Iotua 15 - Te B'aib'ara

Anganakiia te baronga are Iuta abaia

¹ Aikai aaba ake a anganaki utuun te baronga are Iuta b'a abaia; ake aaba ake a nako aiaki ake i rarikin tian Etom, ao e roota te rereua are Tin tokina mai maiaki.

² E moa tian abaia mai maiaki man tokin taari are mate mai maiaki,

³ ao e a manga biri nako aiaki man kawain Akerabim ni karokoa Tin. E biri ri maiakin Kateti-B'anea ri rarikin Etiron n tam'arake nako Ata, ao e a manga rairaki nako Kareka,

⁴ ni manga biri nako Atimon n iranako te karaanga are tian Aikubita, ao e toki n taari are te Mereterenian. Ao anne tian Iuta mai maiaki.

⁵ Tian abaia mai mainiku bon man tabon taari are mate ni karokoa tabona, ao tian abaia mai meang bon tabon taari are mate mai meang.

⁶ E a manga wairio te tia mai tabon taari are mate mai meang nako Beta-Okera, ao e a manga biri rimeangini Beta-Araba, ao e aerake nako atiibun Boan are natin Reuben.

⁷ Ao maikanne e a manga birirake nako m'aruan te kangaanga nako Tebira, ao e manga nako iang ni kaitaraa Kirekara, are kaaitaraa kawain Arummim are i maiakin te m'arua, ao e a manga waaki nakon te koburake n ran are i Entemeti, ao e a manga otinako nako Enrokera.

⁸ Ao e a manga tam'arake nakon te m'arua are Innom, are i maiakin te tabuki are mena iai aia kaawa I-Iebuti are Ierutarem. Ao e a manga ri aon te tabuki are i maeaon te m'arua are Innom are i meangin m'aruan Rebaim mai meang.

⁹ Ao e a manga biri nakon koburake n ranni Nebetoa, ni manga otinako nakon kaawa ake i rarikin te maunga are Ebiron. Ao mai ikanne e a manga b'aoua ni kaitaraa B'araa (are arana ngkai Kiriata-Iearim).

¹⁰ Ao e a manga b'aoua i maeaon B'araa ni kaineta te aba are tabukibuki are I-Etom, ao e a manga biri rimeangin te maunga are Iearim (ke Ketaron), ao e a manga biri rikaaki nako Beta-Temeti, ao e a manga waaki ri rarikin Timna.

¹¹ E a manga birinako te tia nakoni maunga ake i meangin Ekiron, ao e a manga b'aoua ni kaitaraa Tikeron, ri rarikin te maunga are B'aara, ni manga biri nako Timna ao e toki n taari are te Mereterenian,

¹² are bon te tia mai maeao. Ao anne ngkanne tian abaia utuun te baronga are Iuta.

Tauan aaba aika Eberon, Tebira iroun Kareb'a

¹³ E anganaki Kareb'a are natin Iebunne m'akoron aban te baronga are Iuta, n aron Ana mwioko te UEA nakon Iotua. Ma ngaia are e a anganaki Eberon are ana kaawa Areb'a are taman Anaka, i bukina b'a Areb'a aia kaawa tibun Anakim.

¹⁴ Ao Kareb'a e buakana Eberon mani kakioia nako kanoan Anakim aika Tetiai, Aiman, ao Taremai ma aia baronga nako.

¹⁵ Ao i mwiina, e a manga buakaniia aomata Kareb'a ake a maeka i Tebira, are e aranaki ngkoa te kaawa aei b'a Kiriata-tebera.

¹⁶ Ao e taku Kareb'a, “te m'aane ane e kataenikaia te kaawa are Kiriata-Tebera e na iein ma Nei Aketa ae natiu te aine.”

¹⁷ Ai natin Kareb'a ae Oteniera E kataenikai Kiriata-Tebera, ao Kareb'a e anga natina are Nei Aketa b'a e na iein ma Oteniera.

¹⁸ Ao ngke e a boo te mare ao e a tuanga buuna Oteniera are Nei Aketa b'a e na bubutiia tamana te tawaana. Ngke e ruo mai aon te aoti, ao e butim'aia tamana n tuangnga b'a tera ae tangiria.

¹⁹ Ao e kaeka Aketa, “I tangira te tabo ae iai te koburake n ran iai, b'a a rangi ni m'auteretere abau ake ko a tia n anganai ake i maiaki.” Ma ngaia are e a anganna taian koburake-n-ran n taabo aika a rietaata, ao n taabo naba aika a rinano.

Aia kaawa te baronga are Iuta

²⁰ Aikai kaawan te moan m'akoro n aba are a anganaki utuun te baronga are Iuta b'a abaia,

²¹ ake kaawa ake i maiaki ake i rarikin tian Etom aika: Kabeteera, Etera, Iakura,

²² Kina, Rimona, Atata,

²³ Keteti, Atora, Itenan,

²⁴ Tiba, Terem, Bearota,

²⁵ Atora-atata, Keriota-etiron (Ke Atora),

²⁶ Amam, Tema, Morata,

²⁷ Ata-Kata, Etimon, Beta-bereta,

²⁸ Ata-tuara, Beera-teba, Bitiotia,

²⁹ Baara, Iim, Etem,

³⁰ Eretorata, Ketira, Orema,

³¹ Tikeraka, Matemanna, Tantanna,

³² Rebaota, Tirim, Ain, ao Rimmon. Uabwi ma ruaiwa bootan kaawa aikai ni kabane ni ikotaki naba ma kaawa aika a uarereke i rarikiia.

³³ Te kauoua ni m'akoro are a anganaki naba utuun te baronga are Iuta b'a abaia, ake kaawa ake n taabo ake a rinano; Etitaora, Tora, Atina,

³⁴ Tanoa, En-kannim, Tabua, Enam,

³⁵ Iaremuta, Aruram, Toko, Ateka,

³⁶ Tiaaraim, Aritaim, Ketere, ao Keterotaim. Bon tebwi ma aua bootan kaawa ni ikotaki ma kaawa aika a uarereke i rarikiia nako.

³⁷ Aikai kaawan te katenua ni m'akoro are a anganaki naba utuun te baronga are Iuta b'a abaia. Aika taian kaawa naba n taabo ake a rinano ake: Tenan, Atatia, Miketarakata,

³⁸ Riran, Mitibe, Ioketeera,

³⁹ Rakiti, Botikata, Ekeron,

⁴⁰ Kabon, Ramam, Kiteriti,

⁴¹ Keterota, Beta-takon, Naama, ao Maketa. Bon tebwi ma onoua bootan kaawa aikai, ni ikotaki naba ma kaawa aika a uarereke ake i rarikiia.

⁴² Aikai kaawan te kaaua ni m'akoro are a anganaki naba utuun te baronga are Iuta b'a abaia, ake taian kaawa ake n taabo ake rinano i nukan te aba: Ribena, Etera, Atian,

⁴³ Ibeta, Atina, Netib'a,

⁴⁴ Keira, Aketib'a, ao Maretia. Bon ruaiwa kaawa aikai ni ikotaki ma kaawa aika a uarereke ake i rarikiia.

⁴⁵ Aikai kaawan te kanimaua ni m'akoro are a anganaki naba utuun te baronga are Iuta b'a abaia, ake taian kaawa ake n abaia I-Biritia are i mataniwiin taari, aika; Ekiron ma kaawana aika a uarereke, ao taian maeka nako i rarikina,

⁴⁶ ao taian kaawa ma kaawa naba aika a uarereke i rarikin Atitota, mai Ekiron ni karokoa taari are te Mereterenian.

⁴⁷ Ao taian kaawa naba ake Atitota ma Kata ma kaawaia nako aika a uarereke, ma taian maeka i rarikina nako ni karokoa te karaanga are tian Aikubita ao taian kaawa ake i mataniwiin taari are te Mereterenian.

⁴⁸ Aikai kaawan te kaonoua ni m'akoro are a anganaki naba utuun te baronga are Iuta b'a abaia, ake kaawa ake n taabo ake a tabukibuki aika: Tiamira, Iatira, Toko,

⁴⁹ Tanna, Kiriata-tanna (ae Tebira),

⁵⁰ Anaba, Etitemo, Anim,

⁵¹ Koten, Oron, ao Kiro. Bon tebwi ma teuana bootan kaawa aikai, ni ikotaki naba ma kaawa aika a uarereke i rarikiia.

⁵² Aikai kaawan te kaitiua ni m'akoro are a anganaki naba utuun te baronga are Iuta b'a abaia, ake kaawa ake n taabo aika rietaata aika: Arabia, Ruma, Etian,

⁵³ Ianim, Beta-tabua, Abeke,

⁵⁴ Umta, Eberon, ao Tiora. Bon ruaiwa m'aitin kaawa aikai, ni ikotaki naba ma kaawa aika a uarereke i rarikiia.

⁵⁵ Aikai kaawan te kawanua ni m'akoro are e anganaki naba te baronga are Iuta b'a abaia; kaawa ake n taabo ake a rietaata i mainiku i maiakin aaba ake a tabukibuki aika kaawa aika: Maon, Karemera, Tiba, Iuteta, Ietireera, Tanoa, Kain, Kibea,

⁵⁶ Ietireera, Ioketeam, Tanoa,

⁵⁷ Kain, Kibea, ao Timna. Bon tebwiina bootan kaawa aikai n ikotaki ma kaawa aika a uarereke i rarikiia.

⁵⁸ Aikai kaawan te karuaiwa ni m'akoro are a anganaki naba te baronga are Iuta b'a abaia, aika kaawa ake n taabo naba ake a rietaata i meangin aaba ake a tabukibuki aika kaawa aika: Areura, Beta-tura, Ketora,

⁵⁹ Maarata, Beta-anota, ao Eretekon. Onoua bootan kaawa aikai, n ikotaki naba ma kaawa aika uarereke i rarikiia.

⁶⁰ Aikai kaawan te katebwina ni m'akoro are a anganaki naba te baronga are Iuta b'a abaia, aika kaawa aika: Kiriata-B'aara (ke Kiriata-Iearim), ao Raba. Ti uoua kaawan te m'akoro aei, n ikotaki naba ma kaawa aika uarereke i rarikiia.

⁶¹ Aikai kaawan te katebwi ma teuana ni m'akoro are a anganaki naba te baronga are Iuta b'a abaia, ake n taabo ake a karabee ake i mainiku, nakon m'aruan te Ioretan, aika kaawa aika: Beta-araba, Mirin, Tekaka,

⁶² Nibetian, Te Kaawa n taoro, ao Enkeri. Bon onoua bootan kaawa aikai, n ikotaki naba ma kaawa aika a uarereke i rarikiia.

⁶³ Ao a uaia ni maeka aomatan Iuta ma I-Iebuti Ierutarem, ao n aki kona ni kakionakoia I-Iebuti mai Ierutarem. Ao anne bukina ae I-Iebuti a teimatoa ni maeka Ierutarem n reitaki ma aomatan Iuta.