeka i mainikun te Ioretan. A buakani ngkami ma I anganingkami te tokanikai i aoia. Kam taua abaia ao I kamaunaia mai m'aaimi.

⁹ E buakani ngkami naba uean Moaba are B'araka are natin Tibore. E kanakoa ana taeka nakon B'araam are te burabeti are natin Beora te m'aane b'a e na karereanti ngkami.

¹⁰ Ma I aki kariaia b'a e na karaoa anne B'araam ngaia are e a manga kakab'aiaingkami ao kam riki ni kamaiuaki iai mai roun B'araka.

¹¹ Kam ri aon te Ioretan ao kam roko i Ieriko ao a buakani ngkami aomatan Ieriko ma taian Amoraite, ma Beritaite ma aomatan Kanaan ma aomatan Eta ma taian Kirekataite, ma Iwaite ma aomatan Iebuti, ma kam konaia ni kabane i bukina b'a I anganingkami te tokanikai i aoia.

¹² Ngke kam roko b'a kam na buakaniia uean Amoraite ake uoman, ao bon akea bonganan ami kainikatebe ma ami kabaang i bukina ngke I a kaman karina te maaku i nanoia ao I kakioia nako mai m'aaimi.

¹³ I anganingkami te aba ae kam aki karaoa aona, ao taian kaawa aika kam aki katei autiia. Ao ngkai kam a maeka iai ao kam a am'arake ni kureebe ao oriwa aika kam aki uniki!”

¹⁴ E a manga taku riki Iotua, “Ma ngaia ae ngkai, kam na karinea te UEA, tooro i rouna ma te koaua ao te kakaonimaki. Tai manga taromauriia anti n aroia ami bakatibu ngkoa i Metobotamia ao i Aikubita. Ma kam na taromauriia te UEA n ti ngaia.

¹⁵ Ngkana kam aki kan toro i rouna, ao kam na motika nanomi n te bong aei b'a antai ae kam na toro i rouna, antiia ami bakatibu ake i Metobotamia, ke antiia taian Amoraite ae kam maeka i abaia ngkai. B'a ngai ma au utu ti na toro iroun te UEA.”

¹⁶ Ao a kaeka aomata ni kaangai, “Ti na bon aki kona ni kiitana te UEA ni manga onimakiniia anti tabem'aang!

¹⁷ E kaotinakoia tamara ao E kainaomataira naba man te tautoronaki i Aikubita, ao ti bon noori kakai ake E karaoi. Ao E kaawakiniira naba mai rouia botannaomata ake ti rirarikiia i nanon ara tai ni m'am'ananga n te tai teuana ma teuana.

¹⁸ Ao ngke ti niniia te aba, ao E kakioia nako taian Amoraite mai m'aaira ake a maeka ngkoa ikai. Ma ngaia are ti bon riai ni beku i bukin te UEA b'a bon ti Ngaia Atuara.”

¹⁹ E taku Iotua nakoia, “Tiaki te b'ai ae beebete te kakaonimaki nakon te UEA, b'a bon te Atua ae tabu ae tangira te kakaonimaki. E aki manga kab'araa ana bure ane e aki kakaonimaki nakoina.

²⁰ Ao E na bon karekea kaimi ngkana kam a manga onimakiniia anti ianena. E na tiringngkami e ngae ngkana E a tia ni karaoa ae raoiroi nakoimi mai m'aaina.”

²¹ Ao a taku aomata nakon Iotua, “Tiaki taromauriia anti tabem'aang ma ti na taromauriia te UEA n ti ngaia.”

²² E taku Iotua nakoia, “Kam bon koaua b'a kam na taromauriia te UEA n ti ngaia?” ao a kaeka aomata, “Eng, ti bon koaua.”

²³ Ao e a manga taku Iotua, “Ao kam riai ni kamaunai ngkai anti ianena aika i roumi, ao kam na berita b'a kam na kakaonimaki nakon te UEA ae Atuaia Iteraera.”

²⁴ Ao a kaeka aomata nako Iotua, “Ti na taromauriia te UEA ae Atuara, ao ti na ongotaeka i rouna.”

²⁵ Ao e karaoa te boraraoi Iotua i bukiia aomata ma te UEA n te bong arei, ao e anganiia taian tua ma kawai ake a na riai n iri nanoia.

²⁶ Ao e koroi tuua aikai Iotua n ana boki n tua te Atua. Ao i mwiina e katea te atiibu ae buubura i rarikin um'an te UEA i aan te aroka ae te oke.

²⁷ Ao e taku nakoia aomata, “E na riki te atiibu aei b'a te tia kakoaua, b'a e a tia n ongo b'aai ni kabane ake E taekin te UEA nakoira. Ao e na riki b'a te tia kakoaua ni kaoti ara bure nakon te UEA.”

²⁸ Ao ngke e tia anne ao e a kaokiia aomata Iotua nako abaia nako. Ao a bane n okiri abaia.

Maten Iotua ma Ereata

²⁹ Ao i mwiin anne ao e mate Iotua are natin Nuun are Ana toro te UEA. E mate ngke tebubua tebwiina ana ririki.”

³⁰ Ao a tauna rab'atana i bon i abana are Timnata-Tera n aaba ake a tabukibuki ake i Eberaim i meangin te maunga are Kaati.

³¹ Ao a taromauriia te UEA aomata i nanon ana tai ni maiu Iotua. Ngke e a mate Iotua ao a bon teimatoa naba n taromauriia te UEA aomatan Iteraera i bukina ngke a bon maiu naba aia taani kairiri ake a bon noori naba Ana m'akuri ni kabane te Atua ake E a tia ni karaoi i bukiia Iteraera.

³² A uoti riin Ioteb'a aomatan Iteraera mai Aikubita, ao a taunna i Tekem are te m'akoro n aba are e kabooa Iakob'a ngkoa n tebubua te m'akoro n tirewa mai roun natin Amora are taman Tekem. E b'ainaki te m'akoro n aba aei i rouia kanoan Ioteb'a.

³³ E a manga mate Ereata are natin Aaron ao e taunaki i Kibea, te kaawa are n aaba ake a tabukibuki i Eberaim, te kaawa are e a manga anganaki natina te m'aane are Bineati.