Iotua 11 - Te B'aib'ara

Konaakiia Iabin ma ake a buokia

¹ Ao ngke e ongo Iabin are uean Atora totokanikaia aomatan Iteraera i aoia aia kairiribai, ao e kanakoa ana taeka nakoia uea ake i rarikina; ake Iobaba are Uean Maton, ma uean Timron, ma uean Akitaba,

² ao nakoia naba uean aaba ake tabukibuki ake i meang, ma ake ni m'aruan te Ioretan ake i maiakin te nama are Kariraia, ao nakon naba aaba ake a rinano, ma aaba naba ake i mataniwiin taari, i rarikin Tora.

³ Ao e kanakoi naba ana taeka nakon uean Kanaan ake i mainiku ao i maeao, nakoia taian Amoraite, ma te baronga are Eta, ma taian Beritaite, ma Iwaite ake i aan te maunga are Oman n te aba are Mitib'a.

⁴ Ao a roko ma aia tautia ni kabane, ao bon te taanga ni buaka ae moan te korakora ae ai aron m'aitin tanon biken mataniwiin taari. Ao a uoti naba aia aoti ma aia kaa ni buaka aika a m'aiti.

⁵ Ao a ikoti aia taanga ni buaka uea aikekei n ti teuana, ao a katea aia kaemb'a i rarikin karaangan Merom b'a a na buakaniia aomatan Iteraera mai iai.

⁶ E taku te UEA nakon Iotua, “Tai maakuia, b'a N nang tiringiia nakon te ingabong i bukiia aomatan Iteraera. Kam na kaikoaki aia aoti ni kam'aukuia, ao kabuoki aia kaa ni buaka.”

⁷ Ma ngaia are a buakaniia Iotua ma ana m'aane n te aro ae aki kaantaningaaki n te karaanga are Merom.

⁸ Ao e anga te tokanikai te UEA nakoia Iteraera, ao a buakaniia aia kairiribai ma ni kakioia nako iaang ni karokoa Metirebotamaim, ma Titon, ao ni waerake naba ni karokoa m'aruan Mitibe. E bon waaki nako te buaka ni karokoa a bane raoi ni mate aia kairiribai.

⁹ E karaoa tuangana Iotua i roun te UEA, ao e kam'aukui aia aoti ma ni kabuoki aia kaa ni buaka.

¹⁰ Ao e a manga rairakiia Atora Iotua n buakanna ao e tiringiia ueana. (E rangi ni korakora te tautaeka n Atora nakon aaba nako n te tai aei).

¹¹ E tiringiia aomatana ni kabane, ao bon akea temanna ae maiu. A kabuoka te kaawa ni kabane.

¹² E bane n taui kaawa aikai Iotua ma ueaia, ao e tiringiia aomatana ni kabane, n ai aron ana mwioko Moote are ana toro te UEA nakoina.

¹³ A bane n aki kabuokaki kaawa ake a tei i aon te tabuki i rouia aomatan Iteraera, ma ti te kaawa are Atora are e kabuokia Iotua ni kamaunaa.

¹⁴ Ao a bane n anai b'aai aika a kakawaki ma taian man aomatan Iteraera man kaawa akekei b'a aia b'ai. Ma a tiringiia aomatana ni kabane, ao bon akea temanna ae reke maiuna.

¹⁵ E mwiokoa Moote are ana toro te UEA ao Moote e a manga mwiokoa Iotua. Ao e ongotaeka Iotua nakon taian mwioko. E karaoi b'aai ni kabane ake e mwiokoaki iai Moote i roun te UEA.

Te Aba Are e Reke Iroun Iotua

¹⁶ E taui aaba ni kabane Iotua ake a tabukibuki, ma aaba naba ake a rinano ake i maeao, ao ake i maiaki, ma taabo ni kabane ake i Koten, ma te aba are e m'auteretere are i maiaki, ao n reitaki naba ma m'aruan te Ioretan.

¹⁷ Ao a taui taekan aaba akekei Iotua ma aomatan Iteraera ni moa man te maunga are Araka i rarikin aban Etom ake i maiaki ni karokoa B'aara-kata are ni m'aruan Reb'anon i aan te maunga are Oman are i meang.

¹⁸ E buaka Iotua ma uean aaba aikai i nanon te tai ae moan te maan, ma a bon bane ni konaaki i rouna, ao e tiringiia ni kabane.

¹⁹ Bon ti Kibeon te kaawa are a maeka iai tabeman taian Iwaite, are e raoi ma Iteraera. Ao a bane ni buakanaki man tauaki ake nikirana i roun Iotua.

²⁰ Bon te UEA ae kataningabonoia ma ni kakorakorai nanoia ni kan buakaniia Iteraera b'a aonga n tiringaki n akea te nanoanga ma ni kamaunaaki i rouia aomatan Iteraera n ai aron ana taeka te UEA nakon Moote.

²¹ N te tai aei ao e a m'ananga Iotua n tiringiia te reeti n aintoa teuana ae a aranaki b'a Anakim ake a maeka n aaba ake a tabukibuki, i Eberon, ma Tebira, ma Anaba, ao n aaba naba ni kabane ake i Iuta ma ake i Iteraera. E bon kabaneia n tiringiia Iotua ma ni kamaunai aia kaawa ake a korakora.

²² Bon akea nikiraia taian Anakim n tiku ni maiu n te aba are Iteraera, ma bon iai naba tabeman ake a tiku ni maiu i Kaata, ao i Kate, ao i Atitota.

²³ A reke aaba ni kabane i roun Iotua n ai aron ana taeka te UEA ngkoa nakon Moote. E anga aaba ni kabane Iotua nakoia Iteraera b'a abaia, ao e tib'atib'ai i aon aia baronga n tatabeua nako. Ao a motirawa aomatan Iteraera man te buaka.