Ioera 3 - Te B'aib'ara

E Na Katuaaia Botannaomata Te UEA

¹ N te tai anne, N na manga kaoka marin Iuta ma Iteraera ngai ae te UEA.

² N na manga ikotiia botannaomata ake a kamaaenakoia au Aomata n taabo nako n te aonnaba n te M'arua are Motikitaeka A na tib'a abau

³ ma ni kemboronna ni kakaaea b'a antai ae e na reke i rouna au aomata; a kabonakoia ataeinim'aane ma ataeinaine i bukin kabooaia ainen matawa ao te wain.

⁴ E aera ngkai kam karaoa aei ngkami aika kaain Turo ao Titon? Kam kataia ni karokoingkami Irou? N na kabooa mwiin ae ko karaoia i m'aain ae ko ataa te b'ai ae e na riki.

⁵ Ko a tia n anai au b'ai aika a rangi ni bobuaka, n reitaki ma au tirewa ma au koora ma n uotinako nakon am tembora.

⁶ Ko a tia ni katikitikiia nako kaain Iuta ma Ierutarem mai abaia ao ni kabooia nako nakoia kaain Kuriiti.

⁷ Ma N na karekea nanoia kaain Iuta b'a a na iangoa okiran mwengaia, ao te b'ai are e riki nakoia e na manga riki nakoim.

⁸ N na anga natim m'aane ma natim aine nakoia kaain Iuta, ao a na kabonakoia nakoia Tebean, aika a maeka i Kiraroa. Bon aei au taeka Ngai ae te UEA!

Te Motikitaeka N Te M'arua are Motikitaeka

⁹ Ko na kaangai nakoia botannaomata nako: “Katauraoi nakon te buaka! karin angimi nakon te buaka. Katea ami raian nakon te buaka ao katauraoi nakon te buaka.

¹⁰ Karaoi taiani kabaang man taian b'ai ni b'arau ao karaoi taiani kainiwai man b'aini m'akurin te nne n aroka. Kakorakorai taabo aika a mamaara.”

¹¹ Tai tab'ara, ngkami aika botannaomata nako! Kawaekoaingkami. Buubutiia te UEA b'a e na karokoia ana taani buaka b'a a na iri.

¹² Kam na iri ngkai nakon te M'arua are Motikitaeka, ike E na motikitaekaia iai te UEA botannaomata nako aika i rarikira.

¹³ Bon tawaanan taian uita ngaiia aika a tawaa. Uoti ni karin taian tai! Bon taian kureebe aika a b'arikoriko ngaiia. Ani moana toutouaia ngkai! Ngkana arona b'a taian wain ara kairiribai, ao a na bane n taonako taian tiaeki ni kabane.

¹⁴ A kaona te M'arua are Te Motikitaeka aomata aika m'aiti. E na roko ana bong n ana Motikitaeka te UEA n te tai ae e aki maan ikai

¹⁵ e na akea ootan taai ke nam'akaina, ao a na toki raneanean taian itoi.

¹⁶ E na bekorara te UEA kaanga te raian mai nuukan Ierutarem e na karurua aonnaba ma karawa. Ma te UEA bon te nono, te tabo ni katantan i bukiia ana aomata aika Iteraera.

E Na Bon Kakab'aiaia Ana aomata te UEA.

¹⁷ Bon te UEA Ngai ae Atuami. Ao kam ataia b'a I maeka i aon Tion, b'a e aonga n tabu Ierutarem, ma n aki kuukuneaki n aia taanga ni buaka ianena.

¹⁸ A na kaona aon te maunga n te bong arei uaan taiani kureebe aika a kakaonimaki. Ao a na kam'aita te miriki ami kao ma ami kooti aika a am'arake i aon taian tabuki. A na aki konaa ni m'autakataka taiani karaanga n ran i Iuta; ao te raanga n ran are n au Auti e na raanga n roko man te M'arua are Akatia.

¹⁹ A iowawa ma n akiako Aikubita ma Etom, n te aro ae akea bukina. Ngkai a na riki abaia b'a taian rereua aika akea b'ain aona,

²⁰ ma a na teimatoa n iai kaain Iuta ma Ierutarem.

²¹ I maeka Ngai ae te UEA i aon te Maunga ae Tion. N na katuaaia taani bure ao N na tei i bukiia aika akea aia bure.