Iotua 14 - Te B'aib'ara

Tib'aakin aaba ake i maeaon te Ioretan

¹ Aio rongorongon tib'aakin aaba ake i maeaon te Ioretan nakoia aomatan Iteraera. Ao a tib'ai aaba i aoia te botannaomata are Iteraera teuare Ereata are te ibonga, ma Iotua are natin Nun, ao mataniwiia utu man te baronga are Iteraera.

² E a karaoaki te katekeraoi i bukin tib'aan abaia barongan Iteraera ake ruaiwa ma te iterana, i maeaon te Ioretan n ai aron ana mwioko te UEA nakon Moote

³ E a bon kaman baaireia Moote b'a a na abana mainikun te Ioretan barongan Iteraera ake uoua ma te iterana (a bwenauaaki nakon uabaronga kanoan Ioteb'a b'a: Manate ao Eberaim).

⁴ E aki karekea tib'angaia te baronga are Rewi Moote n te aba ae buubura, ma e karekei aia kaawa ike a na maeka iai, ao e karekei naba aia tawaana i bukin aia nanai ni man.

⁵ Ao a tib'aa abaia Iteraera n ai aron Ana taeka te UEA nakon Moote.

Anganakin Kareb'a Eberon b'a abana

⁶ N te bong teuana ao a roko tabeman aomata man te baronga are Iuta ni kawara Iotua i Kirekara. Temanna mai buakoia, Kareb'a are natin Iebunne are te Kenitaite, e taku nako ia, “Ko ataa Ana taeka te UEA are e taekinna ngkoa i bukim ao i buku i Kateti-b'anea nakon Moote are Ana aomata te UEA?

⁷ Bon abwi au ririki ni maiu n te tai are e kanakoai iai Moote are Ana toro te UEA mai Kateti-b'anea b'a n na tutuo ni karaba n aaba aikai. I kaongoraea raoi mwiin au tutuo ni karaba.

⁸ A kakamaakuia aomata m'aane ake raou n te tai arei, ma I bon kakaonimaki n ongotaeka nakon te UEA ae Atuau.

⁹ Ao e berita Moote b'a e na karekei abau ma au ataei n te aba are i nako iai n tutuo i bukin au kakaonimaki anne.

¹⁰ Ma taraia ngkai, ai abwi ma nimaua te ririki i mwiin anganakin Moote te berita aei i roun te UEA, ngke a nakonako iai aomatan Iteraera i nanon te rereua. Ao e kateimatoa maiu te UEA i bukin Ana berita nako iu ni karokoa te bong aei. Noorai ngkai! Ai wanibwi ma nimaua au ririki ni maiu

¹¹ ao bon ti te bo naba marurungiu ngkai ma marurungiu n te tai are e kanakoai iai Moote b'a ana tia tutuo ni karaba. E bon rangi n tau naba ngkai korakorau nakon te buaka ke b'aai riki tabeua.

¹² Ma ngaia ae ko na anganai aaba ake a tabukibuki n ai aron ana berita te UEA n te bong are I nikira iai rongorongon au tutuo, ma ake raou n te tai arei. Ti a tia ni kaongoko ngkoa b'a iai taian aintoa aika a aranaki b'a taian Anakim aika a maeka ni kaawa aika a korakora ooia akanne. Antai ae ataia ngkoa ao e na buokiira te UEA n aron Ana taeka.

¹³ Ao e kakab'aia Kareb'a are natin Iebunne Iotua ao e anganna te kaawa are Eberon b'a abana.

¹⁴ E a riki b'a abaia kanoan Kareb'a are natin Iebunne are te Kenitaite.

¹⁵ E bon aranaki ngkoa te kaawa ae Eberon b'a Areb'a (Areb'a bon te aomata ae korakora i buakoia kaain Anakim). E a toki te buaka ao a rau aomata.