Iotua 1 - Te B'aib'ara

E tuangaki Iotua iroun te Atua b'a e na kataenikaia Kanaan

¹ I mwiin maten Moote are Ana toro te UEA, ao E taetae te UEA nakon ana kauoman Moote are Iotua are natin Nuun te m'aane, ao

² E taku, “E a mate au toro are Moote. Katauraoiko ngkai, ngkoe ma aomatan Iteraera ni kabane, ao ri nanon te karaanga are te Ioretan nakon te aba ae N nang angania b'a abaia.

³ I a tia n anganingkami te aba ae kam nang nakonako i aona b'a abami ni kabaneingkami aika au aomata ni kabane, n aron are I a tia n tuanga Moote.

⁴ Tian abami mai maiaki, te rereua, ao mai meang, maungan Reb'anon, ao mai mainiku, te karaanga are Iuberetiti, ao mai maeao, e biri ni wairio man te karaanga are Iuberetiti ri nanon abaia kaain Eta n toki n taari are te Mereterenian.

⁵ Bon akea ae na kona n eekikonako ni karokoa matem. N na mena i roum n ai arou ngke I mena naba iroun Moote. N na memena i roum n taai nako. N na bon aki kiitaniko.

⁶ Ko na korakora ao ko na ninikoria b'a ko na riki b'a aia tia kairiri aomata aikai ni karokoa te tai are a na tekateka raoi iai n te aba are I a tia ni berita b'a N na anganiia aia bakatibu.

⁷ Ko na korakora ma n ninikoria riki n toui mwiin tuua ni kabane ake e a tia n anganiko Au toro are Moote. Ngkana ko aki kaaki teuana mai i buakon tuua aikai ao e na bon iriiriko te tekeraoi n taabo nako ike ko nako iai.

⁸ Ko na kakoaua raoi b'a e na riai ni wawarekaki bokin te tua n taai nako n tain te taromauri. Kamateb'aia te tua ni bong ao ni ngaina, ao kakaonimaki ni karaoi b'aai ni kabane akana a koreaki iai. Ao ko na bon kakab'aia ma n tekeraoi.

⁹ Uringa are I a tia n tuangko, b'a ko na korakora ma n ninikoria! Tai maaku, ao tai b'arannano, b'a N na raoraoniko n taai nako ao n taabo nako ike ko nako iai, Ngai ae te UEA ae Atuam.”

Ana taeka Iotua nakoia aomata

¹⁰ Ao e tuangiia ana taan kairiri Iotua

¹¹ b'a a na ri nanon te maeka ao a na kaangai nakoia aomata, “Tenibong ma ngkai ao ti na ri nanon te karaanga are te Ioretan nakon te aba are e motikia te Atua b'a ti na abanna ma ngaia ae kam a katauraoi kanami ae tau nakon maanin te m'ananga anne.

¹² E taku Iotua nakoia baronga ake Reuben, ma Kaata ao iteran te baronga are Manate,

¹³ “Uringa ana taeka ana toro te UEA are Moote ngke e tuangngkami b'a e na anganingkami te aba aei ae i mainikun te Ioretan b'a nnemi ni maeka.

¹⁴ A na tiku ikai buumi ma ami ataei ma ami nanai ni man. Ma a na waaki nako n ri nanon te karaanga n rimoaia tautia aika a ninikoria ni buaka b'a a na buokiia raoia,

¹⁵ ni karokoa reken raoi aaba ake i maeaon te Ioretan irouia ake E a tia ni motiki bukiia te UEA ae Atuami b'a abaia. Ngkana E a tia te Atua ni karekei nneia ni maeka barongan Iteraera ake a na maeka i maeaon te Ioretan, ao kam a tib'a kona n okiri abami ngkami barongan Iteraera ake kam maeka i mainikun te Ioretan n aron are e a tia n tuangngkami ngkoa Moote are ana toro te UEA.”

¹⁶ A kaekaa Iotua ao a kaangai, “Ti na karaoi b'aai ni kabane aika ko a tia n tuangiira, ao ti na nako nakon taabo ike ko kanakoira nako iai.

¹⁷ Ti na ongotaeka raoi i roum n ai arora ngkoa ngke ti ongotaeka raoi naba i roun Moote, ao ke E mena i roum te UEA ae te Atua n ai arona naba ngkoa ngke E mena iroun Moote!

¹⁸ Ane e aki karinea m'akam ma n rawa n ongo n am taeka ao e na tiringaki. Ko na korakora ao ko na ninikoria!”