Iona 2 - Te B'aib'ara

Ana Tataro Iona

¹ Ao e tataro Iona nakon te UEA ae Atuana mai kabin biroton te ika ao e kaangai,

² “I weteiko te UEA mai buakon rawaawatau, ao ko kaekaai. mai kabin te aonnaba i nanon abaia maate, I tangira buokau ao Ko ongo irou.

³ Karenakoai nako nano, nakon kabiroron marawa, ike e a otab'aniniai iai te ran, ao a bane am naao aika a korakora ni b'aro i aou.

⁴ I taku b'a I oreaki mai matam, ao I aki manga nora riki am Tembora are e tabu.

⁵ E roko te ran i aou ao e bonota ikeu. E otab'aniniai taari, ao a ninira atu taian keangi ni marawa.

⁶ I ruo nakon wakaan maunga, nakon te aba are e kainaki mataroana n aki toki. Ma ngkoe, te UEA ae Atuau, Ko tabekai rake mai nano ma te maiu.

⁷ Ngke I namakinai b'a N nangi mate, ao te UEA, I tataro nakoim, Ko ongo irou mai nanon am Tembora.

⁸ Akana a taromauri bouannanti aika akea maneia, a tia ni kitana karineam.

⁹ Ma N na anenea kamoamoam; N na anga karea nakoim. N na karaoa are I a tia n taetae n tuea iai. Bon mairoun te UEA te maiu!

¹⁰ Ao te UEA, E tuanga te ika b'a e na mumutaa Iona i aon te bike, ao e karaoa tuangana te ika.